اقار-شاقار شىڭداردىڭ باۋرايىندا ورىن تەپكەن ورتالىق المالى شاھارعا اتباسىن بۇرعان تۋريستەردى دە ءتانتى ەتەرى انىق. تاڭعى جۇپاردى تامسانا جۇتىپ, تابيعاتپەن ۇندەسە دەمالۋدى قالايتىن الماتىلىقتار سەنبى-جەكسەنبى كۇندەرى وسى ماڭدى بەتكە الاتىن بولعان. مۇندا تاۋ سپورتىنا ارنالعان ءتۇرلى بۇيىمدار ساتىپ الىپ, ارناۋلى تەراسسالاردا تاماقتانۋعا دا بولادى.
«سوڭعى جىلدارى قالا تۇرعىندارى مەن قوناقتارىنىڭ تاۋلى ايماققا قىزىعۋشىلىعى ارتىپ كەلەدى. ونى وسىندا كەلىپ دەمالۋشىلاردىڭ كوپتىگىنەن بايقايمىز. قالا اكىمدىگى ەكوتۋريزمدى دامىتۋ ماقساتىندا ءتۇرلى جوبالاردى ىسكە اسىرىپ وتىر. بۇگىنگى پايدالانۋعا بەرىلگەن ۆيزيت-ورتالىق – سونىڭ دالەلى. سوڭعى 5 جىلدا قىزمەت كورسەتۋ ساپاسى بيىك ساتىعا كوتەرىلدى. سونىڭ ناتيجەسىندە قىس مەزگىلىندە كورشى ەلدەردەن الماتىعا اعىلاتىن تۋريستەر سانى دا ەداۋىر ارتىپ وتىر», دەيدى اۋەسقوي الپينيست بەكزات نۇرىمەتوۆ.
اتى جامان ىندەتتەن ارىلىپ, قالىپتى ومىرگە قادام باسۋدى تىلەپ وتىرعان ەل تۇرعىندارى ەس جيىپ, ەتەك جيعان سوڭ جاڭا ساپارلار مەن ساياحاتتار تۋرالى تولعانۋى – قالىپتى نارسە. دەگەنمەن الەمدەگى ەپيدەميالىق احۋال الىس-جاقىن شەتەلدەرگە ساياحاتتاۋ جايىن كەيىنگە شەگەرەرى ءسوزسىز. سوندىقتان جوسپاردى تەك ىشكى تۋريزمگە قاتىستى قۇرۋعا بولاتىنى راس. مامانداردىڭ پىكىرىنشە, قىس ماۋسىمى باستالعالى بەرى ىشكى تۋريزمگە سۇرانىس ارتا تۇسكەن. بۇل رەتتە جىل سايىن 4,5 ميلليونعا دەيىن تۋريست تارتۋعا قابىلەتتى, ەلدەگى ەڭ ۇلكەن تۋريستىك الەۋەتى بار الماتى تاۋ كلاستەرى شەتەلدىك قوناقتار مەن وتانداستارىمىزعا تاپتىرماس دەمالىس ناۋقانىن ۇسىنىپ وتىر.
الماتى
