نۇر-سۇلتاندا بەيىندى مينيسترلىك پەن ەلىمىزدەگى ۇلتتىق وليمپيادالىق كوميتەتتىڭ جۇمىس بارىسىنداعى كەزدەسۋى ءوتتى. تاراپتار قازاقستاندىق سپورتشىلاردىڭ توكيو مەن بەيجىڭدەگى وليمپيادا ويىندارىنا جانە 2021-2022 جىلدارعا جوسپارلانعان وزگە دە كەشەندى جارىستارعا دايىندىعىن ءسوز ەتتى.
كەزدەسۋ بارىسىندا قازاقستانداعى بۇقارالىق سپورتقا قاتىستى وزەكتى ماسەلەلەر تالقىلاندى. سونداي-اق, ۇلتتىق قۇراما كوماندالاردىڭ وقۋ-جاتتىعۋ جيىنىن ۇيىمداستىرۋ جانە پاندەميا كەزىندە قازاقستاندىق اتلەتتەردىڭ وليمپياداعا ىرىكتەۋ تۋرنيرلەرىنە قاتىسۋ مۇمكىندىكتەرى دە نازاردان تىس قالعان جوق.
«مەملەكەت باسشىسى ءوزىنىڭ كەزەكتى جولداۋىندا بۇقارالىق سپورتتى قارقىندى دامىتۋدى تاپسىردى. قازىرگى تاڭدا وسكەلەڭ ۇرپاقتىڭ سپورتتىق جانە شىعارماشىلىق الەۋەتىنە ءجىتى نازار اۋدارۋ قاجەت. الەمدەگى سپورتتىڭ ماڭىزدىلىعى ءسات سايىن ارتىپ كەلەدى, ال ىندەت كەزىندە سپورتپەن اينالىسۋدىڭ الەۋمەتتىك سالماعى ءتىپتى زور. دەنە شىنىقتىرۋ مەن سپورتتى دامىتۋعا كۇش سالۋ ءبىزدىڭ مەملەكەتتەگى الەۋمەتتىك ساياساتتىڭ نەگىزگى بولشەگى سانالادى. سپورتپەن اينالىسۋ جاستاردى جاۋاپكەرشىلىككە, تولەرانتتىلىققا, ارىپتەستىك تانىتا بىلۋگە باۋلىپ, تۇلعانى الەۋمەتتەندىرۋگە جانە پاندەميا كەزىندە قوعامنىڭ قايتا قالپىنا كەلۋىنە تىكەلەي اسەر ەتەدى. وليمپيادا شىڭىنا شىققان سپورتشىلارىمىزدىڭ ءىرى جەتىستىگىنىڭ ءتۇپ نەگىزىندە بۇقارالىق بالالار سپورتى تۇرعانى ەشكىمگە دە قۇپيا ەمەس.
سوندىقتان, بۇقارالىق بالالار سپورتىن دامىتۋدى ءسوز قىلعاندا ماماندار پىكىرىنە ەرەكشە كوڭىل ءبولىپ, ۇلتتىق وليمپيادا كوميتەتى مەن شەتەلدەگى ۇزدىك تاجىريبەلەردى باستى باعداردا ۇستاۋ كەرەك. عالامدىق پاندەميا كەزىندە ءبىزدىڭ سپورتشىلاردىڭ وليمپيادا ويىندارىنا تولىققاندى جانە قاۋىپسىز دايىندالۋىنا جاعداي جاساۋ وتە ماڭىزدى. ويتكەنى, ولاردىڭ وليمپياداداعى بولاشاق جەڭىستەرى تالاي جىلدار بويى ءبىزدىڭ جاستارىمىز بەن بالالارىمىز ءۇشىن مىقتى موتيۆاتسيا جانە الەۋمەتتىك تابىستىڭ ۇلگىسى بولماق», دەپ اتاپ ءوتتى مادەنيەت جانە سپورت ءمينيسترى اقتوتى رايىمقۇلوۆا.
قازاقستان ۇلتتىق وليمپيادالىق كوميتەتىنىڭ باس حاتشىسى اندرەي كريۋكوۆ بەيىندى ۆەدومستۆو باسشىسىنا ۇلتتىق قۇراما كوماندالاردىڭ قازىرگى جاعدايى مەن دايىندىعى تۋرالى اقپار بەردى. بۇگىنگە دەيىن قازاقستاندىق سپورتشىلار سپورتتىڭ 17 تۇرىنەن 42 جولداما يەلەندى. وليمپيادا ويىندارىنىڭ ىرىكتەۋ كەزەڭدەرىنە دايىندىق پروتسەسى جالعاسۋدا.
«ۇوك الدىنداعى باستى مىندەتتەردىڭ ءبىرى – ۇلتتىق قۇراما كوماندالاردى COVID-19 ىندەتى كەزىندە الداعى وليمپيادا ويىندارىنا دايىنداۋ. وسى ورايدا, تاعى ءبىر قىزىقتى جايتتى ايتا كەتكەن ءجون. ءبىزدىڭ تاريحىمىزدا العاش رەت كەلەسى 12 ايدىڭ ىشىندە 2 وليمپيادا – قىسقى جانە جازعى ويىندار وتەدى. ادەتتە, بۇل سپورتتىق وقيعالاردىڭ اراسىن ءبىر جارىم جىل ءبولىپ تۇراتىن, الايدا, عالامدىق پاندەميا ءبىراز وزگەرىس ەنگىزدى. بۇگىندە ەكى جارىستىڭ اراسى نەبارى بەس ايدى قۇرايدى.
