ەكونوميكالىق ماسەلەلەر تالقىلاندى

سايلاۋ • 08 قاڭتار، 2021

ەكونوميكالىق ماسەلەلەر تالقىلاندى

14 رەت كورسەتىلدى

Nur Otan پارتياسىنىڭ وكىلدەرى وڭىرلەردە حالىقپەن كەزدەسۋدى جالعاستىرۋدا. كەشە پارتيا سايلاۋالدى شتابىنىڭ مۇشەلەرى سولتۇستىك قازاقستان وبلىسىندا بولدى.

جولدىباي بازار

پارتيا وكىلدەرى چاپاەۆ اۋىلىنداعى «قىزىلجار ءسۇت» بازاسىندا ءوڭىردىڭ ءىرى اۋىلشارۋاشىلىق كاسىپورىندارىنىڭ باسشىلارىمەن بىرگە سالانى دامىتۋ ماسەلەلەرىن قاراستىردى. «بۇگىندە ازاماتتارىمىزدىڭ 40%-دان استامى اۋىلدا تۇرادى. ەلباسى، پارتيا ليدەرى نۇرسۇلتان نازارباەۆتىڭ باستاماسىمەن قولعا الىنعان «اۋىل – ەل بەسىگى» جوباسى اياسىندا ءبىز اۋىلدىڭ الەۋەتىن بارىنشا ىسكە اسىرۋعا، اۋىل تۇرعىندارىنىڭ ءومىر ءسۇرۋ ساپاسىن جاقسارتۋعا ودان ءارى جاعداي جاسايتىن بولامىز. تاياۋداعى 5 جىلدا Nur Otan جاڭا ينۆەستيتسيالىق جوبالار مەن فەرمەرلىك شارۋاشىلىقتار قۇرۋ ەسەبىنەن اۋىل شارۋاشىلىعىندا 500 مىڭداي ادامدى جۇمىسپەن قامتاماسىز ەتۋ مىندەتىن قويىپ وتىر. اۋىلدا كووپەراتسيانى ىنتالاندىرۋ، اۋىل شارۋاشىلىعى ونىمدەرىن فورۆاردتىق ساتىپ الۋدى كەڭەيتۋ، زاماناۋي تسيفرلى تەحنولوگيالاردى ەنگىزۋ بويىنشا شارالار قابىلدانادى»، دەپ اتاپ ءوتتى سايلاۋالدى شتاب جەتەكشىسى باۋىرجان بايبەك.

بەسكول اۋىلىندا پارتيا مۇشەلەرى «ەڭبەك» مەملەكەتتىك باعدارلاماسى اياسىندا وڭىرگە قونىس اۋدارعان وتباسىلارمەن كەزدەسىپ، وبلىستىڭ الداعى دامۋ جوسپارىن تالقىلادى. اتاپ ايتقاندا، وڭىردە 65 مىڭ جاڭا جۇمىس ورنىن اشۋ، مىڭ شاقىرىمنان استام اۆتوجول سالۋ جانە جوندەۋ، 142 اۋىلدىڭ 115 مىڭ تۇرعىنىن ساپالى اۋىز سۋمەن قامتاماسىز ەتۋ، مۇقتاج ازاماتتارعا ارناپ 2،5 مىڭ پاتەر سالىپ، جالپى 1،6 ملن-نان استام شارشى مەتر تۇرعىن ءۇيدى پايدالانۋعا بەرۋ جوسپارلانۋدا.

Nur Otan پارتياسىنىڭ رەسپۋبليكالىق سايلاۋالدى شتابى پاۆلودار وبلىسىنا دا باردى. پارتيا بەلسەندىلەرى «قازاقستان ءاليۋمينيى» جۇمىسشىلارىمەن كەزدەستى. تاياۋداعى 5 جىلدا Nur Otan وبلىستا كەمىندە 45 مىڭ جاڭا جۇمىس ورنىن اشۋ، 100-دەن استام اۋىلدىڭ 45 مىڭ تۇرعىنىن ساپالى اۋىز سۋمەن قامتاماسىز ەتۋ، 1،6 مىڭ كم اۆتوجولدى جوندەۋ، مۇقتاج ازاماتتارعا 9 مىڭ پاتەر ۇسىنا وتىرىپ، 2 ملن شارشى مەتر تۇرعىن ءۇي سالۋ سەكىلدى جوبالاردى مىندەت ەتىپ قويىپ وتىر.

بۇدان كەيىن مۇعالىمدەرمەن كەزدەسۋدە سايلاۋالدى شتاب مۇشەلەرى ءبىلىم بەرۋ سالاسىن دامىتۋدىڭ نەگىزگى باعىتتارىن تالقىلادى. ب.بايبەكتىڭ ايتۋىنشا، Nur Otan پارتياسى وڭىردە 83 مەكتەپ سالۋ مەن كۇردەلى جوندەۋدى قامتاماسىز ەتەدى. ەل بويىنشا 800 جاڭا مەكتەپ سالىنادى جانە شاعىن قالالاردا، اۋدان ورتالىقتارى مەن اۋىلداردا قولدانىستاعى 5 مىڭ مەكتەپ جاڭعىرتىلادى. اسىرەسە مۇعالىم كاسىبىنىڭ بەدەلىن ارتتىرۋعا باسا نازار اۋدارىلادى. پەداگوگتەردىڭ جالاقىسى 2 ەسە وسەدى.

پارتيا وكىلدەرى نوۆوچەرنوياركا اۋىلىنىڭ تۇرعىندارىمەن كەزدەستى. تۇرعىنداردىڭ ايتۋىنشا، چەرنويار اۋىلدىق وكرۋگىندەگى تۇيتكىلدى ماسەلەنىڭ ءبىرى – اۋىل ىشىندەگى جولداردىڭ ساپاسى. وسىنى ەسكەرە وتىرىپ، Nur Otan پارتياسى اۋداندىق سايلاۋالدى باعدارلاماعا 19 اۋىلداعى، ونىڭ ىشىندە نوۆوچەرنوياركاداعى جولدارعا جوندەۋ جۇرگىزۋدى ەنگىزدى.

«جالپى، ەلباسى، پارتيا ليدەرى نۇرسۇلتان نازارباەۆتىڭ باستاماسىمەن قولعا الىنعان «اۋىل – ەل بەسىگى» جوباسىنىڭ اياسىندا وڭىردە 170 اۋىل جاڭعىرتىلادى»، دەدى ب.بايبەك.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز