ءىس-شارا قاتىسۋشىلارى سايلاۋ قورىتىندىلارىمەن, سونداي-اق سايلاۋ ناۋقانى جانە قازاقستانداعى داۋىس بەرۋ ۇدەرىسى تۋرالى اقپاراتپەن تانىستىرىلدى.
جاپون ساراپشىلارى 2021 جىلى جاپونيادا پارلامەنتتىك سايلاۋ وتكىزۋ كۇتىلەتىنىن ەسكەرە وتىرىپ, COVID-19 ىندەتى جاعدايىندا وتكەن قازاقستانداعى سايلاۋدى مۇقيات قاداعالاعانىن اتاپ ءوتتى.
قازاقستاندى زەرتتەۋ جونىندەگى ساراپشىلار قوعامىنىڭ توراعاسى, «ريتسۋمەيكان» ۋنيۆەرسيتەتىنىڭ قۇرمەتتى پروفەسسورى كەي كاراساۆا قازاقستانداعى دەموكراتيالىق رەفورمالاردىڭ قارقىنىن جوعارى باعالاپ, جالپى سايلاۋدىڭ تابىستى وتۋىمەن قۇتتىقتادى.
ورتالىق ازيا ەلدەرى بويىنشا ساراپشى كاە ياناگيساۆا ساياسي پارتيالار كانديداتتارى تىزىمىندە ايەلدەر مەن جاستار ءۇشىن 30 پايىزدىق كۆوتا ەنگىزۋ بويىنشا قازاقستاننىڭ تاجىريبەسىنە قىزىعۋشىلىق تانىتىپ, وسى تاقىرىپتىڭ جاپون قوعامى ءۇشىن وزەكتىلىگىن اتاپ ءوتتى.
جاپوندىق ساراپشىلاردىڭ پىكىرىنشە, ۇلتتىق قوعامدىق سەنىم كەڭەسىنىڭ قىزمەتى قازاقستانداعى ساياسي تۇراقتىلىقتى قامتاماسىز ەتۋدە ماڭىزدى ءرول اتقارادى.
