وتكەن ايدا پرەزيدەنت مۋن چجە ين تۋدىڭ تومەن دەڭگەيىمەن كۇرەسكە باعىتتالعان بىرنەشە ستراتەگيانى ىسكە قوسقان. ونىڭ ىشىندە وتباسىلار ءۇشىن اقشالاي ىنتالاندىرۋ دا بار. جاڭا جۇيەگە سايكەس, 2022 جىلدان باستاپ جاڭا تۋعان ءار بالاعا دۇنيەگە كەلگەنگە دەيىنگى شىعىنداردى وتەۋ ءۇشىن 2 ميلليون ۆون (1850 دوللار) اقشالاي بونۋس بەرىلەدى, سونىمەن قاتار بالا ءبىر جاسقا تولعانعا دەيىن اي سايىن 300 000 ۆون تولەنەدى. ىنتالاندىرۋ 2025 جىلدان باستاپ اي سايىن 500 000 ۆونعا دەيىن ارتپاق.
بۇل ماسەلەگە وڭتۇستىك كورەيادا ايەلدەردىڭ جۇمىس پەن جەكە ءومىرىنىڭ اراسىنداعى تەپە-تەڭدىكتى ساقتاي الماۋى سەبەپ بولۋى مۇمكىن كورىنەدى. قارتايعان قوعام جانە دەموگرافيالىق ساياسات جونىندەگى پرەزيدەنتتىك كوميتەت دايىنداعان پاكەت ون جىلدان استام ۋاقىتتان بەرى ازيانىڭ ءتورتىنشى ءىرى ەكونوميكاسى اتانىپ كەلە جاتقان وڭتۇستىك كورەيانىڭ تومەن بالا تۋ دەڭگەيىن ىنتالاندىرۋ ءۇشىن جاسالعان ۇكىمەتتىك باستامالارىنىڭ ءبىر بولىگى بولىپ وتىر. سونداي-اق ەل ۇكىمەتى تابىسى تومەن ۇشەۋدەن كوپ بالاسى بار وتباسىلاردىڭ بالالارىنىڭ ۋنيۆەرسيتەتتەردەگى وقۋ اقىسىن تولەپ بەرەدى.
ماماندار ايەل ادامداردىڭ بالا تۋعا اسا جاۋاپكەرشىلىكپەن كەلۋىنە وزگە دە الەۋمەتتىك ماسەلەلەر سەبەپ بولعانىن ايتۋدا. زەرتتەۋشىلەر جاعداي وسىلاي جالعاسسا, شامامەن 52 ميلليون حالقى بار ەلدىڭ دەنساۋلىق ساقتاۋ جانە زەينەتاقى جۇيەسىنە جۇكتەمە ارتاتىنىن, سالىق تۇسىمدەرىنىڭ تومەندەپ, جۇمىس كۇشىنىڭ جەتىسپەۋشىلىگى بايقالاتىنىن بولجايدى. سونداي-اق ەگدە جاستاعى ادامدار سانىنىڭ ءوسۋى قان تاپشىلىعىن دا تۋدىرۋى مۇمكىن.
