«جىل تابالدىرىقتان اتتادى. بارشا وتانداستارىمىز جاڭا جىلدى قازىرگى جاعدايعا سايكەس قاۋىپسىزدىك شارالارىن ساقتاي وتىرىپ ءوز شاڭىراقتارىندا قارسى الدى. بۇرىنعىداي ءۇي-ۇيگە قوناققا بارىپ, قالانى ارالاپ, الاڭعا جينالىپ, مەرەكەلىك كوڭىل-كۇيدىڭ جوعارى نوتاسىن ۇستاپ جۇرەتىندەي ەمەس», دەپ جازدى بەرىك ءۋالي.
ول وسى ورايدا وتاندىق تەلەارنالار حالىققا ۋاقىتتى ءتيىمدى وتكىزۋدىڭ جولىن ۇسىنىپ, مەرەكەلىك باعدارلامالار جاساعانىن ايتىپ ءوتتى.
«بارلىق باعدارلامالاردىڭ باسىنان سوڭىنا دەيىن ءان مەن ءازىل, تانىمدىق اقپارات قاتار ءورىلىپ, جۇرتقا جاڭاجىلدىق كوڭىل-كۇي سىيلاي الدى. وتاندىق ەسترادا جۇلدىزدارى وسىناۋ قيىن كەزدە ەكراننىڭ ارعى بەتىنەن حالىقتىڭ كوڭىلىن كوتەرىپ, اقجارما تىلەكتەرىن اۋەزدى اۋەنمەن جەتكىزدى. ناعىز مەرەكەلىك اتموسفەرانى قالىپتاستىرا الدى. ءبىر باعدارلامانىڭ ارتىندا تۇتاس ۇجىمنىڭ ۇلكەن ەڭبەگى جاتقانىن بىلەمىز. ەڭبەك اقتالدى, باعدارلامالار كورەرمەن كوڭىلىنەن شىقتى دەپ سەنەمىز. وسى ورايدا, مەملەكەت باسشىسى قاسىم-جومارت كەمەل ۇلى وتاندىق تەلەارنالارداعى باعدارلامالاردى كورىپ, كوڭىلى تولىپ, ريزاشىلىعىن ءبىلدىرىپ جاتقانىن ايتقىم كەلەدى», دەلىنگەن جازبادا.
