ستاتيستيكالىق مالىمەتتەرگە سۇيەنەتىن بولساق, تۇراقتى بىرىنشىلىكتەگى ەڭ ناتيجەلى باسەكە قازاقستاننىڭ «بارىسى» مەن حاباروۆسكىنىڭ «امۋر» كوماندالارى اراسىندا وتەدى ەكەن. بۇگىنگە دەيىن ەكى كوماندا مۇزايدىندا 40-تان اسا كەزدەسۋ وتكىزسە, ءار ويىندا كەمىندە ءۇش شايبا سوعىلعان. ۇزاققا بارماي-اق, ەكى ۇجىم اراسىنداعى كەيىنگى ەكى ماتچتىڭ ەسەبىن الار بولساق, حوككەيشىلەر 4 قاڭتاردا وتكەن العاشقى ويىندا – 9, 6 قاڭتارداعى باسەكەدە 6 شايبا سوققان بولاتىن. مىنە, كۇنى كەشە ەلورداداعى ماتچتا كورەرمەندەر 5 گولدىڭ كۋاسى بولدى.
كەزدەسۋدىڭ ءبىرىنشى بولىگىندە ايدىن يەلەرى ەكى شايبا سوعىپ, ۇزىلىسكە كوتەرىڭكى كوڭىل كۇيدە شىقتى. «بارىستىڭ» ەكى گولىن دا نيكيتا ميحايليس سالدى. قازاقستاندىق شابۋىلشى 22-مينۋتتا ەسەپ اشسا, 27-مينۋتتا ءدۋبلدىڭ اۆتورى اتاندى. الايدا جەرلەستەرىمىز ەكىنشى كەزەڭدى ءساتسىز باستادى. ويىنداعى باسىمدىقتى ءوز قولىنا العان «امۋر» حوككەيشىسى دميتري لۋگين (37-مينۋت) ەسەپ ايىرماسىن قىسقارتسا, ءۇشىنشى 20 مينۋتتا سەرگەي تەرەششەنكو (46-مينۋت) تارازى باسىن تەڭەستىرىپ كەتتى. ارادا ەكى مينۋت وتكەندە نيكيتا ميحايليس كەزدەسۋدەگى ءۇشىنشى شايباسىن سوعىپ, باسەكەنىڭ نۇكتەسىن قويدى. قورىتىندى ەسەپ – 3:2.
