سپيكەر قوعامدىق كەڭەستەر تۋرالى زاڭنىڭ نەگىزگى باعىتتارى جايلى باياندادى. «وسى زاڭ قوعامدىق كەڭەستەر ينستيتۋتىنىڭ قىزمەتىن جەتىلدىرۋگە باعىتتالعان بىرقاتار وزگەرىستى ۇسىندى. قوعامدىق كەڭەستەردىڭ تاۋەلسىزدىگى مەن اشىقتىعىن قامتاماسىز ەتۋ ءۇشىن قوعامدىق كەڭەستى قالىپتاستىرۋ جونىندەگى جۇمىس توبىنىڭ باسشىسىن ازاماتتىق قوعام وكىلدەرى قاتارىنان سايلاۋ ۇسىنىلادى», دەدى اقپارات جانە قوعامدىق دامۋ ۆيتسە-ءمينيسترى بولات تلەپوۆ.
سونىمەن بىرگە, ۆيتسە-مينيستر قوعامدىق كەڭەستەر كانديداتتاردىڭ قاتارىنان رەزەرۆتىك پاراقتى وزدەرى قالىپتاستىرادى جانە شىعىپ قالعانداردىڭ ورنىنا جاڭا مۇشەلەردى سايلاۋعا قوسىمشا كونكۋرستار وتكىزە الاتىندىعى جونىندە ايتىپ بەردى. اتالعان نورمالار قوعامدىق كەڭەستەر قىزمەتىنىڭ تيىمدىلىگىن ارتتىرۋعا مۇمكىندىك بەرەدى, سەبەبى كەڭەستەر قۇرامىن دەر كەزىندە قالىپتاستىرۋ – ءوز شەشىمىن تالاپ ەتەتىن ماسەلەلەردىڭ ءبىرى.
زاڭدا جەرگىلىكتى دەڭگەيدە ساندىق قۇرامدى جانە رەسپۋبليكالىق دەڭگەيدە قوعامدىق كەڭەستەر قۇرامىنىڭ ساندىق پارامەترلەرىن بەلگىلەۋ بويىنشا بىرىڭعاي ءتاسىل ۇسىنىلادى. قوعامدىق باقىلاۋدىڭ نىساندارى بولىپ تابىلاتىن قوعامدىق تىڭداۋدى, قوعامدىق ساراپتامانى, قوعامدىق مونيتورينگتى, مەملەكەتتىك ورگاندار باسشىلارىنىڭ ەسەپتەرىن ۇيىمداستىرۋ جانە وتكىزۋ ءتارتىبىن ءنورماتيۆتى تۇردە بەكىتۋ ۇسىنىلادى. قوعامدىق كەڭەستەرگە قوعامدىق باقىلاۋدىڭ ءارتۇرلى نىساندارىن جۇرگىزۋ ءۇشىن تاۋەلسىز ساراپشىلاردى تارتۋ مۇمكىندىگىن بەرۋ ۇسىنىلادى.
بريفينگ بارىسىندا ب.تلەپوۆ: «اقپارات جانە قوعامدىق دامۋ مينيسترلىگى قوعامدىق كەڭەستەر ماسەلەلەرى جونىندەگى ۋاكىلەتتى ورگان رەتىندە ايقىندالادى, ونىڭ قۇزىرەتىنە قوعامدىق كەڭەستەردىڭ قىزمەتىن ۇيلەستىرۋ جانە ادىستەمەلىك قامتاماسىز ەتۋدى جۇزەگە اسىرۋ كىرەدى», دەپ اتاپ ءوتتى.
مەملەكەت باسشىسىنا قوعامدىق كەڭەستەردىڭ قىزمەتى تۋرالى جىل سايىنعى ۇلتتىق باياندامانى دايىنداۋ جانە ەنگىزۋ ۇسىنىلادى. زاڭدا قوعامدىق كەڭەس قىزمەتىنىڭ جەكەلەگەن اسپەكتىلەرىن قارجىلاندىرۋ مودەلىن ەنگىزۋ ۇسىنىلدى, بۇل رەتتە قوعامدىق كەڭەستەردىڭ مۇشەلەرى ءوز قىزمەتىن قوعامدىق نەگىزدە جۇزەگە اسىراتىن بولادى, ال كەڭەستەردىڭ قىزمەتىن ۇيىمداستىرۋشىلىق قامتاماسىز ەتۋ ءتيىستى بيۋدجەت (رەسپۋبليكالىق جانە جەرگىلىكتى) ەسەبىنەن قارجىلاندىرىلاتىن بولادى. مەملەكەت باسشىسىنىڭ قازاقستان حالقىنا جولداۋىندا ايتىلعان تاپسىرماسىن ورىنداۋ شەڭبەرىندە كۆازيمەملەكەتتىك سەكتور سۋبەكتىلەرىندە قوعامدىق كەڭەستەر قۇرۋ بويىنشا تۇزەتۋلەر ەنگىزىلگەن, ولاردىڭ وكىلەتتىكتەرى, قۇقىقتارى مەن مىندەتتەرى بەلگىلەندى, ساندىق قۇرامى ايقىندالدى.
زاڭ جاڭالىقتارىنىڭ ءبىرى – قوعامدىق كەڭەستەر مۇشەلەرىنە مەملەكەتتىك ورگاندار مەن كۆازيمەملەكەتتىك سەكتور سۋبەكتىلەرى ساتىپ الۋ كوميسسيالارىنىڭ جۇمىسىنا قاتىسۋ قۇقىعىن بەرۋ بولىپ تابىلادى.
ەستەرىڭىزگە سالا كەتەيىك, قوعامدىق كەڭەستەر مەملەكەت پەن ازاماتتىق قوعام اراسىنداعى ديالوگ نىسانى رەتىندە «100 ناقتى قادام» ۇلت جوسپارىن جۇزەگە اسىرۋ اياسىندا قۇرىلعان بولاتىن.
