قارجى مينيسترلىگى مەملەكەتتىك كىرىستەر كوميتەتىنىڭ جالپى دەكلاراتسيا ءبولىمىنىڭ باسشىسى دينا قۇسايىنوۆانىڭ ايتۋىنشا, جاپپاي دەكلاراتسيالاۋدىڭ باستى ماقساتى – كولەڭكەلى ەكونوميكامەن, جەمقورلىقپەن كۇرەسۋ جانە ەل بيۋدجەتىن تولتىرۋ.
– جاپپاي دەكلاراتسيالاۋ ەلدىڭ ءاربىر ازاماتىنىڭ ءومىر ساپاسىن كۇشەيتە الاتىن كوپتەگەن مۇمكىندىكتەرگە يە. 2021 جىلدىڭ 1 قاڭتارىنان باستاپ ءبىز جالپى دەكلاراتسيالاۋ جۇيەسىنە ەنەمىز. العاشقى كەزەڭدە مەملەكەتتىك قىزمەتشىلەر مەن ولاردىڭ جۇبايلارى, سونداي-اق ولارعا تەڭەستىرىلگەن ادامدار مەن ولاردىڭ جۇبايلارى تابىسىن تاپسىرادى, – دەدى قۇسايىنوۆا AntikorLive بريفينگىندە.
جاپپاي دەكلاراتسيالاۋدىڭ ارقاسىندا مەملەكەتتىك قىزمەتكەرلەردىڭ وسى ۋاقىتقا دەيىن جاسىرىپ كەلگەن اكتيۆتەرى جاريا بولادى. سونداي-اق دەكلاراتسيا تاپسىرۋشى دەبيتورلىق-كرەديتتىك قارىزىن, قىمبات تۇراتىن مۇلكىن, ينۆەستيتسيالىق التىندارىن, جەكە مەنشىگىن, اۆتورلىق قۇقىعىن, قولما-قول اقشاسىن دا اتاپ كورسەتۋى ءتيىس. 1 قاڭتاردان باستاپ دەكلاراتسيا تاپسىراتىن ازامات 2020 جىلدىڭ 31 جەلتوقسانداعى جاعداي بويىنشا وزىنە تيەسىلى بۇكىل اكتيۆ پەن مىندەتتەمەلەردى اشىپ كورسەتەدى.
1 قاڭتاردان باستاپ مىنا ازاماتتار دەكلاراتسيا تاپسىرادى: جاۋاپتى مەملەكەتتىك قىزمەتتى اتقارۋشىلار جانە ونىڭ جۇبايلارى; مەملەكەتتىك فۋنكتسيالاردى ورىنداۋعا وكىلەتتى تۇلعالار جانە ولاردىڭ جۇبايلارى; مەملەكەتتىك فۋنكتسيالاردى ورىنداۋعا وكىلەتتى تۇلعالارعا تەڭەستىرىلگەن تۇلعالار جانە ولاردىڭ جۇبايلارى; سونداي-اق قر كونستيتۋتسيالىق, قر سايلاۋ تۋرالى جانە جەمقورلىققا قارسى كۇرەس تۋرالى, بانك جانە بانك قىزمەتى تۋرالى, ساقتاندىرۋ قىزمەتى تۋرالى زاڭدارىنا سايكەس دەكلاراتسيا ۇسىنۋ بويىنشا مىندەتتەر جۇكتەلگەن تۇلعالار.
جاپپاي دەكلاراتسيالاۋدىڭ ەكىنشى كەزەڭى 2023 جىلدىڭ 1 قاڭتارىنان باستالادى. ول كەزدە مەملەكەتتىك كاسىپورىنداردىڭ قىزمەتكەرلەرى ء(بىلىم بەرۋ, دەنساۋلىق ساقتاۋ, مادەنيەت, سپورت جانە باسقا سالالاردى قوسا العاندا) جانە ولاردىڭ جۇبايلارى تاپسىرادى. ءۇشىنشى كەزەڭدە – 2024 جىلدىڭ 1 قاڭتارىنان باستاپ زاڭدى تۇلعالاردىڭ باسشىلارى مەن قۇرىلتايشىلارى جانە ولاردىڭ جۇبايلارى, دارا كاسىپكەرلەر مەن ولاردىڭ جۇبايلارى تابىستارىن اشىپ كورسەتە باستايدى. حالىقتىڭ قالعان ساناتتارى 2025 جىلدىڭ 1 قاڭتارىنان باستاپ جاپپاي دەكلاراتسيالاۋعا قاتىسادى.
«بۇل رەتتە ءاربىر كەزەڭنىڭ قورىتىندىلارى تالدانىپ, پروبلەمالىق ماسەلەلەر انىقتالاتىنىن جانە زاڭنامانى, ءادىسنامانى جانە اقپاراتتىق جۇيەلەردى جەتىلدىرۋ بويىنشا شارالار قابىلداناتىنىن اتاپ ءوتۋ ماڭىزدى» دەلىنگەن ەلەكتروندى ۇكىمەت پورتالىندا كەلتىرىلگەن دەرەكتە.
دەكلاراتسيا تاپسىرۋشىلار 15 شىلدەگە دەيىن قاعاز جۇزىندە, 15 قىركۇيەكتەن كەشىكتىرمەي ەلەكتروندى تۇردە تابىسى تۋرالى اقپاراتتى تاپسىرا الادى.
