سىدالى زەكي حاكان ەۋروپا كەڭەسى پارلامەنتتىك اسسامبلەياسىنىڭ مۇشەسى رەتىندە كوپتەگەن ەلدەردەگى سايلاۋلاردىڭ بارىسىن باقىلاعانىن اتاپ ءوتتى. بۇل ونىڭ قازاقستانعا بايقاۋشى رەتىندە ەكىنشى مارتە كەلۋى. ول بۇعان دەيىن قازاقستانداعى سوڭعى پرەزيدەنت سايلاۋىنا بايقاۋشى رەتىندە قاتىسقان ەكەن.
– قازاقستان دەموكراتياعا دەگەن ۇمتىلىسىن كۇشەيتىپ كەلەدى. سايلاۋ – دەموكراتيانىڭ كورسەتكىشى. سايلاۋ – ادامدارعا بەرىلگەن مۇمكىندىك. ونى ءتيىمدى پايدالانۋ كەرەك. سايلاۋدان كەيىن پارلامەنتتە وپپوزيتسيا وكىلدەرىنە كوپ ورىن بۇيىرادى دەگەن ويدامىن. ياعني, وپپوزيتسيا حالىقتىڭ ويىن بىلدىرە الاتىنداي مۇمكىندىككە يە بولادى دەگەن سەنىمدەمىن, – دەدى سىدالى زەكي حاكان.
تاۋەلسىز بايقاۋشى تاڭەرتەڭنەن بەرى بىرنەشە سايلاۋ ۋچاسكەسىنە بارعانىن ايتتى. سايلاۋ اشىق, ترانسپورەنتتى تۇردە ءوتىپ جاتقانىن جەتكىزدى.
– بۇل سايلاۋ قيىن كەزەڭدە ءوتىپ جاتىر. ياعني, كوروناۆيرۋس پاندەمياسى جاعدايىندا وتۋدە. مۇنداي جاعدايدا سايلاۋ سەكىلدى اۋقىمدى ساياسي شارانى ۇيىمداستىرۋ وڭاي ەمەس. بىراق قازاقستان بۇل مىندەتتى ويداعىداي ورىنداۋدا. سايلاۋدىڭ جوعارى دەڭگەيدە ۇيىمداستىرىلىپ جاتقانىنا كوز جەتكىزدىك. سانيتارلىق تالاپتار قاتاڭ ساقتالعان. حالىقتىڭ دا جاۋاپكەرشىلىگى جوعارى ەكەنىن بايقادىق. مۇمكىندىگى شەكتەۋلى ادامدار ءۇشىن دە ارنايى داۋىس بەرۋ ورىندارى جاسالعان. قىسقاسى, بارلىعى ەسكەرىلگەن. تىڭعىلىقتى دايىندىق جۇرگىزىلگەن. جەرگىلىكتى, شەتەلدىك بايقاۋشىلارمەن دە تىلدەستىك. ولار دا سايلاۋدىڭ بارىسىنا وڭ باعا بەردى. سوندىقتان سايلاۋ دەموكراتيالىق جاعدايدا ءوتىپ جاتىر دەپ ايتۋعا تولىق نەگىز بار, – دەدى سىدالى زەكي حاكان.
تۇركيا ۇلى ۇلتتىق ءماجىلىسىنىڭ دەپۋتاتى جەرگىلىكتى حالىقتىڭ دا بەلسەندى ەكەنىن اتاپ ءوتتى.
– سايلاۋ بارىسىن تۇستەن كەيىن دە باقىلايمىز. ەگەر ءبارى ويداعىداي وتسە, قازاقستان دەموكراتياعا قاراي ۇلكەن قادام جاساعان بولىپ ەسەپتەلەدى. سونداي-اق بۇل جاعداي دەموكراتيا جولىنا ەندى تۇسكەن وزگە مەملەكەتتەرگە ۇلگى بولادى دەگەن ويدامىن, – دەدى سىدالى زەكي حاكان.
