سولتۇستىك قازاقستان وبلىسى اكىمىنىڭ ءبىرىنشى ورىنباسارى جانبولات سمايىلوۆتىڭ توتەنشە جاعدايلار ءمينيسترىنىڭ ورىنباسارى بولىپ تاعايىندالۋىنا وراي ونىڭ ورنىن وبلىس اكىمىنىڭ ورىنباسارى قىزمەتىن اتقارىپ كەلگەن سامات ەسكەندىروۆ باستى. م. جۇماباەۆ اۋدانىنىڭ اكىمى ايداربەك ساپاروۆ وبلىس اكىمىنىڭ اۋىل شارۋاشىلىعى ماسەلەلەرى جونىندەگى ورىنباسارى بولىپ بەكىتىلدى. ەسىل اۋدانىنىڭ اكىمى ۆلاديمير بۋبەنكو اقىن اتىنداعى اۋدانعا جەتەكشىلىك ەتەتىن بولدى. پرەمەر-مينيستر كەڭسەسىندە ۇيىمداستىرۋ جۇمىسى جانە اۋماقتىق دامۋ ءبولىمىنىڭ باس ينسپەكتورى بولعان اسقار بەگمانوۆ ەسىل اۋدانىنا اكىم بولىپ جىبەرىلدى.
ءومىر ەسقالي, سولتۇستىك قازاقستان وبلىسى.
“ارداگەر” ۇگىت پويىزى جول ۇستىندە.ء وندىرىستى وڭىردە بۇل كۇندە جەڭىستىڭ 65 جىلدىعىنا ارنالعان شارالار كوپ. سونىڭ ءبىرى “ارداگەر” وبلىستىق اكتسياسى باستاۋ الدى. قاراعاندىداعى “ماڭگىلىك الاۋ” ەسكەرتكىشى الدىنا جينالعان سوعىس ارداگەرلەرى, اسكەري ءبولىم جاۋىنگەرلەرى, تالعات بيگەلدينوۆ اتىنداعى رەسپۋبليكالىق اسكەري مەكتەپ وقۋشىلارى, جۇرتشىلىق وكىلدەرى قالالار مەن اۋدانداردى ارالاۋعا شىققان “ارداگەر” ۇگىت پويىزىنا ءسات ساپار تىلەدى. قۇرامىنا تاريحشى عالىمدار, ادەبيەت پەن ونەر قايراتكەرلەرى قامتىلعان كەرۋەن ايماق بويىنشا جول ۇستىندە ەكى اي بولادى. تۇرعىندارمەن كەزدەسۋلەردە ەل ومىرىندەگى ەلەۋلى وقيعالار تۋرالى اڭگىمەلەر وتكىزىلىپ, كونتسەرتتەر قويىلادى.
ايقىن نەسىپباي, قاراعاندى.
ەۋروپالىق بانك كومەككە كەلدى. ەكونوميكاسى ورلەۋ ۇستىندەگى ماڭعىستاۋ وڭىرىندە تاعى ءبىر جوبا جۇزەگە اساتىن بولدى. ينۆەستيتسيانى تارتا ءبىلۋ بەلگىسى رەتىندە بۇل جولعى جوبا اقتاۋدى سۋمەن قامتاماسىز ەتۋ جانە سۋ جۇيەلەرىن جەتىلدىرۋگە ارنالدى. ياعني, وبلىس اكىمى قىرىمبەك كوشەرباەۆ پەن ەۋروپا قايتا قۇرۋ جانە دامۋ بانكىنىڭ قازاقستانداعى ديرەكتورى مايكل ۆاينستين اكىمدىك پەن اتالمىش بانك اراسىنداعى كەلىسىم-شارتقا قول قويدى. مۇنداي جەڭىلدەتىلگەن زايم تۇرىندە قارجىلاي كومەك كورسەتۋ جانە تەحنيكالىق جاردەمدەسۋ گرانتىن بەرۋ جونىندەگى بىرلەسكەن مۇنداي شارا قازاقستان بويىنشا بۇل سالاداعى ءبىرىنشى جوبا دەلىنۋدە. سونداي-اق وسى جولى قالالىق اتالمىش كاسىپورىن مەن بانك ديرەكتورلارى دا نەسيەلىك كەلىسىم-شارتقا وتىردى. اقتاۋ قالاسىنىڭ اكىمى سالىمگەرەي بەكبەرگەنوۆتىڭ ايتۋىنشا, ەكى جىلدا جۇزەگە اساتىن جوبانىڭ ناتيجەسىندە قالا تۇرعىندارى مەن مەيماندارى ساپالى دا تازا سۋدى پايدالانۋعا مۇمكىندىك الماقشى.
جولامان بوشالاق, ماڭعىستاۋ وبلىسى.
ساتباەۆ وقۋلارى – جاس عالىمدار ورتاسى. وتكەن اپتادا وبلىس ءۇشىن جاقسى جاڭالىق – عۇلاما عالىمعا ەسكەرتكىش ورناتىلسا, سۇلتانماحمۇت تورايعىروۆ اتىنداعى مەملەكەتتىك ۋنيۆەرسيتەتتىڭ ستۋدەنتتەرى قانىش اعالارىن ەسكە تۇسىرۋگە ارنالعان جىل سايىنعى ءداستۇرلى عىلىمي وقۋلارىنا جينالدى. ساتباەۆ وقۋلارى وسىمەن ونىنشى رەت ءوتىپ وتىر. عالىمنىڭ تۋعان كۇنى –12 ساۋىرگە وراي ۇيىمداستىرىلاتىن بۇل عىلىمي-تاجىريبەلىك كونفەرەنتسياعا رەسەي, بەلارۋس, پولشا, ۋكراينا جوعارى وقۋ ورىندارىنىڭ ستۋدەنتتەرى جانە جەرگىلىكتى جەردەگى مەكتەپ وقۋشىلارى جازعان 200-گە جۋىق عىلىمي جۇمىس كەلىپ ءتۇسىپتى. بۇل – وزگە ەلدەر ستۋدەنتتەرى دە ساتباەۆتىڭ عىلىمي جاڭالىقتارىنا قىزىعۋشىلىق تانىتىپ, ارى قاراي دامىتۋعا ۇمتىلىپ وتىر دەگەن ءسوز. وسى شارا بارىسىندا بىرنەشە عىلىمي جازبا ماراپاتقا ۇسىنىلدى.
فاريدا بىقاي, پاۆلودار.
فۋتبول مەكتەبىنىڭ ماقساتى ايقىن. كوكشەتاۋدا “وقجەتپەس” فۋتبول كلۋبىنىڭ نەگىزىندە جاڭا بالالار-جاسوسپىرىمدەر مەكتەبى اشىلدى. وبلىس اكىمى سەرگەي دياچەنكو سالتاناتقا جينالعانداردى قىزۋ قۇتتىقتادى. وبلىس اكىمىنىڭ قاۋلىسىمەن مەكتەپ قاراۋىنا بۇرىنعى “فۋتبول-حوككەي” كلۋبىنىڭ عيماراتى, “جاستار” ستاديونى بەرىلدى. قازىرگى تاڭدا 160 بالا (ونىڭ ىشىندە قىزدار كومانداسى دا بار) 12 جاتتىقتىرۋشىدان ءتالىم الۋدا. ولارعا بارلىق قولايلى جاعدايلار جاسالعان. مەكتەپتىڭ نەگىزگى ماقساتى – بۇقارالىق سپورت ءتۇرىن جانداندىرىپ, “وقجەتپەس” فۋتبول كلۋبىن تالانتتى جاستارمەن تولىقتىرۋ.
باقبەرگەن امالبەك, اقمولا وبلىسى.
اقىننىڭ قايىرىمدىلىق كونتسەرتى. بەلگىلى اقىن, جاستار سىيلىعىنىڭ لاۋرەاتى, مادەنيەت قايراتكەرى اباش كاكەنوۆ جاقىندا ءوزىنىڭ ءبىر توپ ونەرپاز دوستارىمەن وسكەمەندە “قىسىلعاندا قول ۇشىن بەر, اعايىن!” اتتى قايىرىمدىلىق كونتسەرتىن ۇيىمداستىردى. كەشتى وبلىستىق فيلارمونيانىڭ ديرەكتورى, كۇمىس كومەي ءانشى كەنجەعالي مىرجىقباي اشىپ, وسىنداي قيىن كەزەڭدە اپات ايماعىنداعى اعايىندارمەن بىرگە ەكەنىن, فيلارمونيا ۇجىمىنىڭ ءبىر كۇندىك تابىستارىن ارنايى ەسەپ-شوتقا اۋدارعانىن حابارلاپ, جينالعانداردى وسى اكتسياعا قىزۋ قاتىسۋعا شاقىردى. التايدىڭ بەلگىلى ءانشى, تەرمەشىلەرى ەكى ساعات بويى جينالعانداردى ءان-كۇيمەن سۋسىنداتتى. بۇگىندە اباش باستاعان انشىلەر سۋ باسقان ايماقتاردا تەگىن كونتسەرت بەرۋدە.
وڭداسىن ەلۋباي, وسكەمەن.
دىمكاس بالالارعا دەمەۋ بولعان اكتسيا. اقتوبە قالاسىنداعى №5 “جۇلدىز” شيپاجاي-بالاباقشاسىندا تۋبەركۋلەزگە قارسى ەمدەلىپ جاتقان بالالار ءۇشىن “بوبەك” رەسپۋبليكالىق قورىنىڭ قايىرىمدىلىق اكتسياسى وتكىزىلدى. مۇندا وسى اۋرۋمەن اۋىراتىن, وسى سىرقاتتىڭ بەلگىلەرى بار بالالارعا الماتى قالاسىنان 547 كەلى بال جەتكىزىلىپ, قايىرىمدىلىق كومەك كورسەتىلدى. ارانىڭ بالى – تاپتىرماس دارۋمەن. ول يممۋنيتەتتى كوتەرەدى, تۋبەركۋلەزگە قارسى ەمدىك قاسيەتى جوعارى تاعام بولىپ تابىلادى. وبلىستىق بالالار قۇقىقتارىن قورعاۋ دەپارتامەنتى ارانىڭ بالىن “شاعالا” شيپاجايىنا, №5 “جۇلدىز” شيپاجاي-بالاباقشاسىنا, قۋرايلى مەكتەپ-ينتەرناتىنا, اۋدانداردا ورنالاسقان شيپاجايلارعا ءبولدى. اكتسيا بارىسىندا بارلىعى 949 بالاعا كومەك كورسەتىلدى. “بوبەك” رەسپۋبليكالىق قورىنىڭ پرەزيدەنتى سارا نازارباەۆانىڭ ارقاسىندا وتكەن جەتى جىلدا وبلىسقا 2516 كەلى بال جەتكىزىلىپ, اۋرۋ بۇلدىرشىندەردىڭ اس مازىرىنە ەنگىزىلىپتى. اكتسيا بارىسىندا اتا-انالار, ۇستازدار, ەمدەلىپ جاتقان بالالار وسىنداي قايىرىمدىلىعى ءۇشىن سارا الپىسقىزىنا ىستىق ىقىلاستارىن ءبىلدىردى.
ساتىبالدى ءساۋىرباي, اقتوبە وبلىسى.
