قور دەرەگىنە سۇيەنسەك, بۇگىنگى تاڭدا الماتى قالاسى تۇرعىندارىنىڭ 82%-ى ساقتاندىرىلعان. ياعني ولار مەديتسينالىق ساقتاندىرۋ پاكەتىندەگى قىزمەتتەردى ەش كەدەرگىسىز پايدالانا الادى. ال شۇعىل مەديتسينالىق كومەك تۇتاس ەل تۇرعىندارىنا ستاتۋسىنا قاراماستان كورسەتىلۋى ءتيىس.
جارنانىڭ قوماقتى بولىگىن جەڭىلدىگى بار 15 سانات ءۇشىن مەملەكەت تولەيدى. بۇل تىزىمدە بالالار, زەينەتكەرلەر, ەكىنشى دۇنيەجۇزىلىك سوعىسىنىڭ ارداگەرلەرى مەن قاتىسۋشىلارى, «التىن القا», «كۇمىس القامەن» ماراپاتتالعان كوپ بالالى انالار, جۇمىس ىستەمەيتىن جۇكتى ايەلدەر, دەكرەت دەمالىسىنداعىلار, مۇگەدەكتەر مەن بالالىق شاقتان مۇگەدەك ازاماتتاردىڭ كۇتۋشىلەرى, ستۋدەنتتەر بار.
ەل كولەمىندە ساقتاندىرۋ جارناسىن تولەۋ مىندەتىنەن بوساتىلعانداردىڭ جالپى سانى 11 ملن-عا جەتىپ جىعىلادى. ودان كەيىنگى سانات قاراماعىنداعى قىزمەتكەرلەرىن ساقتاندىرۋعا مىندەتتەلگەن – جۇمىس بەرۋشىلەر. جارنانى 2017 جىلدىڭ شىلدەسىنەن بەرى تولەپ كەلە جاتقان بۇل سانات بيىلدان باستاپ جالاقىنىڭ 2%-ى كولەمىندە جارنا اۋدارادى. جارنا جۇمىسشىنىڭ جالاقىسىنان ەمەس, ەڭبەكاقى قورىنان اۋدارىلۋى ءتيىس. ال جۇمىسكەردىڭ جالاقىسىنان بيىلدان باستاپ 2% جارنا ۇستالادى.
– جەكە كاسىپكەرلەر ءوزى ءۇشىن جارنا تولەۋدى بۇرىنعىشا جالعاستىرا بەرەدى. ولار تولەيتىن تولەمدە وزگەرىس جوق. بۇل بۇرىنعىشا ەڭ تومەنگى جالاقىنىڭ 5%-ى. بيىل ەڭ تومەنگى ەسەپتىك كورسەتكىش وزگەرگەن جوق, اي سايىنعى تولەم – 2 975 تەڭگە, دەيدى قورداعىلار.
بۇل رەتتە ءوز قىزمەتىن تىركەمەي, باسقا جەكە جانە زاڭدى تۇلعالارعا ءار ءتۇرلى قىزمەت كورسەتەتىن ءوزىن-ءوزى جۇمىسپەن قامتىعان ازاماتتار جارنانى قالاي تولەيدى دەگەن زاڭدى ساۋال تۋىندايدى. بۇعان قاتىستى قور ماماندارىنىڭ مالىمدەمەسى تومەندەگىدەي.
ء«وزىن-ءوزى جۇمىسپەن قامتىعاندار ساناتىنا جاتاتىن اتالعان جەكە تۇلعالار ساقتاندىرۋ جۇيەسىنە ەكى ءتۇرلى جولمەن قوسىلا الادى: ەتج 5%, ياعني, 2 125 تەڭگە تولەپ, ءوزىن-ءوزى جۇمىسپەن قامتىعاندار ساناتىنا قوسىلۋعا بولادى. نەمەسە بىرىڭعاي جيىنتىق تولەم (بجت) تولەۋشى رەتىندە تىركەلۋىنە مۇمكىندىك بار. 2021 جىلدىڭ 1 قاڭتارىنان باستاپ اەك 2 917 تەڭگە بولىپ بەلگىلەندى. جيىنتىق تولەمدى قالا تۇرعىندارى 1 اەك كولەمىندە, اۋىل تۇرعىندارى 0,5 اەك كولەمىندە (1458 تەڭگە) تولەيدى. بۇل تولەمنىڭ وزىندىك ارتىقشىلىقتارى بار. جارنانىڭ 40 پايىزى – مەديتسينالىق ساقتاندىرۋ قورىنا, 30 پايىزى – بىرىڭعاي جيىنتىق زەينەتاقى قورىنا, 20 پايىزى – الەۋمەتتىك ساقتاندىرۋ قورىنا اۋدارىلسا, 10%-ى تابىس سالىعى رەتىندە ۇستالادى. بجت ارقىلى ازامات بارلىق سالىقتى تولەيدى ءارى بولاشاقتا بازالىق زەينەتاقى مەن الەۋمەتتىك تولەمدەردى الا الادى», دەپ اتاپ ءوتتى مەديتسينالىق ساقتاندىرۋ قورىنىڭ الماتى قالالىق فيليالىنىڭ وكىلدەرى.
ازاماتتىق-قۇقىقتىق كەلىسىمشارت نەگىزىندە جۇمىس ىستەيتىن جەكە تۇلعالار تولەيتىن جارنا كولەمى بيىل تابىستىڭ 2%-ىن قۇراپ وتىر. بىراق تولەنەتىن سومانىڭ شەگى 8500 تەڭگەدەن (ياعني 10 ەتج 2%) اسپاۋى قاجەت. ەسكە سالايىق, 2021 جىلى ساقتاندىرىلماعان ازاماتتار الدىڭعى 12 ايدىڭ قارىزىن وتەۋى ءتيىس. تولىق مالىمەتتى قوردىڭ 1406 بىرىڭعاي بايلانىس ورتالىعى ارقىلى الۋعا بولادى.
الماتى
