سيمۆوليزم سيقىرى

ونەر • 08 قاڭتار، 2021

سيمۆوليزم سيقىرى

10 رەت كورسەتىلدى

ۇلتتىق مۋزەيدە ء«بىر تۋىندى تاريحى» جوباسى اياسىندا يۋنەسكو جانىنداعى ءاىسا مۇشەسى، كوركەمسۋرەت اكادەمياسىنىڭ اكادەميگى، بەلگىلى سۋرەتشى بوتاگوز اقاناەۆانىڭ «تەڭىز حانشايىمى» اتتى تۋىندىسى تانىستىرىلدى.

مۇحتار كۇمىسبەك

تۋىندى ساندىك ناتيۋرمورت جانرىندا ورىندالعان. ساندىك ناتيۋرمورتتا سىزىقتارعا، سۇلباعا، ولاردىڭ قوزعالىسىنا جانە تاڭبامەن ءوزارا ارەكەتىنە باسىمدىق بەرىلەدى. سونداي-اق قۇراق تۇرىندەگى اپپليكاتيۆتى ورنەكتەردى پايدالانۋعا دا بولادى.

بوتاگوز اقاناەۆا ساندىك ۇلگىدەگى زاتتار الەمىن ءجيى بەينەلەيدى. بەينەلەيتىن زاتتاردىڭ ءپىشىنى جايپاق ءارى شارتتى بولادى. جارىق پەن كولەڭكەنى تۇمشالايدى. سۋرەت وقىرمانعا جەڭىل، قاجەت ەمەس دەتالداردان ارىلعان. ولاردىڭ ورنىنا ءاربىر سۇلبا بەزەندىرىلە تۇسكەن.

سۋرەت تىگىنەن ۇيلەستىرىلگەن، سوندىقتان زاتتاردىڭ (ۆازا، قۇمىرا جانە بوتەلكە) ءپىشىنى تىك، ءبىر سىزىقتىڭ بويىنا تۇرعىزىلعان. بۇل ولاردى فورماتقا جيناقى ورنالاستىرۋعا مۇمكىندىك بەرەدى. كومپوزيتسيانىڭ ورتالىعى – كارتينانىڭ ورتاسىنداعى ۆازانىڭ ەرنەۋىنە ورنالاسقان تەڭىز حانشايىمى – بالىق. ول كارتيناداعى جالعىز كولدەنەڭ ەلەمەنت بولعاندىقتان نازاردى وزىنە اۋدارتادى. سۋرەتشى تۋىندىسىندا سيمۆوليزمگە جۇگىنگەن.

بالىق ونەردە تابيعاتتىڭ سيمۆولى سانالادى. ءداستۇرلى تۇسىنىكتەرگە وراي، ءومىر قاينارى –

سۋ. سوندىقتان باعزى زاماندا بالىقتى تىرشىلىكتىڭ پايدا بولۋىنىڭ سيمۆولى رەتىندە قاستەرلەگەن. قىتاي تىلىندە «بالىق» جانە «مولشىلىق» بىردەي تاڭبالانىپ، بىردەي دىبىستالادى.

كارتيناعا ءدال سيممەتريا، ساندىك بوياۋلاردىڭ قانىقتىعى، بوياۋ داقتارى مەن سۇلبالاردىڭ تەپە-تەڭدىگى، كەڭىستىكتىڭ تۇيىقتىعى ءتان.

ايتا كەتەيىك، بوتاگوز اقاناەۆا ن.ۆ.گوگول اتىنداعى الماتى كوركەمسۋرەت ۋچيليششەسىنىڭ تۇلەگى، ماماندىعى بويىنشا تەاتر دەكوراتورى. 1990-جىلدان رەسپۋبليكالىق، بۇكىلوداقتىق جانە حالىقارالىق كورمەلەرگە قاتىسقان.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز