قالالىق ادۆوكاتتار القاسى تورالقاسىنىڭ مۇشەسى نۇرلان جازىلبەكوۆتىڭ ايتۋىنشا, شاھارداعى ۋچاسكەلەردە سايلاۋ زاڭناماسى تالاپتارىنىڭ بۇزىلۋى بايقالمايدى.
– ءوزىم №131 ۋچاستكەدە داۋىس بەردىم. ول جەردەگى دايىندىققا, كورسەتىلگەن قىزمەتكە تاعار ءمىنىم جوق. بىرنەشە كۇننەن بەرى سايلاۋعا دايىندىقتىڭ قالاي ءجۇرىپ جاتقانىن بايقاپ جۇردىك. بۇگىن دە سايلاۋ ۋچاستكەلەرىندە بولدىق جانە ونداعى سايلاۋدىڭ زاڭ تالاپتارى اياسىندا بولىپ جاتقانىنا كوز جەتكىزدىك. ارينە, پاندەمياعا بايلانىستى قيىندىقتار بار. بىراق جوعارى دەڭگەيدەگى دايىندىقتىڭ ارقاسىندا سايلاۋ زاڭناماسى تالاپتارى دا, سانيتارلىق تالاپتار دا قاتاڭ ساقتالىپ جاتىر. سوندىقتان سايلاۋشىلار ەشتەڭەگە الاڭداماي وزدەرى تىركەلگەن سايلاۋ ۋچاسكەلەرىنە كەلسە بولادى, – دەدى جازىلبەكوۆ.
سپيكەردىڭ ايتۋىنشا, وسى سايلاۋدا پارتيالار دەموكراتيالىق جولدى تاڭداي ءبىلدى.
– حالىقتى قىزىقتىرعانى – سايلاۋعا قاتىساتىن پارتيالاردىڭ ءوز كانديداتتارىن دەموكراتيالىق جولمەن تاڭداعانى. كەي پارتيالار پرايمەريزدى تاڭدادى. الداعى ۋاقىتتا وزگە پارتيالار دا ناعىز لايىقتى تۇلعالاردى ىرىكتەپ شىعاراتىن وسى جولدى تاڭدايدى دەپ ويلايمىن. بۇل ءبىزدىڭ ەلىمىزدىڭ ەۆوليۋتسيالىق دامۋىنا سەرپىن بەرەدى. 31 مەملەكەت باقىلاۋشى رەتىندە ەلىمىزدەگى سايلاۋدى قاداعالاپ وتىر, – دەدى الماتى قالالىق قوعامدىق كەڭەسىنىڭ مۇشەسى.
«الماتى كوپىر قۇرىلىمدارى زاۋىتى» جشس ديرەكتورى احمەتجان شاردينوۆتىڭ ايتۋىنشا, بۇگىن ازاماتتىق بەلسەندىلىك تانىتاتىن كۇن.
– بۇگىن اۋا-رايى دا كەرەمەت بولىپ تۇر. وتباسىمىزبەن, بالالارىمىزبەن مەدەۋ اۋدانىندا ورنالاسقان №412 سايلاۋ ۋچاسكەسىنە بارىپ داۋىس بەردىك. ول جەردەگى ەرەكشە جوعارى دەڭگەيدەگى دايىندىقتى اتاپ وتكىم كەلەدى. بارلىق سانيتارلىق تالاپتار ساقتالعان. ارنايلى نۇسقاۋلىقتار ءىلىنىپ, سانيتايزەر, ماسكامەن قامتاماسىز ەتىلگەن. باقىلاۋشىلار دا كوپ. بۇگىن ازاماتتىق بەلسەندىلىك تانىتاتىن كۇن. حالىق تاتۋلىق, ۇلتارالىق كەلىسىم جانە قازاقستاننىڭ ءارى قارايعى دامۋى جولىنداعى ءادىل تاڭداۋىن جاسايدى دەپ سەنەمىن, – دەيدى شاردينوۆ.
ال ەۋرازيالىق فرانچايزينگ قاۋىمداستىعىنىڭ باسشىسى بەكنۇر قيسىقوۆ ءوز كەزەگىندە حالىقتىڭ ۋچاسكەلەرگە اعىلىپ كەلمەي جاتقانىنا بايلانىستى پىكىرىن ءبىلدىردى.
– بىرنەشە سايلاۋ ۋچاسكەلەرىنە بارىپ كەلدىك. باقىلاۋشىلار كوپ ەكەنى بايقالادى. بىرقاتار ۋچاسكەدە ادام ونشا كوپ ەمەس ەكەن. بۇل ەندى ءبىر جاعىنان جاقسى. ادامدار ەركىن داۋىس بەرىپ كەتىپ جاتىر. بۇگىن – جەكسەنبى, سوندىقتان تۇستەن كەيىن حالىق كوپتەپ كەلە باستايدى دەپ ويلايمىن. كەشكى ساعات 8-گە دەيىن ازاماتتاردىڭ كەلىپ داۋىس بەرۋىنە مۇمكىندىك بار. تۇرعىندار سول مۇمكىندىكتەرىن ءتيىمدى پايدالانادى دەپ كۇتەمىن. جالپى, ەلىمىزدە وسى سايلاۋعا ەرەكشە ءمان بەرىلىپ وتىر. الەۋمەتتىك جەلىنى اشساق تا, باق-تى قاراساق تا بۇل سايلاۋعا دەگەن باقىلاۋشىلاردىڭ عانا ەمەس, سايلاۋشىلاردىڭ دا ىقىلاسىنىڭ ەرەكشە ەكەنىن اڭعارامىز. ويتكەنى ءبىز ەل دامۋى جولىندا اسا ماڭىزدى سانالاتىن بەلگىلى ءبىر ەۆوليۋتسيالىق قادام جاساپ جاتىرمىز. مۇنى ءبىزدىڭ ازاماتتارىمىز جاقسى ءتۇسىنىپ وتىر, – دەدى بەكنۇر قيسىقوۆ.
