«ۇلاعاتتى ۇرپاق» جوباسىنىڭ ارتىقشىلىعى – كەز كەلگەن ۋاقىتتا جانە كەز كەلگەن جەردە قولجەتىمدىلىگى. مۇندا ءسىز قازاقستاننىڭ قاسيەتتى جەرلەرىنە ۆيرتۋالدى ەكسكۋرسيالارمەن بىرگە وپەرا, بالەت, درامالىق ونەردىڭ ۇزدىك ۇلگىلەرىن, قىزىقتى وتاندىق جانە شەتەلدىك فيلمدەر مەن مۋلتفيلمدەردى كورە الاسىز جانە تاڭعاجايىپ مۋزىكالىق تۋىندىلاردى تىڭداي الاسىز. جاس كورەرمەندەرگە ۇزاقتىعى 15 مينۋتتان اسپايتىن بەينەساباقتار, ونىڭ ىشىندە تەوريالىق دارىستەر مەن پراكتيكالىق تاپسىرمالار ۇسىنىلادى. بۇل – وقۋشىلار ءۇشىن كەرەمەت مۇمكىندىك. توقسان سايىن جاڭا ساباقتار ەنگىزىلەدى. مىسالى, ەكىنشى توقساندا حالقىمىزدىڭ ۇلتتىق اسپاپتارى دومبىرا مەن قوبىز ۇيرەتىلسە, كەلەسى توقساندا قولونەر ساباعىنان قىشپەن قۇمىرا جاساۋ دارىستەرى قوسىلادى.
وقۋشىلارعا مۋزىكا ونەرى باعىتى بويىنشا الەمدىك جانە قازاق مۋزىكاسىنىڭ دامۋى مەن قالىپتاسۋى, الۋان ءتۇرلى اسپاپتاردىڭ شىعۋ تاريحى, ونداعى ۇلتتتىق مۋزىكا سالاسىنىڭ وركەندەۋىنە ۇلەس قوسقان اتاقتى سازگەرلەر مەن تالانتتى ونەرپازدار تۋرالى قازاقستاننىڭ ەڭبەك ەرى, حالىق ءارتىسى ا.مۇساحودجاەۆا, حالىق ءارتىسى گ.مىرزابەكوۆا, قازاقستاننىڭ ەڭبەك سىڭىرگەن قايراتكەرى ت.زابيروۆا, س.نۇرمولداەۆ سىندى كاسىپقوي مۋزىكانتتاردىڭ لەكتسيالارىندا ايتىلادى. مۋزىكا ونەرىن زەرتتەپ, قىزىعۋشىلىق تانىتقان ءار بالاعا بۇل جان-جاقتى اقپارات بەرەدى.
بەينەلەۋ ونەرى باعىتىندا كەسكىندەمە, ءمۇسىن, گرافيكا تۇرلەرىن ۇيرەنۋگە مۇمكىندىك مول. كوركەم ونەردىڭ بۇل سالاسى وقۋشىلارعا دۇنيەنى بايقاۋ, باقىلاۋ, كورۋ, سەزىنۋ ناتيجەسىندە اسەم بەينە جاساۋدى تۇسىندىرەدى. سونىمەن قاتار بالالارعا اكۆارەل, گۋاش بوياۋلارىمەن سۋرەت سالۋ جانە ەرمەكسازبەن ءمۇسىن جاساۋ ادىستەرى ۇيرەتىلەدى. وقۋشى بەينەلەۋ ونەرىنىڭ تاريحىمەن, الەمگە ايگىلى قىلقالام شەبەرلەرىنىڭ تاڭعاجايىپ تۋىندىلارىمەن, ونىڭ ىشىندە قازاق بەينەلەۋ ونەرىنىڭ نەگىزىن قالاعان, قازاقستاننىڭ حالىق سۋرەتشىسى ءابىلحان قاستەەۆتەن باستاپ قازىرگى زاماناۋي وتاندىق سۋرەتشىلەردىڭ جۇمىستارىمەن تانىسا الادى. بەينە-دارىستەردە جەر شارىنىڭ تۇكپىر-تۇكپىرىندە ورنالاسقان ءتۇرلى مۋزەيلەرگە ساياحاتتايدى. ايتىلاتىن كونە دەرەكتەر مەن تىڭ اقپاراتتار ت.جۇرگەنوۆ اتىنداعى قازاق ۇلتتىق ونەر اكادەمياسى پروفەسسورى و.باتۋرينا, مۋزىكاتانۋشى ي.درۋجينينا جانە ءا.قاستەەۆ اتىنداعى ونەر مۇراجايى قىزمەتكەرلەرى گ.جۇبانوۆا, ا.ەلەۋوۆا جانە گ.قايىربەكوۆا سياقتى كاسىبي مامانداردىڭ لەكتسيالارىندا تولىعىراق ايتىلادى.
