«اقتوبە حالىقارالىق اۋەجايى» اكتسيونەرلىك قوعامىنا ءاليا مولداعۇلوۆانىڭ ەسىمىن بەرۋ تۋرالى قاۋلىعا پرەمەر-مينيستر اسقار مامين قول قويدى. قاۋلى «قازاقستان رەسپۋبليكاسىنىڭ اۋماعىنداعى اۋەجايلارعا, پورتتارعا, تەمىرجول ۆوكزالدارىنا, تەمىرجول ستانسالارىنا, مەتروپوليتەن ستانسالارىنا, اۆتوۆوكزالدارعا, اۆتوستانسالارعا, فيزيكالىق-گەوگرافيالىق جانە مەملەكەت مەنشىگىندەگى باسقا دا وبەكتىلەرگە اتاۋ بەرۋ, سونداي-اق ولاردى قايتا اتاۋ, ولاردىڭ اتاۋلارىنىڭ ترانسكريپتسياسىن ناقتىلاۋ مەن وزگەرتۋ جانە مەملەكەتتىك زاڭدى تۇلعالارعا, مەملەكەت قاتىساتىن زاڭدى تۇلعالارعا جەكە ادامداردىڭ ەسىمىن بەرۋ قاعيدالارىن بەكىتۋ تۋرالى» قازاقستان رەسپۋبليكاسى ۇكىمەتىنىڭ 1996 جىلعى 5 ناۋرىزداعى №281 قاۋلىسىنا سايكەس شىعارىلدى. «بىرنەشە اي بۇرىن ۇكىمەتكە ۇسىنىس جىبەرىلگەن بولاتىن. ۇسىنىسىمىز قولداۋ تاپتى. ەندى ءاليا مولداعۇلوۆا اتىنداعى اۋەجاي جازباسى ىلىنەدى. بۇل جۇمىس ءبىر اي ىشىندە اتقارىلادى», دەدى اۋەجاي ديرەكتورىنىڭ ورىنباسارى ءىلياس نۇعمانوۆ.
اقتوبە اۋەجايىنان كۇنىنە 8 رەيس ۇشادى. الماتى, نۇر-سۇلتان, اتىراۋ مەن ماڭعىستاۋ باعىتى بويىنشا ىشكى رەيس, ايىنا ءبىر رەت مىسىرعا رەيس قاراستىرىلعان. ايتا كەتەيىك, ءاليا مولداعۇلوۆا اقتوبە وبلىسى, قوبدا اۋدانى, بۇلاق اۋىلىندا سارقۇلوۆ نۇرمۇحاممەد پەن مولداعۇلوۆا مارجاننىڭ وتباسىندا 1925 جىلدىڭ 15 ماۋسىمىندا دۇنيەگە كەلگەن. قازىر تۋعان اۋىلىندا ءاليانىڭ تۇرعان ءۇيىنىڭ ورنى مەن ەسكەرتكىشى ءھام مۋزەيى بار.
