ۇيىرمەگە داۋىس ەرەكشەلىگىنە قاراي ىرىكتەلگەن 7 مەن 14 جاس ارالىعىنداعى مەكتەپ وقۋشىلارىنىڭ قاتىسۋىنا بولادى. مۋزىكاعا تالابى بار جاستاردى حور ونەرىنە باۋلۋ ماقساتىندا جوسپارلانعان بىرەگەي جوبادا ورتالىق ازياداعى العاشقى جانە ەڭ ءىرى حور ۇجىمى سانالاتىن ب.بايقاداموۆ اتىنداعى مەملەكەتتىك حور كاپەللاسىنىڭ بىلىكتى ماماندارى ءتالىم بەرمەك. كاسىبي مۋزىكانتتار حالىق اندەرىن ۇيرەتۋمەن قاتار, حور جانرىنىڭ قىر-سىرىمەن جان-جاقتى تانىستىرۋ ارقىلى جاستاردىڭ مادەنيەت پەن ونەرگە دەگەن ىنتاسىن وياتىپ, ولاردىڭ رۋحاني دامۋىنا ىقپال ەتۋدى كوزدەيتىندەرىن ايتادى.
– مەملەكەت باسشىسى قاسىم-جومارت توقاەۆ ءوز جولداۋىندا: «وسكەلەڭ ۇرپاقتىڭ سپورتتىق جانە شىعارماشىلىق الەۋەتىنە اسا نازار اۋدارۋ قاجەت. «بالالار ۇيىرمەسى» قىزمەتىن قايتا قالپىنا كەلتىرگەن ءجون. وندا جاستارىمىز قولونەردىڭ جانە شىعارماشىلىقتىڭ باستاپقى نەگىزدەرىمەن تانىسار ەدى. بالالار ءۇشىن قاتەرلى بۇگىنگىدەي اۋمالى-توكپەلى زاماندا ولاردىڭ كۇش-جىگەرى مەن قىزىعۋشىلىعىن دۇرىس ارناعا باعىتتاۋ اسا ماڭىزدى» دەپ ەل ەرتەڭى سانالاتىن وسكىندەردى ونەرگە باۋلۋدىڭ ارناسىن كەڭىتۋدى تاپسىرعان ەدى. ىرگەلى ونەر ۇجىمى رەتىندە جاستاردىڭ شىعارماشىلىق الەۋەتىن دامىتىپ, كاسىبي ءبىلىم الۋىنا نەگىز بولعىمىز كەلدى. ۇيىرمەنى ۇيىمداستىرۋداعى ماقساتىمىز وسى, – دەيدى جامبىل اتىنداعى قازاق مەملەكەتتىك فيلارمونياسىنىڭ ديرەكتورى تاير قاراتاەۆ.
الداعى كۇندەرى ب.بايقاداموۆ اتىنداعى مەملەكەتتىك حور كاپەللاسىنىڭ باس ديريجەرى ءارى كوركەمدىك جەتەكشىسى, قازاقستاننىڭ ەڭبەك سىڭىرگەن قايراتكەرى بەيىمبەت دەمەۋوۆ ۇيىرمەگە قاتىسۋعا ءوتىنىش بىلدىرگەن جاسوسپىرىمدەر اراسىندا تىڭداۋ وتكىزىپ, تاڭداۋ جاسايتىن بولادى. سونىمەن قاتار اتالعان ۇيىرمەدە ارنايى دايىندىقتان وتكەن دارىندى بالالاردى ىرىكتەپ, ولاردىڭ قاتىسۋىمەن كەلەشەكتە فيلارمونيانىڭ ۇلكەن ساحناسىندا كونتسەرت قويۋ جوسپارى قاراستىرىلعان.
بۇكىلوداقتىق بايقاۋدىڭ لاۋرەاتى اتانعان مەملەكەتتىك حور كاپەللانىڭ رەپەرتۋارىنا حورعا وڭدەلىپ تۇسىرىلگەن حالىق اندەرى, سونداي-اق شىعارمالاردىڭ ءىرى تۇرلەرى – سيۋيتا, پوەما, كانتاتا جانە وراتوريالار ەنگەن. شىعارماشىلىق الەۋەتى باي ۇجىمنىڭ كاسىبي ورىنداۋ شەبەرلىگى جاس تالاپكەرلەردى قاناتتاندىراتىنى ءسوزسىز.
الماتى