كينەماتوگرافيا باعىتىندا الەم كينوسىنىڭ تاريحى, قازاق كينەماتوگرافياسى, «قازاقفيلم» كينوستۋدياسىنىڭ العاشقى فيلمدەرى, كينو الاڭى دەڭگەيىنىڭ تۇرلەنۋى قازاقستاننىڭ كينوسىنشىلار قاۋىمداستىعىنىڭ پرەزيدەنتى گ.ابىكەەۆا, قازاقستاننىڭ ەڭبەك سىڭىرگەن قايراتكەرلەرى ا.ماەميروۆ, ا.بەرمۇحامبەتوۆا, ب.ايتجانوۆ, ءا.احمەتوۆ, ا.نوگەربەك, ا.وتەپبەرگەن سىندى كينومامانداردىڭ لەكتسيالارىندا قامتىلادى. ەسكى كينوتاسپالار مەن جاڭا بەينەماتەريالدار, انيماتسيالىق مۋلتفيلمدەر وقۋشىلار نازارىنا ۇسىنىلادى.
تەاتر ونەرى باعىتى بويىنشا وقۋشىلار تەاتر, رەجيسسۋرا, دراماتۋرگيا, سپەكتاكل, ستسەنوگراف-سۋرەتشىلەر, سونىمەن قاتار قازاق تەاترىنىڭ قالىپتاسۋى تاريحىنا قانىعىپ, تەاتر سالاسىنىڭ دامۋىنا ەلەۋلى ۇلەس قوسقان تۇلعالاردىڭ شىعارماشىلىعى مەن اكتەرلىك شەبەرلىگىنەن ماعلۇمات الادى. تەاتر الەمىنىڭ سيقىرعا تولى مەكەنىنە ساپار شەگەدى. جاڭا تەرميندەر مەن قىزىقتى اقپاراتتار قازاقستاننىڭ ەڭبەك سىڭىرگەن قايراتكەرلەرى ءا.راحيموۆ, ا.كاكىشوۆا, ب.ءابدىلمانوۆ, مادەنيەت قايراتكەرى م.جاكەنوۆا جانە باسقا دا تانىمال ونەر ادامدارىنىڭ لەكتسيالارىندا ايتىلادى.
بۇل جوبانىڭ ءساتتى جۇزەگە اسۋىنا ەلىمىزدىڭ ماڭدايالدى مادەنيەت وشاقتارىنىڭ ءبارى بەلسەندى اتسالىسىپ كەلە جاتىر. «ۇلاعاتتى ۇرپاق» ونلاين-وقىتۋ پورتالىنىڭ اۋديتورياسى كۇن ساناپ كوبەيىپ كەلەدى. تەك 4 قازاننان باستاپ 1 جەلتوقسانعا دەيىن پورتالداعى بەينەدارىستەردىڭ جالپى قارالىمى 1 ملن 300 مىڭنان اسىپ كەتكەن. ال بۇگىنگە دەيىن ونلاين-وقىتۋ باعدارلاماسىنا 10 مىڭعا جۋىق مەكتەپ وقۋشىلارى تىركەلگەن.
وسىنداي جوبالاردىڭ نەگىزىندە وقۋشىلار عاسىرلار بويى جيناقتالعان, ۋاقىت سىنىنان ءوتىپ, سارالانعان الەمدىك ونەردىڭ باي قازىناسىن, مول تاجىريبەسىن بويىنا سىڭىرەدى. ويتكەنى جاستار الەمدىك اقىل-ويدىڭ مادەنيەتى مەن ءداستۇرلى نەگىزدەرىن مەڭگەرگەندە عانا وزىق ويلاۋ جۇيەسى قالىپتاساتىنى انىق.
نارگيز تامابەكقىزى,
م.اۋەزوۆ اتىنداعى قازاق مەملەكەتتىك اكادەميالىق دراما تەاترى مۋزەيىنىڭ جەتەكشىسى
