بيىلعى ماۋسىمداعى ەكى كوماندا اراسىنداعى العاشقى ويىن قازان ايىندا «ۋرالەتس» سپورت كەشەنىندە ءوتىپ, مۇزايدىن يەلەرى 3:2 ەسەبىمەن باسىم تۇسكەن ەدى. اراعا ءۇش اي سالىپ ەكى ۇجىمنىڭ جولى تاعى دا ءدال سول سپورت كەشەنىندە ءتۇيىستى. الايدا بۇل جولى جەرلەستەرىمىز 3:2 ناتيجەسىمەن جەڭىسكە جەتىپ, قارسىلاستارىنان ەسە قايتاردى. كەزدەسۋ باستالا سالا ويىن تىزگىنىن ءوز قولدارىنا العان «بارىس» حوككەيشىلەرى 4-مينۋتتا ەسەپ اشتى. «امۋرعا» قارسى وتكەن العاشقى ويىننىڭ قاھارمانىنا اينالعان رومان ستارچەنكو بۇل جولى دا مەرگەندىگىمەن كوزگە ءتۇستى. ال كەزەڭ ورتاسىندا ياكوب ليليا (10-مينۋت) قوناقتاردىڭ باسىمدىعىن نىعايتتى.
ەكىنشى كەزەڭنىڭ باسىندا «بارىس» قۇرامىنا جۋىردا عانا قوسىلعان كيريلل پانيۋكوۆ (23-مينۋت) ماۋسىمداعى العاشقى, كومانداسىنىڭ ويىنداعى ءۇشىنشى گولىن سوقتى. ۇزىلىسكە از ۋاقىت قالعاندا اناتولي گولىشەۆ (38-مينۋت) ەسەپ ايىرماسىن قىسقارتۋعا مۇمكىندىك الدى. سوڭعى اينالىمدا پيتەر حوللاند ەسەپتى 3:2-گە جەتكىزگەنىمەن, كومانداسىن جەڭىلىستەن قۇتقارىپ قالا المادى. جەرلەستەرىمىز كەيىنگى كەزدەسۋىن ەرتەڭ ەلورداداعى «بارىس ارەنا» سپورت كەشەنىندە قازاننىڭ «اك بارس» كلۋبىمەن وتكىزەدى.
