جامبىل وبلىسىنداعى قىزىلقاينار اۋىلىنا اۋىزسۋ تارتىلدى

ايماقتار • 20 قاڭتار، 2021

جامبىل وبلىسىنداعى قىزىلقاينار اۋىلىنا اۋىزسۋ تارتىلدى

30 رەت كورسەتىلدى

جامبىل اۋدانى، قىزىلقاينار اۋىلىندا تالاي جىلدان بەرى كوپشىلىكتىڭ كوكەيكەستى ماسەلەسى شەشىلىپ، سۋ جۇيەسى تارتىلدى، دەپ حابارلايدى Egemen.kz.

حاميت ەسامان

بۇل ماقساتقا «جۇمىسپەن قامتۋدىڭ جول كارتاسى» مەملەكەتتىك باعدارلاماسى اياسىندا 740 ميلليون 760 مىڭ تەڭگە ءبولىنىپ، 950 اۋلاعا اۋىزسۋ جۇيەسى جۇرگىزىلدى. مۇندا «ارايسترويماركەت-2003» جاۋاپكەرشىلىگى شەكتەۋلى سەرىكتەستىگى قۇرىلىس جۇمىستارىن جۇرگىزىپ، 3000 تۇرعىنى بار اۋىلعا ءبىر جىل ىشىندە سۋ تارتىپ بەردى. وسى ورايدا، جامبىل اۋدانى اكىمىنىڭ ورىنباسارلارى ەرلان قىدىرالى ۇلى مەن نۇرلان نەسىپبەكوۆ اۋىلدىقتارمەن كەزدەسىپ، كوپشىلىكتى كوپتەن كۇتكەن قۋانىشىمەن قۇتتىقتادى. ولار وڭىردە اۋىزسۋ ماسەلەسى «جۇمىسپەن قامتۋدىڭ جول كارتاسى»، «وڭىرلەردى دامىتۋ» مەملەكەتتىك باعدارلامالارى اياسىندا جۇيەلى تۇردە شەشىمىن تاۋىپ كەلە جاتقانىن، بۇگىندە اۋدانعا قاراستى 42 ەلدىمەكەننىڭ 29-ى ورتالىقتاندىرىلعان اۋىزسۋمەن قامتىلعانىن جەتكىزدى. ال، بيىلعى جىلى شوقاي اۋىلىنداعى اۋىزسۋ قۇبىرىنىڭ قۇرىلىسى اياقتالىپ، پايدالانۋعا بەرىلەدى دەپ جوسپارلانعان.

وسى ۋاقىتقا دەيىن قىزىلقاينار اۋىلىنىڭ تۇرعىندارى كەڭەس زامانىندا تارتىلعان اۋىزسۋدى پايدالانىپ كەلگەن. الايدا، تاۋ بوكتەرىنەن كەلەتىن سۋدىڭ ساپاسى سوڭعى كەزدە تومەندەي باستاعان. تۇرعىندار سۋ قورىنىڭ جىل سايىن تومەندەپ كەلە جاتقانىن، اۋىلداعى سۋ قۇبىرلارىنىڭ توزعانىن ايتىپ، تالاي رەت ماسەلە كوتەرگەن بولاتىن. ال، بۇگىندە اۋىل تۇرعىندارى ءدان ريزا. «جاڭا سۋ مۇناراسى ءبىزدىڭ كوپتەن كۇتكەن تىلەۋىمىز ەدى. اراعا 70 جىل سالىپ، اۋىلىشىلىك كوشەگە قۇبىرلار تارتىلىپ، ءار اۋلاعا سۋ تەتىكتەرى ورنالاستىرىلدى. وسى ورايدا اۋىلداعىلاردىڭ تۇرمىسىن جاقسارتۋعا ۇلەس قوسىپ جۇرگەن بارشا ازاماتتارعا العىسىمدى بىلدىرەمىن»، دەدى اۋىل تۇرعىندارى اتىنان كەنجەتاي قۇرمانقۇلوۆ. ەندىگى كەزەكتە ءاربىر تۇرعىن كوشەدەگى سۋ جەلىسىنە قوسىلۋى قاجەت.

جامبىل وبلىسى

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز