«مەملەكەتشىل ازامات رەتىندە قاي زاماندا دا سايلاۋدان قالعان ەمەسپىن. قىزمەتتەستەرىمە دە, بالالارىما دا ۇلگى ەتەتىن ادەتىم وسى, بۇل ءوزىڭدى ازامات رەتىندە قالىپتاستىرۋدىڭ ەڭ العاشقى باسپالداعى. ءبىز ءوز بولاشاعىمىزعا جاۋاپكەرشىلىكپەن قاراۋعا مىندەتتىمىز», دەيدى قاريا.
تۇركىستان وبلىسىنىڭ تۇرعىندارى پارلامەنت ءماجىلىسى مەن ءماسليحاتتار دەپۋتاتتارىنىڭ سايلاۋىنا بەلسەندى قاتىسىپ, ءوز تاڭداۋلارىن جاسادى. وڭىردەگى 911 سايلاۋ ۋچاسكەسىنە 1 160 138 سايلاۋشى تىركەلگەن. ال وبلىس ورتالىعى – تۇركىستان قالاسىندا 50 سايلاۋ ۋچاسكەسى جۇمىس ىستەدى. وندا قالا تۇرعىندارىمەن قاتار, قىزمەت بابىندا جۇرگەن ازاماتتار جانە قالاعا كەلگەن قوناقتار دا داۋىس بەردى. سايلاۋ ۋچاسكەلەرىندە سانيتارلىق نورمالار بارىنشا مۇقيات ساقتالعان. جاۋاپتى ماماندار ءاربىر ادامنىڭ دەنە قىزۋىن ولشەپ, مەديتسينالىق ماسكا, قولعاپتىڭ بولۋىن تەكسەردى. سونداي-اق الەۋمەتتىك قاشىقتىقتىڭ ساقتالۋى ءسات سايىن ەسكەرتىلىپ وتىردى.
تۇركىستان وبلىستىق اۋماقتىق سايلاۋ كوميسسياسىنىڭ مالىمەتىنشە, وڭىردە 17 اۋماقتىق سايلاۋ كوميسسياسىنىڭ 119 كوميسسيا مۇشەسى مەن 911 ۋچاسكەلىك سايلاۋ كوميسسيالارىنىڭ 6193 كوميسسيا مۇشەلەرى جۇمىس ىستەدى. كوميسسيا مۇشەلەرىنىڭ بارلىعى كاسكادتىق ادىسپەن تولىق وقىتىلىپ, تەستىلەۋدەن وتكىزىلگەن.
تۇركىستان وبلىسى
