باتىردىڭ اكەسىنىڭ قۇرمەتىنە قويىلعان «مومىش» بۇلاعى كۇنى بۇگىنگە دەيىن بار. بۇل جەر بۇگىندە كوپشىلىكتىڭ كەلىپ, ءتاۋ ەتەتىن جەرىنە اينالعان. ەندى باتىردىڭ مەرەيتويىنا وراي, اتالعان بۇلاق باسىنا باراتىن ءبىر شاقىرىمعا جۋىق جولعا شاعالتاس توسەلىپ, تەگىستەلدى. بۇلاق باسى قورشالىپ, ءسان اعاشتارى وتىرعىزىلعان. مۇنىڭ ءبارى دە دەمەۋشىلەردىڭ كومەگىمەن جۇزەگە اسىپ وتىر. سونداي-اق مۇندا ارنايى بوي كوتەرگەن ستەللانىڭ اشىلۋ سالتاناتى ءوتتى. شارا بارىسىندا «جۋالى» مەشىتىنىڭ يمامى سەيىتقازى قاجى مەدەتبەك قاسيەتتى قۇران اياتتارىن وقىپ, باتىر رۋحىنا دۇعا جاسادى. ال اۋداننىڭ قۇرمەتتى ازاماتى امانجول قاجى ءدۇرالى ۇلى كوپشىلىككە اق باتاسىن بەردى.
سونىمەن قاتار جۋالى اۋدانىنىڭ اۋماعىندا ورنالاسقان قازاقستان رەسپۋبليكاسى ۇلتتىق قاۋىپسىزدىك كوميتەتى شەكارا قىزمەتىنىڭ جامبىل وبلىستىق دەپارتامەنتىنە قاراستى «باۋىرجان مومىش ۇلى» اتىنداعى شەكارا بولىمشەسىندە باتىر ءبيۋستى اشىلدى. جيىندا شەكارا بولىمشەسىنىڭ جەكە قۇرامى مەرەكەلىك ساپقا تۇرعىزىلىپ, مەملەكەتتىك گيمن شىرقالدى. شاراعا قاتىسقان جامبىل وبلىسى اكىمىنىڭ ورىنباسارى تالعات ماماەۆ, جۋالى اۋدانىنىڭ اكىمى نارباي ەرگەبەكوۆ, شەكارا قىزمەتى جامبىل وبلىستىق دەپارتامەنتىنىڭ باسقارما باستىعى قاناتبەك تىنىبەكوۆ شەكاراشىلار مەن جينالعان جۇرتشىلىقتى باۋىرجان مومىش ۇلىنىڭ 110 جىلدىعىمەن قۇتتىقتادى. سونداي-اق باتىر ءبيۋستىنىڭ لەنتاسى قيىلدى.
جامبىل وبلىسى
