ەلىمىزدە قولعا الىنعان الەۋمەتتىك-ەكونوميكالىق جانە ساياسي رەفورمالاردىڭ ءارى قاراي جالعاسا بەرەتىنىن ناقتى اتاپ ءوتتى.
پارلامەنت پالاتالارىنىڭ بىرلەسكەن وتىرىسىندا پرەزيدەنتىمىز ساياسي رەفورمالاردىڭ كەزەكتى توپتاماسىن جاريالادى. سوعان سايكەس ساياسي پارتيالاردىڭ ماجىلىسكە ءوتۋ شەگى 7-دەن 5 پايىزعا دەيىن تومەندەتىلەدى. بۇل كوپپارتيالىقتى دامىتۋ جولىنداعى ماڭىزدى قادام ەكەنى ءسوزسىز. ودان بولەك, سايلاۋ بيۋللەتەندەرىنە «بارىنە قارسىمىن» دەگەن جازۋ ەنگىزىلەتىن بولدى جانە اكىمدەردى سايلاۋ اياسىن كەڭەيتۋ ءۇشىن ءتيىستى شارالار قابىلدانادى.
«حالىق ۇنىنە قۇلاق اساتىن مەملەكەت» تۇجىرىمداماسىن ىسكە اسىرۋ ماقساتىمەن ونلاين-پەتيتسيا ينستيتۋتى زاڭ جۇزىندە رەسىمدەلەدى. مۇنداي شارا ازاماتتىق قوعامنىڭ بەلسەندىلىگىن ارتتىراتىنى انىق.
سونىمەن قاتار مەملەكەت باسشىسى ومبۋدسمەن تۋرالى ارناۋلى زاڭ قابىلداۋ قاجەتتىگىن ايتتى. سوت جۇيەسىن رەفورمالاۋ جۇمىستارى دا جالعاسا بەرەدى. مۇنىڭ ءبارى ادام قۇقىعىن قورعاۋ ماسەلەسىن جاڭا دەڭگەيگە كوتەرەتىن ناقتى شارالار ەكەنى ءسوزسىز.
قاسىم-جومارت كەمەل ۇلى الەۋمەتتىك ماسەلەلەرگە دە ايرىقشا نازار اۋداردى. الەۋمەتتىك قامتاماسىز ەتۋ باعىتىنداعى مەملەكەتتىك ساياسات كەشەندى تۇردە جاڭعىرتىلادى. كومەككە مۇقتاج ازاماتتارعا اتاۋلى الەۋمەتتىك قولداۋ كورسەتۋ ءىسى ودان ءارى جاندانا تۇسپەك. سوندىقتان پارلامەنت وسى ورايداعى زاڭنامالاردى جەتىلدىرىپ, تىڭ باستامالاردى تابىستى ىسكە اسىرۋعا قۇقىقتىق قولداۋ كورسەتەدى.
مەملەكەت باسشىسى دەنساۋلىق ساقتاۋ سالاسىن ودان ءارى دامىتۋ قاجەت ەكەنىن دە اتاپ ءوتتى. بۇل رەتتە ەمدەلۋشىلەردىڭ مۇددەسى جانە ولاردىڭ دەنساۋلىعى باستى نازاردا بولۋعا ءتيىس. سول سەبەپتى الداعى ۋاقىتتا بۇل باعىتتا اۋقىمدى جۇمىس قولعا الىنادى. جاستاردى قولداۋ, ءبىلىم بەرۋ ءىسىن جەتىلدىرۋ, مامان دايارلاۋ جانە باسقا دا سالالار بويىنشا ءتيىستى جوبالار ازىرلەنىپ, جۇزەگە اسىرىلادى.
جالپى, بۇگىن جاريالانعان باستامالار پرەزيدەنتىمىزدىڭ بۇعان دەيىن قولعا العان بارلىق سالاداعى جۇيەلى جاڭعىرتۋلارىنىڭ لايىقتى جالعاسى ەكەنى انىق. بۇل شارالار ساياسي جۇيەمىزدى ودان ءارى دامىتۋعا, شەشىم قابىلداۋ ۇدەرىسىنە ازاماتتاردىڭ كوپتەپ قاتىسۋىنا جاعداي جاساۋعا جانە قازاقستاندىقتاردىڭ ءومىر ءسۇرۋ ساپاسىن ارتتىرۋعا ارنالعان.
وسى رەتتە سەنات اتالعان باستامالاردى ناتيجەلى ىسكە اسىرۋ جۇمىستارىن زاڭنامالىق تۇرعىدان قامتاماسىز ەتۋگە دايىن ەكەنىن ەرەكشە اتاپ وتكىم كەلەدى. سوندىقتان سەناتورلار ەگەمەن ەلىمىزدىڭ ءوسىپ-وركەندەۋىنە قاجەتتى زاڭداردى دايىنداۋ, تالقىلاۋ جانە قابىلداۋ بارىسىندا جاڭادان سايلانعان ءماجىلىس دەپۋتاتتارىمەن بىرلەسىپ جۇمىس ىستەيتىن بولادى.
