سەنات توراعاسى قازاقستان سايلاۋعا باقىلاۋ جۇرگىزۋ پروتسەسىنە باسا ءمان بەرىپ وتىرعانىن جانە ساياسي ناۋقاندى جوعارى دەڭگەيدە ۇيىمداستىرۋ ءۇشىن بارلىق ءتيىستى شارالاردى قولعا العانىن اتاپ ءوتتى.
ءوز سوزىندە ماۋلەن اشىمباەۆ الداعى ءماجىلىس جانە ءماسليحاتتار سايلاۋىنىڭ ماڭىزىنا توقتالدى.
«قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان ءابىش ۇلى نازارباەۆتىڭ باستاماسىمەن قۇرىلعان تۇركىتىلدەس ەلدەردىڭ پارلامەنتتىك اسسامبلەياسى قازىرگى تاڭدا بەدەلدى حالىقارالىق ۇيىمعا اينالىپ وتىر. سوندىقتان تۇركپا وكىلدەرى سايلاۋدى باقىلاۋعا قاتىسۋىنىڭ قازاقستان ءۇشىن ماڭىزى جوعارى», – دەدى سەنات توراعاسى.
سونداي-اق, ول پرەزيدەنت قاسىم-جومارت توقاەۆتىڭ باستاماسىمەن ەلىمىزدىڭ ساياسي جۇيەسىن دامىتۋعا ارنالعان ساياسي رەفورمالار توپتاماسى قابىلدانعانىنا نازار اۋداردى. ونىڭ ايتۋىنشا, مەملەكەت باسشىسىنىڭ باستاماسىمەن قابىلدانعان زاڭدار قازاقستاندا كوپ پارتيالىلىقتى نىعايتۋعا جانە ازاماتتاردىڭ ساياسي ۇدەرىستەرگە قاتىسۋىن كەڭەيتۋگە باعىتتالعان.
«پرەزيدەنتىمىز بيىل جاڭا ساياسي جاڭعىرۋلار جاريالاناتىنىن ايتتى. وسىلايشا, قازاقستان ساياسي جۇيەنى دەموكراتيالاندىرۋ جانە دامىتۋ باعىتتارى بويىنشا جۇمىستاردى جالعاستىرا بەرەدى», – دەدى ماۋلەن اشىمباەۆ.
سونىمەن قاتار سەنات سپيكەرى سايلاۋدى حالىقارالىق نورمالارعا سايكەس وتكىزۋ ءۇشىن بارلىق قاجەتتى شارالار قابىلدانعانىن جانە حالىقارالىق باقىلاۋشىلارعا ءتيىستى جاعداي جاسالعانىن ايتتى.
