قوعام • 12 قاڭتار، 2021

قازاقستاندىقتار نەسيەنى ءجيى الا باستادى

113 رەت كورسەتىلدى

ۇلتتىق بانك دەرەگىنە سۇيەنسەك، 2020 جىلدىڭ 1 جەلتوقسانىنداعى جاعداي بويىنشا ەلىمىزدەگى قارجى ينستيتۋتتارى 14،6 ترلن تەڭگەگە نەسيە راسىمدەگەن، دەپ حابارلايدى Egemen.kz

2019 جىلدىڭ ءدال سول ۋاقىتىنداعى راسىمدەلگەن نەسيە كولەمى 13،6 ترلن تەڭگەنى قۇراعان بولاتىن.

وسىلايشا، بەرىلگەن نەسيە كولەمى 1 ترلن تەڭگەگە دەيىن، پايىزعا شاققاندا 7،1 پايىزعا وسكەن. ونىڭ ىشىندە زاڭدى تۇلعالار 7،28 ترلن تەڭگە السا ء(بىر جىلدا 2،4 پايىزعا كوپ)، جەكە تۇلعالار (جەكە كاسىپكەرلەردى قوسا ەسەپتەگەندە) 7،36 ترلن تەڭگە ء(بىر جىلدا 12،3 پايىزعا كوپ) نەسيە راسىمدەپتى.

وڭىرلەر بولىنىسىنە كەلەر بولساق، ەڭ كوپ نەسيە العان ايماقتار كوشىن الماتى باستايدى. ەلىمىزدەگى ەڭ ءىرى قارجىلىق ورتالىق تۇرعىندارى 6،8 ترلن تەڭگە نەسيە العان. ودان كەيىن نۇر-سۇلتان قالاسى (1،9 ترلن تەڭگە) جانە قاراعاندى وبلىسى (740،1 ملرد تەڭگە) تۇر. ال شىمكەنت 641،4 ملرد، شقو 628،8 ملرد، اتىراۋ وبلىسى 489،6 ملرد، اقتوبە وبلىسى 449،4 ملرد، ماڭعىستاۋ وبلىسى 418،7 ملرد، پاۆلودار وبلىسى 414 ملرد، قوستاناي وبلىسى 364،4 ملرد، بقو 342،2 ملرد، الماتى وبلىسى 308،5 ملرد تەڭگە نەسيە العان.

نەسيە الۋعا دەگەن قۇلشىنىسى تومەن ايماق رەتىندە قىزىلوردا وبلىسىن اتاۋعا بولادى. سىر ءوڭىرى 287،8 ملرد تەڭگەگە زايم العان. ارينە، ودان دا تومەن وڭىرلەر بار. ماسەلەن، جامبىل وبلىسى 277،3 ملرد، اقمولا وبلىسى 239،4 ملرد، سقو 183 ملرد جانە تۇركىستان وبلىسى 129 ملرد تەڭگە كورسەتكىشىمەن سوڭعى ورىندارعا جايعاسقان.

نەسيەنى الۋ بار دا قايتارۋ بار. Finprom.kz دەرەگى بويىنشا، ەكىنشى دەڭگەيلى بانكتەردىڭ قارىز پورتفەلى 15،41 ترلن تەڭگەگە دەيىن ۇلعايعان. وڭ جاعدايداعى وسىمگە بارلىق بانكتەر قول جەتكىزە الماعان. تەك 26 بانكتىڭ 15-ءىنىڭ عانا حال-احۋالى جاقسى. ولاردىڭ كوشىن Halyk Bank باستاپ تۇر. ال قايتارىلماۋ مەرزىمى 90 كۇننەن اسىپ كەتكەن (NPL 90+) نەسيە كولەمى 2020 جىلدىڭ باسىنان بەرى 48،5 ملرد تەڭگەگە كوبەيىپ، 1،25 ترلن تەڭگەگە جەتكەن. نەسيەلىك پورتفەلىن ۇلعايتقان 15 بانكتىڭ تەك بەسەۋى عانا NPL 90+ دەڭگەيىن تومەندەتە العان.

سوڭعى جاڭالىقتار

مۇحتار مەن قايىم

قازاقستان • كەشە

ەلدە قىلمىس ازايعان

قوعام • كەشە

اقاڭ جانە قازاق راديوcى

احمەت بايتۇرسىن ۇلى • كەشە

رۋحتى جىردىڭ يەسى

ادەبيەت • كەشە

ۇقساس جاڭالىقتار