2020 جىلى وڭىردە قۇرىلىس جۇمىستارى جاڭا قارقىن الدى. 1000-نان استام كوپبالالى جانە از قامتىلعان وتباسى قونىس تويىن تويلادى. بۇل تۇرعىداعى جۇمىستار وسىمەن توقتاپ قالماي بيىل دا جالعاسىن تاپپاق.
دانيال احمەتوۆتىڭ ايتۋىنشا, بارلىق قارجىلاندىرۋ كوزدەرى ەسەبىنەن 912,5 مىڭ شارشى مەتر تۇرعىن ءۇي سالۋ جوسپارلانىپ وتىر. ونىڭ ىشىندە جەكە ينۆەستورلاردىڭ قاراجاتىنا كوپبالالى جانە از قامتىلعان وتباسىلارعا ارنالعان 1143 پاتەرلىك 759 بىرقاباتتى ءۇي سالىنادى.
«بارلىق جۇمىستار ۋاقىتىلى جانە ساپالى ورىندالۋى قاجەت. اكىمدەر ۇيلەردىڭ اۋماعىن اباتتاندىرۋدى بەكىتىلگەن كەستە بويىنشا جۇرگىزۋى ءتيىس. سونداي-اق قۇرىلىس كومپانيالارىنىڭ باسەكەلەستىك ورتادا جۇمىس ىستەۋىنە جاعداي جاساۋ كەرەك. ەگەر اۋداندار جەكە ينۆەستورلار ەسەبىنەن نەسيەلىك تۇرعىن ءۇي سالۋدى قولعا السا, وندا ولارعا الەۋمەتتىك تۇرعىن ءۇي سالۋ جوسپارىنان كوبىرەك كۆوتا بەرىلەدى», دەدى ايماق باسشىسى.
بيىل توعىز الەۋمەتتىك-مادەني نىساننىڭ قۇرىلىسى جالعاسادى. اتاپ ايتقاندا, سەمەي قالاسى ستەپنوي كەنتىندەگى 300 ورىندىق مەكتەپ, قاينار, بوزانباي, تاۆريا, مارقاكول, اقسۋات اۋىلدارى مەن سەرەبريانسك قالاسىندا سپورتتىق-ساۋىقتىرۋ كەشەنى سالىنادى.
سونداي-اق باسسەينى بار وسىنداي كەشەن بورودۋليحا اۋدانىندا دا بوي كوتەرەدى. ال كوكپەكتى اۋدانى سامار اۋىلى مەن اياگوز قالاسىندا باسسەين, وسكەمەندە 244 ورىندىق 9 قاباتتى جاتاقحانا سالىنۋدا.