سوندىقتان, قىسقى جانە جازعى سپورت تۇرلەرىندەگى اتلەتتەردىڭ جارىسقا ءبىر مەزەتتە دايىندالۋى ەرەكشە كۇش-جىگەردى تالاپ ەتەدى. ءبىزدىڭ سپورتشىلارىمىز از ۋاقىتتىڭ ىشىندە بىرنەشە ىرىكتەۋ تۋرنيرلەرى مەن تۇراقتى جارىستارعا قاتىسۋى ءتيىس. ۇلتتىق قۇراما كوماندالار كۇنتىزبەسىندە ءارتۇرلى دەڭگەيدەگى 430 حالىقارالىق تۋرنير, ەلىمىز بەن شەتەلدەردە وتەتىن 640 وقۋ-جاتتىعۋ جيىنى جوسپارلانعان.
مۇنداي جاعدايدا بۇرىن قالىپتى كورىنگەن جايتتاردىڭ بارلىعىنا ەرەكشە تالاپ قويىلاتىنى انىق. قازاقستان ۇوك ءۇشىن سپورتشىلاردىڭ دەنساۋلىعىن ساقتاي وتىرىپ, جارىسقا قاۋىپسىز دايىندىق جۇمىستارىن جۇرگىزۋ باستى مىندەتتەردىڭ ءبىرى بولماق. ءبىزدىڭ بارلىق جۇمىسىمىز وسى ماقسات توڭىرەگىندە ءوربيدى.
ۇلتتىق قۇراما كوماندالاردىڭ جاتتىعۋ جيىنى مەن جارىسىن باقىلاۋعا ارنالعان جەدەل شتاب قۇرىلدى. سونىمەن قاتار, توكيو جانە بەيجىڭدەگى وليمپيادا ويىندارىنا قاتىساتىن قازاقستاندىق اتلەتتەرگە الەۋمەتتىك لوگيستيكانى ۇيىمداستىرۋ ماسەلەسى دە قاراستىرىلىپ جاتىر. ءبىزدىڭ ماماندار بارلىق پروتسەستى ءجىتى قاداعالاۋدا. ويىن الدىنداعى دايىندىق, وليمپياداعا قاتىسۋ, وليمپيادا اۋىلىنا بارىپ, ەلگە قاۋىپسىز قالپىندا ورالۋعا دەيىنگى جاعدايلار تۇگەل باقىلاۋدا.
قازىرگى باستى مىندەتىمىز – دايىندىقتى جالعاستىرىپ, جارىستى ءساتتى جانە قاۋىپسىز كۇيىندە اياقتاۋ. بارىمىزگە ورتاق ماقساتقا جەتۋ ءۇشىن ءبىز قولدان كەلگەننىڭ ءبارىن جاساۋدامىز. بۇگىندە ۇوك وليمپيادالىق سپورت تۇرلەرىنەن 39 سپورتتىق فەدەراتسيانىڭ باسىن بىرىكتىرگەن, حالىقارالىق فەدەراتسيالار مويىنداعان جانە سپورت تۇرلەرىنەن ناقتى بىلىمگە يە زاماناۋي قوعامدىق ۇيىمعا اينالدى. ءوز قاراجاتىمىزدىڭ ەسەبىنەن ءبىز ۇوك قىزمەتىن تسيفرلاندىرۋ پروتسەسىن جۇزەگە اسىرىپ جاتىرمىز.
ۇوك-تەگى بارلىق قۇجات اينالىمدارى ەلەكتروندى فورماتقا اۋىستىرىلعان, بارلىق تولەمدەر تەك ونلاين كۇيىندە جاسالادى, بيزنەس-پروتسەستەر, ونىڭ ىشىندە, باقىلاۋ مەحانيزمدەرى دە تسيفرلاندىرىلۋدا. ءىس-شارالاردى ۇيىمداستىرۋ كەزىندە جوبالىق ادىستەر جانە باسقا دا تەحنولوگيالار ەنگىزىلۋدە. تسيفرلاندىرۋ كەشىگۋدىڭ الدىن الىپ, بارلىق پروتسەستى جەڭىلدەتە تۇسەدى. بۇل جاڭاشىلدىقتىڭ بارلىعى تيىمدىلىكتى ارتتىرىپ, ورىنداۋشىلاردىڭ جاۋاپكەرشىلىگىن نىعايتادى», دەيدى ۇوك باس حاتشىسى اندرەي كريۋكوۆ.
سونىمەن قاتار, جيىن بارىسىندا سپورتتىق ءبىلىم بەرۋ, كادرلاردى دايىنداۋ جانە بىلىكتىلىكتى ارتتىرۋ ماسەلەلەرى دە نازاردان تىس قالعان جوق. دوپينگپەن كۇرەس جانە قازاقستاندىق دوپينگكە قارسى زەرتحاناعا WADA ليتسەنزياسىن قايتارۋ تۋرالى دا ءسوز قوزعالدى. قازىرگى تاڭدا زەرتحانا ءوز ستاتۋسىن قايتارۋ ءۇشىن جۇمىستانۋدا. جۇمىس بارىسىنداعى كەزدەسۋدىڭ باستى مىندەتى رەتىندە سپورتتى دامىتۋدىڭ ستراتەگيالىق ماقساتتارى, كۇردەلى سۇراقتاردى جانە سپورت سالاسىنداعى ماڭىزدى ماسەلەلەردى شەشۋ بولعانىن ايتا كەتۋ كەرەك.
ايتا كەتەلىك, قازاقستان ۇلتتىق وليمپيادالىق كوميتەتى 2018 جىلدان بەرى وليمپيادالىق سپورت تۇرلەرىنەن ۇلتتىق قۇراما كوماندالاردى دايىنداۋ جونىندەگى مەملەكەتتىك تاپسىرمانى ورىنداۋدا.
