قازاق ۇلتتىق اگرارلىق زەرتتەۋ ۋنيۆەرسيتەتىنىڭ رەكتورى تىلەكتەس ەسپولوۆ قوناقتارعا ۋنيۆەرسيتەتتە اتقارىلىپ وتىرعان اۋىقىمدى جۇمىستار بارىسىن بايانداپ, الداعى جوسپارلارىمەن ءبولىستى. ءوز كەزەگىندە سەناتورلار اگرارلىق سالا سالا ماماندارىمەن بىرگە مەملەكەت باسشىسى ايقىنداعان مىندەتتەمەلەردى جۇزەگە اسىرۋ بارىسىندا اۋىلشارۋاشىلىق وندىرىسىنە IT-تەحنولوگيالاردى ەنگىزۋ, عىلىمي جاڭالىقتاردى وندىرىستە پايدالانۋ, ينۆەستيتسيا تارتۋ جانە اۋىلشارۋاشىلىعىنا بىلىكتى ماماندار دايارلاۋ ءىسىن دامىتۋ ماسەلەلەرىن تالقىلادى.
دەپۋتاتتار ۆاگەنينگەن ۋنيۆەرسيتەتىمەن (نيدەرلاندى) جۇمىس جونىندەگى ينستيتۋتتىڭ جانە فرانتسيانىڭ مونپەلە ۋنيۆەرسيتەتىمەن بىرلەسكەن ءسۇت جانە ءسۇت ونىمدەرىنىڭ رەفەرەنتتىك زەرتحاناسىنىڭ اشىلۋ راسىمىنە قاتىستى. سونىمەن قاتار اگروونەركاسىپتىك كەشەندەگى ۇزدىك يننوۆاتسيالىق تەحنولوگيالار مەن جاڭا بىلىمدەردى ىزدەستىرۋ, تارتۋ جانە ترانسفەرتتەۋدى ىسكە اسىراتىن حالىقارالىق اگروتەحنولوگيالىق حاب جۇمىسىمەن دە تانىستى.
– قازاق ۇلتتىق اگرارلىق زەرتتەۋ ۋنيۆەرسيتەتى اگرارلىق ءبىلىم بەرۋ, عىلىم جانە ءوندىرىستى ينتەگراتسيالاۋ بويىنشا جۇيەلى جۇمىس جۇرگىزىپ, جاڭا بەلەسكە كوتەرىلىپ, يننوۆاتسيالىق باعىتتا دامىپ كەلەدى. حالىقارالىق جانە ۇلتتىق رەيتينگتەردە لايىقتى ورىن الاتىن ۋنيۆەرسيتەت قازاقستاندا جانە تمد ەلدەرىنە كەڭىنەن تانىمال. ۇجىمنىڭ ەندىگى ماقساتى – الەمدىك ءبىلىم بەرۋ كەڭىستىگىندە ءوز ورنىن ايقىنداپ, الەمدىك دەڭگەيدەگى جوعارى وقۋ ورنىنا اينالۋ. وقۋ ورنىندا اشىلعان جاڭا يننوۆاتسيالىق ورتالىقتار مەن زەرتحانالار باسەكەگە قابىلەتتى, ساپالى مامانداردى دايارلاۋعا جانە اگرارلىق نارىقتا سۇرانىسقا يە عىلىمي جوبالاردى ءتيىمدى ورىنداۋعا مۇمكىندىك بەرەدى, دەيدى سەنات توراعاسىنىڭ ورىنباسارى نۇرلان ءابدىروۆ.
ەسكە سالساق, 2020 جىلى ۋنيۆەرسيتەتكە ۇكىمەت قاۋلىسىمەن «ۇلتتىق زەرتتەۋ ۋنيۆەرسيتەتى» مارتەبەسى بەرىلدى. ۋنيۆەرسيتەت باسشىلىعىنىڭ ايتۋىنشا, قازىر ستۋدەنتتەردى زامانعا جانە الەمدىك تەحنولوگيا تالاپتارىنا ساي ەتىپ وقىتۋ جانە تاربيەلەۋ باستى نازارعا الىنىپ وتىر.
