ەل پرەزيدەنتى قاسىم-جومارت توقاەۆ تا جولداۋدا سالىق سانى تىم كوبەيىپ كەتكەنىن ايتقان.
«قازىر 40-قا جۋىق ءتۇرلى سالىق پەن تولەمدەر بار. ۇكىمەتكە «اتامەكەن» ۇكپ-مەن بىرلەسىپ دەپۋتاتتىق كورپۋستى قاتىستىرا وتىرىپ سالىق مىندەتتەمەلەرىن تۇبەگەيلى جەڭىلدەتۋ جانە سالىقتار مەن تولەمدەر سانىن ازايتۋ ءۇشىن سالىق كودەكسى مەن زاڭعا تاۋەلدى اكتىلەردى قايتا قاراۋدى تاپسىرامىن» دەگەن بولاتىن مەملەكەت باسشىسى.
جاقىندا عانا سالىق كودەكسىنە ەنگەن وزگەرىس بويىنشا, 1 قاڭتاردان باستاپ قوسىمشا قۇن سالىعى بويىنشا ەسەپكە قويۋدىڭ شەكتى مولشەرى 30 مىڭ اەك-تەن 20 مىڭ اەك-كە دەيىن قىسقارادى. ال بيىلدان باستاپ كوپقاباتتى ءۇي تۇرعىندارى جەر سالىعىن تولەۋدەن بوساتىلادى. وسىعان دەيىن ولار اتالعان سالىقتى تولەپ كەلگەن بولاتىن.
سونىمەن قاتار مەملەكەت كولىك سالىعىن تولەۋ مەرزىمىن دە ۇزارتتى. بىلتىر 2020 جىلدىڭ 31 جەلتوقسانىنا دەيىن تولەپ ۇلگەرۋى كەرەك بولسا, ەندى ول مەرزىم 2021 جىلدىڭ 1 ساۋىرىنە دەيىن ۇزارتىلدى.
2021 جىلدان باستاپ قازاقستاندىقتار زەينەتاقى قورىنداعى جيناعان قاراجاتىنىڭ ءبىر بولىگىن الىپ, ونى تۇرعىن ءۇي جاعدايىن جاقسارتۋعا, ەمدەلۋگە پايدالانا الادى. قازىر بۇل باستامانى رەتتەۋمەن «وتباسى بانكى» اينالىسىپ جاتىر. وسى ورايدا جيناقتان اقشا الۋ كەزىندە اتالعان قاراجاتتىڭ 10 پايىزى جەكە تابىس سالىعى رەتىندە ۇستالاتىنى حابارلاندى. ءدال وسى ەرەجە قوعامدا اجەپتاۋىر شۋ تۋدىردى. دەگەنمەن قوعام قارسىلىعىنا قاراماستان زاڭ جوباسى ءبارىبىر قابىلدانباق. ياعني, ازاماتتار جەكە تابىس سالىعىن تولەيدى, الايدا بىردەن ەمەس. اتالعان تولەمدى زەينەت دەمالىسىنا شىققاننان كەيىن ءبولىپ تولەۋ قاراستىرىلىپ وتىر.
ەندى ەل تۇرعىندارى م ۇلىك پەن جەر سالىعىن بىرگە تولەيدى. سول ارقىلى اتالعان سالىق ءتۇرىن تولەۋ پروتسەسى جەڭىلدەتىلىپ وتىر.
پاندەمياعا بايلانىستى بىلتىر كىشى جانە شاعىن بيزنەس ۇجىمدىق تابىس سالىعى, جەكە تابىس سالىعى, الەۋمەتتىك جانە بىرىڭعاي جەر سالىعىن تولەۋدەن بوساتىلعان ەدى. مەملەكەت سونداي-اق بيزنەستى تەكسەرۋگە قاتىستى دا موراتوري جاريالادى. اتالعان شارا 2022 جىلدىڭ سوڭىنا دەيىن كۇشىندە بولادى. سونداي-اق شاعىن جانە ورتا بيزنەس تە سالىقتان جانە جالاقى قورىنىڭ تولەمدەرىنەن بوساتىلدى.
2021 جىلى ايلىق ەسەپتىك كورسەتكىش (اەك) مولشەرى 2917 تەڭگەنى قۇرايدى. ال بازالىق الەۋمەتتىك تولەمدەر مولشەرىن ەسەپتەۋ ءۇشىن كۇنكورىستىڭ ەڭ تومەنگى مولشەرى 34 302 تەڭگە بولىپ بەكىتىلگەن. 2021 جىلى ەڭ تومەنگى جالاقى مولشەرى 42 500 تەڭگە كۇيىندە قالا بەرەدى. 1 قاڭتاردان باستاپ تومەنگى مەملەكەتتىك بازالىق زەينەتاقى تولەمى 18 524 تەڭگە. بۇل رەتتە مينيمالدى زەينەتاقى مولشەرى – 43 272 تەڭگە.
