وعان قوسا, ءوسىپ كەلە جاتقان جەتكىنشەكتەردىڭ دەنساۋلىعىن زەرتتەۋمەن دەندەپ اينالىساتىن دۇنيەجۇزىلىك بالالار قورى جەتكىنشەكتەردى دۇرىس تاماقتاندىرۋعا بايلانىستى پايىمدارىن دايەكتەي ءتۇستى.
ۇيىم ساراپشىلارىنىڭ پىكىرىنشە, بالانىڭ دەنساۋلىعى دۇرىس بولۋى ءۇشىن نارەستەنى تۋعاننان باستاپ 6 ايعا دەيىن مىندەتتى تۇردە ەمىزۋ قاجەت.
ويتكەنى, انا سۇتىمەن ءوسىرۋ 5 جاسقا دەيىنگى بالالاردىڭ ءولىم-ءجىتىمىن تومەندەتۋگە ءبىرىنشى كەزەكتە سەپتەسە الادى. ومىراۋ ءسۇتىنىڭ قۇنارىن ەشتەڭە الماستىرا المايدى. جۇقپالى اۋرۋلار ءولىمى بەلەڭ العان ەلدەردە ەمشەك ەمىزۋ ايتارلىقتاي ناسيحات پەن قورعاۋدى قامتاماسىز ەتەدى. ءتىپتى انا ءسۇتى دامىعان ەلدەردە دە نەكروتيكالىق ەنتەروكوليت, نارەستەلەردىڭ كەنەتتەن قايتىس بولۋ سيندرومىنان بولاتىن شەتىنەۋدى ازايتادى.
ۋىزىنا جارىپ وسكەن بالا اقىل-ەسى جوعارى تىرشىلىك يەسى رەتىندە ادام كاپيتالىن ارتتىرىپ, ارتىق سالماق پەن سەمىزدىك, قانت ديابەتى جانە بالالارداعى لەيكەميا كەسەلدەرىن كەمىتە الادى. سونىمەن قاتار ايەلدەر اراسىندا ءسۇت بەزى مەن انالىق بەزدىڭ قاتەرلى ىسىگى, قانت ديابەتى قاۋپىن ازايتادى.
ەكى جاستان كەيىن اتا-انالار بالانىڭ ازىق-ت ۇلىكتىڭ ساپاسى مەن الۋان تۇرلىلىگى بويىنشا تولىق تاماقتانۋ راتسيونىن, سونداي-اق جەتكىلىكتى مولشەردە جانە تاماقتانۋ جيىلىگىن قامتاماسىز ەتۋى كەرەك.
ماسەلەن, 2016 جىلى ۇلتتىق ەكونوميكا مينيسترلىگى ەمىزۋلى جاستاعى بالالاردىڭ تاماقتانۋىنا زەرتتەۋ جۇرگىزىپ, ونىڭ ناتيجەسىندە سابيلەردىڭ 38 پايىزى عانا التى ايعا دەيىن ەمگەنىن العا تارتقانى ەسىمىزدە.
سونىمەن بىرگە, سابيلەردىڭ ۇشتەن ءبىرى (33%) ا دارۋمەنى, تەمىر جانە مىرىش سياقتى ماڭىزدى دارۋمەندەردى دەر كەزىندە المايتىنى, ۋاقتىلى تاماقتانبايتىنى بەلگىلى بولعان. سونداي-اق تاماقتانۋ ناتيجەسىندە 5 جاسقا دەيىنگى 168 مىڭ بالانىڭ بويى دۇرىس وسپەي جاتقانى انىقتالىپتى.
سوندىقتان اناسىن ەمەتىن بالالاردىڭ سانىن ارتتىرۋ ءۇشىن قازاقستاننىڭ ايەلدەرى كۇشتەرىنىڭ اليانسى مەملەكەتتىك تەلەارنالاردا, راديودا جانە ينتەرنەت-پورتالداردا ەمشەك ەمىزۋدى قولداۋ ءۇشىن بەلسەندى ءتۇسىندىرۋ جۇمىستارىن جۇرگىزۋدى ۇسىنىپ وتىر.
«بۇگىندە بالالار تاعامى مەن ەمشەك ءسۇتىن الماستىراتىن باسقا دا ازىقتاردىڭ ماركەتينگىن رەتتەۋ شارالارىن قابىلداۋ قاجەت, بارلىق ساۋدا ورتالىقتارىندا, سونداي-اق, كوپشىلىك ورىنداردا بالانى تاماقتاندىرۋعا ارنالعان وڭاشا بولمەلەر ۇيىمداستىرۋ قاجەت», دەيدى قازاقستاننىڭ ايەلدەر كۇشتەرى اليانسى باسشىسىنىڭ ورىنباسارى ازيزا شۋجەەۆا.
انا ورتالىقتارىندا جانە بارلىق ەمحانادا ەمشەك سۇتىمەن ەمىزۋدىڭ 10 قادامىن جۇزەگە اسىرۋ جاڭا تۋعان نارەستەلەردى ەمشەك سۇتىمەن قامتاماسىز ەتۋگە مۇمكىندىك بەرەدى.
ايەلدەر كۇشتەرى اليانسىنىڭ ساراپشىلارى اكەلەردى دە بۇل باستامادان قالىس قالماي, پەرزەنتى دۇنيەگە كەلگەننەن باستاپ دۇرىس تاماقتانۋىن قاداعالاۋعا جانە 6 ايعا دەيىن تەك ەمشەك سۇتىمەن قامتاماسىز ەتۋگە ەرەكشە نازار اۋدارۋعا شاقىرادى.
سەبەبى – جالقى. بالا تۋعاننان كەيىنگى العاشقى ءۇش جىلدا اناعا اكەسىنىڭ كومەگى مەن قولداۋى باعا جەتپەس مانگە يە.
الماتى
