الماتى مەكتەپتەرىندە 1-5 سىنىپتار ارالىعىندا قوسىمشا كەزەكشى سىنىپتار اشۋعا تىيىم سالىندى. سەبەبى وقۋشىلار اراسىندا ۆيرۋس جۇقتىرۋ كورسەتكىشى كوتەرىلگەن.
«5 قاڭتارداعى جاعدايعا سايكەس وقۋشىلار اراسىندا 311 وقۋشىدان كۆي انىقتالعان. ونىڭ ىشىندە 15 وقۋشى الماتى ارقىلى ەلدىڭ باسقا وڭىرلەرىنە ءوتىپ بارا جاتقان. ولار جەرگىلىكتى تۇرعىن ەمەس. قالا وقۋشىلارى اراسىندا 296 جاعداي تىركەلدى. 262 وقۋشى قاشىقتان وقىعان كەزدە جۇقتىرعان. 1-4 سىنىپ ارالىعىندا – 38 وقۋشى, 5-8 سىنىپ ارالىعىندا – 40 وقۋشى, 9-12 سىنىپ ارالىعىندا 21 وقۋشى جۇقتىرعان. ياعني, جۇقتىرۋ كورسەتكىشى ارتىپ كەلەدى», دەدى ول.
ج.بەكشيننىڭ ايتۋىنشا, ونلاين وقۋدىڭ ارقاسىندا اۋرۋدىڭ جەدەل تارالۋىنىڭ الدى الىندى.
ء«بىز 1500 بالانى اۋرۋ جۇقتىرۋدان امان الىپ قالدىق. قالانىڭ باس سانيتارلىق دارىگەرىنىڭ قاۋلىسىمەن 1-5 سىنىپتار اراسىندا قوسىمشا كەزەكشى كلاستار اشۋعا تىيىم سالىندى. ەگەر وسى وقۋشىلار مەكتەپكە بارىپ جۇرسە, 1500 بالا جۇقتىرار ەدى. باسقا سىنىپتارعا دا كوشەتىن ەدى. مۇعالىمدەر دە اۋىرىپ قالار ەدى. سوندىقتان بۇل شەشىم دۇرىس دەپ سانايمىن», دەدى ج. بەكشين.
بۇگىندە جوعارعى سىنىپ وقۋشىلارى اراسىندا كەزەكشى سىنىپ اشۋ تۋرالى ماسەلە قوزعالىپ جاتىر.
«كۇندەلىكتى باقىلاۋعا سايكەس, 9 سىنىپ اراسىندا – 17 وقۋشى, 11 سىنىپ اراسىندا – 12 وقۋشى, 12 سىنىپ اراسىندا 2 وقۋشى ۆيرۋس جۇقتىرعان. جوعارعى سىنىپ وقۋشىلارى اراسىندا 260 وقۋشىنى اۋرۋ جۇقتىرۋدان الىپ قالدىق», دەدى سپيكەر.
مەكتەپ تۇلەكتەرى مەكتەپكە ءوز ەركىمەن بارادى.
«اتا-انالار بالاسىن مەكتەپكە جىبەرەمىن دەپ شەشسە, ساباقتىڭ 70 پايىزى – وفلاين, 30 پايىزى – ونلاين بولماق», دەدى ول.
ءار سىنىپتا 15 وقۋشىدان اسپاۋى شارت.
«قالالىق ءبىلىم باسقارماسى مەكتەپتەردى دەزينفەكتسيالاۋ قۇرالدارىمەن قامتيدى. دالىزدە توپتاسىپ قالماس ءۇشىن ءار سىنىپ ۇزىلىسكە ءار ۋاقىتتا شىعادى. مەكتەپتە ماسكا رەجىمى قاتاڭ ساقتالادى», دەدى بەكشين.
