جاڭا جىلدىڭ العاشقى جۇمىس كۇنى بىرىككەن ۇلتتار ۇيىمىنىڭ شتاب-پاتەرىندە قازاقستاننىڭ بۇۇ جانىنداعى تۇراقتى وكىلدىگى بۇۇ قاۋىپسىزدىك كەڭەسىنىڭ 2021-2022 جىلدارعا سايلانعان جاڭا مۇشەلەرىنىڭ تۋلارىن سالتاناتتى تۇردە ورناتۋ ءراسىمىن وتكىزدى.
بۇۇ قك زالىنىڭ الدىندا وزدەرىنىڭ ۇلتتىق جالاۋلارىن ءۇندىستاننىڭ, يرلانديانىڭ, كەنيانىڭ, مەكسيكانىڭ جانە نورۆەگيانىڭ تۇراقتى وكىلدەرى ورناتتى.
قاۋىپسىزدىك كەڭەسىنىڭ جاڭا جىلداعى جۇمىسىنىڭ العاشقى كۇنىندە ءراسىمدى وتكىزۋ ءداستۇرى قازاقستان –2018 جىلدىڭ قاڭتارىندا دۇنيەجۇزىلىك ۇيىمنىڭ وسى ورتالىق ورگانىنا توراعالىق ەتۋ كەزىندە نەگىزى قالاعان بولاتىن.
ءراسىمدى اشا وتىرىپ, قازاقستاننىڭ بۇۇ جانىنداعى تۇراقتى وكىلى ماعجان ءىلياسوۆ وتكەن جىل الەمنىڭ بارلىق ەلدەرى ءۇشىن قيىن بولعانىن اتاپ ءوتتى. 2021 جىلى تۇراقتى دامۋ, بەيبىتشىلىك پەن قاۋىپسىزدىك كوبىنە بۇۇ مەن ونىڭ قاۋىپسىزدىك كەڭەسىنىڭ شەشىمدەرىنە بايلانىستى بولاتىندىعىن باسا ايتىپ, ول 2020 جىلى العان ساباقتاردى تالداۋعا جانە ىنتىماقتاستىقتىڭ, ىمىراعا كەلۋدىڭ جانە جاھاندىق بەيبىتشىلىككە بەيىلدىلىگىنىڭ ۇلگىلەرىن بولاشاق جۇمىسىمىزدا قولدانۋعا شاقىردى.
«جاڭا جىل ءبارىمىز ءۇشىن جانە ءبىزدىڭ دۇنيەجۇزىلىك ۇيىمىمىز ءۇشىن ءۇمىت جىلى بولادى. ءبىزدىڭ ۇمىتتەرىمىزدى بارلىق ادامدار ءۇشىن شىنايى يگىلىكتەرگە جانە وڭ وزگەرىستەرگە اينالدىرۋ ءۇشىن ناقتى ءىس-قيمىل قاجەت», دەدى ەلشى قاۋىپسىزدىك كەڭەسىنىڭ سايلانعان مۇشەلەرىنە ارناعان سوزىندە.
ول ولارعا بۇۇ-نىڭ نەگىزگى ورگاندارىنىڭ بىرىندە بەلگىلەنگەن جۇمىس جوسپارلارىن جۇزەگە اسىرۋدا ساتتىلىك تىلەدى.
قازاقستاننىڭ تۇراقتى وكىلى سونىمەن قاتار كوروناۆيرۋستىق پاندەمياعا قارسى كۇرەستەگى ەرلىككە ادالدىعى ءۇشىن بۇكىل الەمدەگى مەديتسينا قىزمەتكەرلەرىنە, سونداي-اق عالىمدار مەن زەرتتەۋشىلەرگە COVID-19-قا قارسى ۆاكتسينالار جاساۋ جونىندەگى جىگەرلى كۇش-جىگەرى ءۇشىن ريزاشىلىعىن ءبىلدىردى.
قاۋىپسىزدىك كەڭەسىنىڭ توراعاسى, ءتۋنيستىڭ بۇۇ جانىنداعى تۇراقتى وكىلى تارەك لادەب قازاقستانعا ءىس-شارانى ۇيىمداستىرعانى ءۇشىن العىس ايتتى. ونىڭ ايتۋىنشا, پاندەميا جاعدايىنداعى جۇمىستىڭ كۇردەلەنە تۇسكەنىنە قاراماستان, بۇل ءراسىم قاۋىپسىزدىك كەڭەسىنىڭ جاڭا تۇراقتى ەمەس مۇشەلەرىنە سالتاناتتى جاعدايدا جاھاندىق بەيبىتشىلىك پەن قاۋىپسىزدىكتى ساقتاۋ بويىنشا ءوز مانداتتارىن ورىنداۋدى باستاۋعا مۇمكىندىك بەردى.
ءوز كەزەگىندە ءۇندىستاننىڭ, يرلانديانىڭ, كەنيانىڭ, مەكسيكانىڭ جانە نورۆەگيانىڭ تۇراقتى وكىلدەرى 2021-2022 جىلدارعا ارنالعان كەڭەستەگى جۇمىسىنىڭ باسىمدىقتارى تۋرالى ءسوز سويلەدى.
قازاقستاننىڭ باستاماسىنان بۇرىن قاۋىپسىزدىك كەڭەسىنىڭ زالى الدىندا بۇۇ قاۋىپسىزدىك كەڭەسى تۇراقتى ەمەس مۇشەلەرىنىڭ تۋلارىن اۋىستىرۋى تەحنيكالىق ءراسىمى بولدى. جاڭا ءداستۇردى ەنگىزۋىمەن بۇل ءراسىم بۇقارالىق اقپارات قۇرالدارى وكىلدەرىنىڭ قاتىسۋىمەن كەڭەستىڭ جىل-سايىنعى باعدارلاماسىنىڭ ءبىرىنشى جۇمىس كۇنىندەگى رەسمي ءىس-شاراعا اينالدى.
2019 جىلى قاڭتاردا قازاقستاننىڭ تۇراقتى وكىلدىگى بۇۇ قاۋىپسىزدىك كەڭەسى مۇشەلەرىنىڭ تۋلارى ءۇشىن قازاقستاندا جاسالعان جانە قازاق ۇلتتىق ويۋلارمەن بەزەندىرىلگەن ارنايى تۇعىرلار سىيلادى
