قوعام • 18 قاڭتار، 2021

الەۋمەتتىك وسال توپتاردان شىققان بالالارعا قانداي كومەك كورسەتىلەدى؟

86 رەت كورسەتىلدى

جاسوسپىرىمدەر ماسەلەسى - قوعامدا كەڭ تالقىعا تۇسەتىن تاقىرىپتاردىڭ ءبىرى. بالانىڭ تۇلعا رەتىندە قالىپتاسۋىندا اينالاداعىلاردان كەلەتىن كومەكتىڭ ورنى بولەك. ومىردەن ءوزىن ىزدەگەن ءجاسوسپىرىمنىڭ جامان جولعا تۇسپەي، دۇرىس تاڭداۋ جاساۋى وتە ماڭىزدى. اتىراۋلىق «اتامۇرا» قوعامدىق قورى وسى باعىتتا جۇمىس ىستەيدى، دەپ حابارلايدى Egemen.kz.

2013 جىلدان باستاپ جۇمىس ىستەيتىن ۇيىمنىڭ جەتەكشىسىن جاسوسپىرىمدەرگە قولداۋ كورسەتۋ ماسەلەسى قاتتى مازالايتىن. وسى باعىتتا ءبىراز جوبالار جۇزەگە اسىرىپ ۇلگەرگەن ۇيىم، ءبىراز تاجىريبە جيناقتاعان.

«مەن جۋرناليستيكا سالاسىندا جۇمىس ىستەدىم. سونىڭ ارقاسىندا كۇندەلىكتى ءتۇرلى تاعدىرلار مەن جاعدايلاردى كەزىكتىردىم. سونداعى تۇيگەن ويلارىمنىڭ ءبىرى – از قامتىلعان، كوپبالالى وتباسىلاردىڭ بالالارىنىڭ جانە جەتىم بالالاردىڭ قابىلەتتىلىكتەرى مەن بىلىمگە قۇشتارلىقتارى ۇلكەن. وكىنىشكە قاراي، ولاردى ودان ءارى دامىتۋعا كوپشىلىگىنىڭ مۇمكىندىكتەرى جوق. ويتكەنى، ۇيىرمەلەرگە قاتىسىپ، قوسىمشا ساباقتار الۋ ءۇشىن قاراجات كەرەك ەكەنى بەلگىلى»، - دەپ ءبولىستى قور باسشىسى اعيبا قاتەشوۆا.

اعيبا الەۋمەتتىك وسال توپتاردان شىققان جانە جەتىم بالالارعا ارنالعان تەگىن ءبىلىم بەرەتىن مەكتەپ نەمەسە ورتالىق اشۋدى ارماندايتىن. ارمان ونى اداستىرمادى. وسىلايشا 2019 جىلدىڭ جازىندا «Samruk-Kazyna Trust» الەۋمەتتىك جوبالاردى دامىتۋ قورى ۇيىمداستىرعان «ارەكەت» گرانتتار بايقاۋىنا تاپ بولدى. بايقاۋدىڭ باستاپقى دەڭگەيلەرىنەن ءساتتى ءوتىپ، فيناليستەر تىزىمىنە ىلىكتى.

بايقاۋعا ۇسىنىلعان «زەرگەر ءسوز» جوباسىنىڭ ماقساتى - بالالارعا قوسىمشا ءبىلىم بەرەتىن ورتالىق اشىپ، وندا اتالعان ساناتتاعى بالالاردى تەگىن وقىتۋ. وسى ارقىلى جاسوسپىرىمدەردىڭ قىزىعۋشىلىقتارىن قولداپ، بولاشاققا دەگەن سەنىمدەرىن ارتتىرۋ بولاتىن. جوبا ءوزىنىڭ وزەكتىلىگىن دالەلدەپ، 2 800 000 تگ كولەمىندەگى گرانتقا يە بولدى.

بايقاۋ اياقتالىسىمەن قور قىزمەتكەرلەرى ءوز ىستەرىن باستاپ كەتتى، ورتالىق جۇمىس جاسايتىن ورىن جالعا الىنىپ، ماماندار وقۋدان ءوتتى. بالالاردىڭ ساپالى ءبىلىم الۋى ءۇشىن كەرەكتى قۇرال-جابدىقتار ساتىپ الىندى. اتىراۋ قالاسىندا اشىلعان ورتالىقتا بالالار كەلەسى باعىتتار بويىنشا ءبىلىم الدى: شەشەندىك ونەر، قازاق ءتىلى، پسيحو-ەموتسيونالدىق جاعدايدى جاقسارتۋ بويىنشا ساباقتار. جوبا اياسىندا وبلىستىڭ 107 ءجاسوسپىرىمى كومەكپەن قامتىلدى.

«بالام ويىن تەز جەتكىزەمىن دەپ اسىعىپ سويلەيتىن. سوندىقتان ول كوپ سوزدەردى انىق ايتا المايتىن، تىڭداۋشى ونى دۇرىس تۇسىنبەيتىن. ورتالىققا كەلگەننەن كەيىن 1 ايدىڭ ىشىندە ونىڭ سويلەۋ قابىلەتى جەتىلدى. ۇستازدارى اليحانمەن كوپ جۇمىس ىستەدى. قازىر ول ءاربىر ءسوزىن نىق ايتىپ، ءوزىن سەنىمدى ۇستايدى»، - دەيدى جوباعا قاتىسقان اليحاننىڭ اناسى.

جوبا باستاماشىلارىنىڭ ايتۋى بويىنشا قازاقتىلدى ورتادا وسكەن بالالاردىڭ كوبى جاسقانشاق ءارى ۇياڭ مىنەزدى بولىپ كەلەدى. ال «زەرگەر ءسوز» جوباسىنىڭ الدىنا قويعان مىندەتى - وسى بالالاردىڭ جان-جاعىنان سەسكەنبەي، اشىلىپ، وزدەرىنە دەگەن سەنىمدىلىكتەرىن ارتتىرۋى. جوبا اياسىندا جۇمىس جاسايتىن ورتالىق قازاق تىلىندە ءبىلىم بەرەدى، مەملەكەتتىك تىلگە دەگەن قىزىعۋشىلىق ورىس مەكتەپتەرىنىڭ قاتىسۋشىلارىندا دا بار.

سونىمەن قاتار وبلىستىڭ بالالار ۇيلەرىنىڭ قاتىسۋشىلارىنا دا جوبا اياسىندا قولداۋ كورسەتىلدى. اتاپ ايتقاندا پسيحو-ەموتسيونالدىق كۇيزەلىستىڭ الدىن الۋ باعىتىنداعى جۇمىستار وتە ناتيجەلى بولدى. پسيحولوگيالىق ترەنينگتەر، شەبەرلىك ساباقتارى، كەزدەسۋلەر بالالارعا وڭ اسەرىن بەردى. بارلىق ساباقتاردى كاسىبي پەداگوگتار مەن جوعارى كاتەگوريالى پسيحولوگتار جۇرگىزدى.

«پاندەميا ۋاقىتىندا جۇمىسىمىز ءبىرشاما شەكتەلدى. جوسپارلارىمىز وزگەردى. دەگەنمەن ورتالىققا كەلگەن قاتىسۋشىلارمەن ساپالى جۇمىس جۇرگىزىلدى. بالالار جەتكەن جەتىستىكتەر – ءبىزدىڭ جەتىستىگىمىز»، - دەيدى اعيبا قاتەشوۆا.

جاسوسپىرىمدەر ابايدىڭ 175 جىلدىعىنا ارنالعان چەللەندجدە بەلسەندى قاتىستى. ايماقتا ۇيىمداستىرىلعان «مەن باقىتتى بالامىن» جاس سۋرەتشىلەر بايقاۋىندا دا وزدەرىنىڭ تالانتتارىن كورسەتىپ، جۇلدەلى ورىنداردى يەمدەندى. كوركەم ءسوز وقۋدان وتكەن جارىستا  بالالار وزدەرىنىڭ انا تىلدەرىن تولىق مەڭگەرگەن، جاسقانبايتىن، باتىل ەكەندىكتەرىن كورسەتە ءبىلدى.

«اتامۇرا» ۇجىمىنىڭ ايتۋىنشا «Samruk-Kazyna Trust» قورى جۇزەگە اسىراتىن «ارەكەت» جوباسى ولارعا تەك قارجىلاي كومەك كورسەتكەن جوق. بايقاۋ اياسىندا وتكەن وقۋدان الەۋمەتتىك كاسىپكەرگە قاجەتتى ءبىلىمدى يگەرۋگە مۇمكىندىك بولدى. ەندى قاتىسۋشىلاردىڭ ارقايسىسىندا ەلدىڭ ءار ايماعىندا جۇمىس جاسايتىن پىكىرلەس ۇيىمدارى بار. ولاردى ماقساتى ءبىر – الەۋمەتتىك ماسەلەلەردى قولدان كەلگەنشە شەشۋ.

سوڭعى جاڭالىقتار

قازاقستاندا جاڭا كەن ورنى تابىلدى

ەكونوميكا • بۇگىن، 16:21

ەڭ سۇلۋ ۆولەيبولشى كىم؟

سپورت • بۇگىن، 16:15

ەل قورعاعان ەردىڭ ەسىمى جاڭعىردى

رۋحانيات • بۇگىن، 14:49

كورشىنىڭ كوپ-كورىم كومەگى

قوعام • بۇگىن، 14:23

ۇقساس جاڭالىقتار