پرەزيدەنتىمىزدىڭ: ء«بىز ادىلەتتى قوعام مەن ءتيىمدى مەملەكەت قۇرۋدى كوزدەپ وتىرمىز. كەز كەلگەن ىستە ادىلدىك قاعيداتىن باسشىلىققا الساق, بۇعان انىق قول جەتكىزەمىز. مىسالى, تۇرعىنداردىڭ تۇرمىسىن جاقسارتا تۇسپەسەك, ەلىمىزدىڭ جەتىستىكتەرى مەن حالىقارالىق تابىستارىن ماقتان ەتۋ ارتىق. ازاماتتارىمىز ەكونوميكالىق ءوسىمنىڭ يگىلىگىن سەزىنە الماسا, ودان ەش قايىر جوق. مەن ءاربىر شەشىمدى قابىلدار ساتتە وسى ۇستانىمدى باسشىلىققا الامىن. ءبىز حالىقتىڭ الەۋمەتتىك جاعدايىن جاقسارتۋمەن قاتار, بارلىق ازاماتتاردىڭ مۇددەسىن بىردەي قورعايمىز. مەنىڭ ۇعىمىمداعى ادىلەتتى مەملەكەت دەگەنىمىز – وسى», دەگەن جۇرەكجاردى ءسوزى كىمنىڭ بولسىن كوكەيىندەگىنى ءدوپ باسىپ, كوڭىلىنەن شىققانى انىق.
مەملەكەت باسشىسىنىڭ الاش قايراتكەرلەرىنەن تاعىلىم الۋ, وتكەن عاسىرداعى الاپات اشارشىلىققا مەملەكەت تاراپىنان باعا بەرۋ, جەلتوقسان قاھارماندارىنىڭ ازاماتتىق ەرلىگىن لايىقتى باعالاۋ جايلى ايتقان وي-پىكىرلەرى دە ونىڭ «حالىق ۇنىنە قۇلاق اساتىن مەملەكەت قۇرۋ» تۇجىرىمداماسىنىڭ دايەكتىلىگىن ايعاقتاعانداي.
قاسىم-جومارت كەمەل ۇلىنىڭ: «ەگەمەندىگىمىزدىڭ ماڭگىلىك ۇشتاعانى – التايدان اتىراۋعا, الاتاۋدان ارقاعا دەيىن كەڭ كوسىلگەن بايتاق جەرىمىز, انانىڭ اق سۇتىمەن بويىمىزعا دارىعان قاستەرلى ءتىلىمىز جانە بارلىق قيىندىقتاردان حالقىمىزدى سۇرىندىرمەي الىپ كەلە جاتقان بەرەكە-بىرلىگىمىز. ءبىز وسى ءۇش قۇندىلىقتى كوزدىڭ قاراشىعىنداي ساقتايمىز», دەگەن جالىندى سوزدەرىن تەبىرەنبەي وقۋ مۇمكىن ەمەس.
مەملەكەت باسشىسى اتالعان ماقالاسىندا قازاق جەرى ەشبىر شەتەلدىكتىڭ مەنشىگىنە بەرىلمەيدى, ەشقاشان ساتىلمايدى دەپ تاعى دا مالىمدەدى. بۇعان قوسا, قاسىم-جومارت كەمەل ۇلى: ء«بىز ەڭبەك كۇشى كوپ وڭتۇستىك ءوڭىر تۇرعىندارىنىڭ سولتۇستىك جانە شىعىس ايماقتارعا قونىستانۋىنا قولايلى جاعداي جاساپ, وسى جۇمىستى نازاردا ۇستايمىز. بۇل – وتە وزەكتى ءارى ەلىمىزدىڭ قاۋىپسىزدىگىنە قاتىستى ماسەلە. بۇعان قوسا, سوڭعى جىلداردا ءتۇرلى سەبەپتەرگە بايلانىستى باسەڭدەپ قالعان قانداستار كوشىن بارىنشا قولداپ, ولاردى جوعارىدا ايتىلعان وڭىرلەرگە ورنالاستىرۋدى جانداندىرامىز.
بۇل ەكى ماسەلەنىڭ دە ستراتەگيالىق ماڭىزى بار. وعان كەزەكتى ناۋقان رەتىندە قاراۋعا بولمايدى. جەرگىلىكتى بيلىك مۇنداي جۇمىستاردى جوعارىعا كوپىرگەن اقپار بەرۋ ءۇشىن ەمەس, مەملەكەتتىك مۇددە جانە اعايىنعا شىنايى جاناشىرلىق تۇرعىسىنان جاساۋعا ءتيىس», دەپ شەگەلەي ايتتى. ءيا, كورشىلەس رەسەيدىڭ كەيبىر ساياساتكەرلەرى اتى شۋلى جازۋشى الەكساندر سولجەنيتسىننىڭ وتكەن عاسىردىڭ سەكسەنىنشى جىلدارىندا ايتقان ساندىراعىن قايتالاپ, قازاق جەرىنە كوز الارتىپ وتىرعان قازىرگى ۋاقىتتا ەڭ باستى شارۋا وسى بولۋعا ءتيىستى. تۇڭعىش پرەزيدەنتىمىز – ەلباسى نۇرسۇلتان نازارباەۆتىڭ كورەگەندىگىمەن وسىدان بىرنەشە جىل بۇرىن قولعا الىنعان قونىس اۋدارۋ باعدارلاماسىنا سونى سەرپىن بەرىپ, كەڭىنەن ورىستەتۋ قاجەت.
بۇل رەتتە ۇكىمەتىمىز سولتۇستىك قازاقستان وبلىسىندا قونىس اۋدارۋشىلاردى تۇرعىن ۇيمەن قامتاماسىز ەتۋ جونىندەگى قاناتقاقتى جوبانى وزگە سولتۇستىك-شىعىس وڭىرلەرگە دە تاراتۋ ماسەلەسىن ءبىرىنشى كەزەكتە قاراستىرعانى ءجون. بۇدان قارجى اياۋعا بولمايدى. سونداي-اق وڭتۇستىك وبلىستاردىڭ كاسىپكەرلەرىنىڭ سولتۇستىك-شىعىس وڭىرلەردەن جەر الىپ, بيزنەستەرىن كەڭەيتۋىنە جانە ءوز جەرلەستەرىن سول جاقتارعا كوشىرىپ اپارىپ, جۇمىسقا ورنالاستىرۋىنا قولايلى مۇمكىندىك تۋعىزىلسا, قۇبا-قۇپ. پروبلەمانى كەشەندى تۇردە قاراپ, وڭتۇستىكتىك وڭىرلەردەگى اۋداندىق جانە وبلىستىق دەڭگەيدەگى باسشى ازاماتتاردى سولتۇستىك-شىعىس وڭىرلەرگە روتاتسيالاۋ سياقتى ىقپالدى شارالاردى دا قولدانۋ كەرەك سياقتى.
سولتۇستىك-شىعىس وڭىرلەردەگى وبلىستار مەن ولاردىڭ ورتالىقتارىنىڭ اتاۋلارىن قازاقىلاندىرۋ ماسەلەسىن ارتىق ۋ-شۋسىز, ىڭ-شىڭسىز شەشۋ ءۇشىن, ەڭ الدىمەن, قولدانىستاعى زاڭناماعا وزگەرىس ەنگىزۋ قاجەت. بۇل جونىندەگى قۇزىرەتتى حالىق سايلاعان مەملەكەت باسشىسىنا بەرگەن ءجون شىعار دەپ ويلايمىن.
...ءوز باسىم تۋىپ-وسكەن ءوڭىرىم – سولتۇستىك قازاقستان وبلىسىن قىزىلجار وبلىسى دەپ وزگەرتۋ تۋراسىندا ايتىلىپ جاتقان ۇسىنىستى قولدايمىن. ال پەتروپاۆل قالاسىن ابىلاي حان قالاسى دەپ قايتا اتاساق, دۇرىس ەمەس پە؟ ويتكەنى ول – اق ءۇيىنىڭ الدىندا اتقا قونعان ۇلى بابامىزدىڭ ەسكەرتكىشى تۇرعان شاھار عوي.
كارىباي مۇسىرمان,
پارلامەنت ءماجىلىسىنىڭ دەپۋتاتى
