قازاقستان بىلتىردان بەرى ساياسي مودەرنيزاتسياعا بەت الدى. سول جوسپار اياسىندا ساياسي رەفورمالاردىڭ ءبىرىنشى پاكەتى قابىلدانعان-دى. ماسەلەن, ساياسي پارتيالار, سايلاۋ, ميتينگ تۋرالى زاڭدارعا وزگەرىستەر ەنگىزىلدى. ناتيجەسىندە, قازىر ساياسي پارتيالاردىڭ تىركەلۋى ءۇشىن 50 پايىزعا دەيىن ادام سانى ازايىپ 20 مىڭ بولدى. 2021 جىلدان باستاپ اۋىل اكىمدەرىن تىكەلەي سايلاۋ ءۇردىسى باستالادى. پرەزيدەنت ءوز سوزىندە ساياسي رەفورمالاردىڭ كەزەكتى پاكەتى جۇزەگە اسىرىلاتىنىن جاريالادى. ماسەلەن, پارتيالاردىڭ ماجىلىسكە ءوتۋ شەگىن 7 پايىزدان 5 پايىزعا دەيىن تومەندەتۋ ۇسىنىسى ايتىلدى. بۇل ۇسىنىستىڭ كوپ پارتيالىقتى دامىتۋعا ىقپال ەتەتىنى انىق. سەبەبى قازىر الەمدىك نورمالارعا, حالىقارالىق تاجىريبەگە سايكەس ساياسي پارتيالاردىڭ قوعامدىق ومىرگە قاتىسۋىنا العىشارتتار جاسالدى. سونىڭ نەگىزى رەتىندە قازاقستاندا كەزەكتى ساياسي رەفورمالاردا جاڭا زاڭنامالىق شارالاردى قابىلداۋ قاراستىرىلىپ وتىر.
سونىمەن قاتار جاقىندا وتكەن ءماجىلىس سايلاۋىندا قوعام وكىلدەرى, ۇكىمەتتىك ەمەس ۇيىمدار سايلاۋ ءۇردىسىن دەموكراتيالاندىرۋ باعىتىندا بارلىق دەڭگەيدەگى سايلاۋ بيۋللەتەندەرىندە «قارسى» دەگەن باعان ەنگىزۋدى تالاپ ەتكەن بولاتىن. وسى باعاندى ەنگىزۋ تۋرالى پرەزيدەنت تە اتاپ ءوتتى. بۇل ءوز كەزەگىندە سايلاۋشىلاردىڭ پىكىرى ەسكەرىلەتىنىن اڭعارتتى. سونىمەن قاتار ومبۋدسمەن تۋرالى جەكەلەگەن زاڭنىڭ قابىلدانۋى جانە ونى ينستيتۋتتاندىرۋ تۋرالى ءسوز بولدى. بۇل ازاماتتاردىڭ قۇقىعىن قورعاۋدا باستى العىشارتتاردىڭ ءبىرى بولماق. وسىنداي زاڭنامالاردىڭ ەنگىزىلۋى ساياسي مودەرنيزاتسيانىڭ باستى كورسەتكىشى دەۋگە بولادى. قازىر پارلامەنتتىك وپپوزيتسيا ينستيتۋتى پايدا بولدى. ەندى مىنە ومبۋدسمەن ينستيتۋتىنىڭ پايدا بولۋىنا ارەكەت جاسالدى. بۇگىنگى تاڭدا ەل پرەزيدەنتى قاسىم-جومارت توقاەۆ ساياسي رەفورمالاردىڭ قادام-قادامىمەن جالعاساتىنىن جەتكىزدى. پرەزيدەنت رەفورمالارى شىن مانىندە جۇيەلى ءارى دايەكتى جۇرگىزىلىپ, «حالىق ۇنىنە قۇلاق اساتىن مەملەكەت» تۇجىرىمداماسى ىسكە اسىرىلىپ جاتىر. پرەزيدەنت ءوز شەشىمدەرىندە قوعام پىكىرى ەسكەرىلگەنىن كورسەتتى.
قازبەك مايگەلدينوۆ,
ساياساتتانۋشى
