ءبىلىم • 31 جەلتوقسان، 2020

گۇلشارا ابدىقالىقوۆا ۇزدىك ۇستازداردى ماراپاتتادى

120 رەت كورسەتىلدى

بۇگىن وبلىس اكىمى گۇلشارا ابدىقالىقوۆا «مارتەبەلى ۇستاز – ەل مەرەيى» اتتى وبلىستىڭ تابىستى ۇستازدارىن ماراپاتتاۋ راسىمىنە قاتىستى، دەپ حابارلايدى Egemen.kz

مۇرات جەتپىسباەۆ

پەداگوگتاردىڭ كاسىبي قىزمەتىن قولداۋ مەن ءبىلىم سالاسىنداعى ەلەۋلى ەڭبەگىنە وراي ۇستازدار اراسىندا العاش رەت ايماقتىڭ ەرەكشە توسبەلگىسى تاعايىندالىپ وتىر. جۇزدەن اسا ۇستاز قاتىسقان كونكۋرستا وزىپ شىققاندار وسى ماراپاتقا يە بولدى.

جيىندا ايماق باسشىسى باسەكەگە قابىلەتتى ۇرپاق تاربيەلەۋدە ۇستازداردىڭ ورنى ەرەك ەكەنىن، بۇل ماراپات ۇستازدارعا ەرەكشە سەرپىن بەرەتىنىن ەرەكشە اتاپ ءوتىپ، پەداگوگتاردى قۇتتىقتادى.

– «ۇستازدىق ەتكەن جالىقپاس، ۇيرەتۋدەن بالاعا» دەگەن ۇلى ابايدىڭ تەڭەۋ ءسوزى وزدەرىڭىزدەي جاڭاشىل ۇستازدارعا ارنالعانداي. سىزدەردىڭ بۇگىنگى جاس ۇرپاققا بەرىپ جاتقان بىلىمدەرىڭىز بەن تاربيەلەرىڭىز ولاردى بولاشاققا باستايتىن تۋرا جول، ايقىن باعىت. جاس ۇرپاققا ءبىلىم مەن تاربيە بەرۋدەگى تابىستارى، جەتىستىكتەرىمەن ەرەكشەلەنگەن ۇستازداردى بۇگىن ماراپاتتايمىز. بۇل قۇرمەت ايماعىمىزدىڭ بارلىق ۇستازدارىنىڭ الداعى جۇمىستارىنا ۇلكەن سەرپىن بەرەدى دەپ ويلايمىن، – دەدى وبلىس اكىمى.

سالتاناتتى شارادا كونكۋرستىق كوميسسيا شەشىمى نەگىزىندە لايىقتى 12 ۇستاز «قىزىلوردا وبلىسىنىڭ ءبىلىم بەرۋ سالاسىن دامىتۋداعى ەڭبەگى ءۇشىن» توسبەلگىسىنىڭ يەگەرى اتاندى. ولاردىڭ قاتارىندا №23 مەكتەپ-ليتسەيدىڭ مۇعالىمى ايگۇل قياسوۆا، قازالى اۋدانى، №266 مەكتەپ-گيمنازيا مۇعالىمى نۇرگۇل بالعاراەۆا، شيەلى اۋدانىنداعى №47 مەكتەپ-ليتسەي مۇعالىمى فاتيما قاسقاباەۆا، «الپامىس» بالاباقشاسىنىڭ تاربيەشىسى قالدان تۇياقباەۆا دا بار.

سونداي-اق، شارادا تۇڭعىش رەت ايماق باسشىسىنىڭ اتىنان 10 ۇستاز 300 ايلىق ەسەپتىك كورسەتكىش مولشەرىندەگى، ياعني 833 مىڭ تەڭگە بولاتىن بىررەتىك سىياقى الدى. قارجىلاي سىياقىعا قازانعاپ اتىنداعى قىزىلوردا مۋزىكالىق جوعارى كوللەدجىنىڭ بىرلەستىك مەڭگەرۋشىسى پەرۋزا ارعىنباەۆا، سىرداريا اۋدانى، №137 ورتا مەكتەپ مۇعالىمى ەربول سايلاۋ ۇلى، ارال اۋدانى، №14 مەكتەپ-ليتسەي مۇعالىمى جاننا كۋناروۆا، جالاعاش اۋدانى، №38 ورتا مەكتەبىنىڭ مۇعالىمى جانار شىلدەباەۆا، قارماقشى اۋدانى، №80 مەكتەپ-گيمنازيا مۇعالىمى سەرىك نيازوۆ، جالاعاش اۋدانى، №201 مەكتەپ-ليتسەي مۇعالىمى گۇلدانا ەرماحانوۆا، جاڭاقورعان اۋدانى، №52 ورتا مەكتەپ مۇعالىمى تۇرسىنبەك جۇپارباەۆ، قازالى اگرارلى-تەحنيكالىق كوللەدجىنىڭ مۇعالىمى جانيا ىسماعۇل، №6 ەستۋ قابىلەتى بۇزىلعان بالالاردىڭ ارنايى تۇزەتۋ مەكتەپ-ينتەرناتىنىڭ دەفەكتولوگى ماريا بازار، №4 دارىندى بالالارعا ارنالعان مەكتەپ-ينتەرناتىنىڭ مۇعالىمى ايمان سماعۇل لايىق دەپ تانىلدى.

ايتا كەتۋ كەرەك، ۇزدىك ۇستازدار انىقتالعان كونكۋرس اشىق تۇردە ۇيىمداستىرىلىپ، ءتۇرلى سالا وكىلدەرىنەن قۇرىلعان كوميسسيا جۇمىس ىستەدى.

بيىل وڭىردە پەداگوگتاردى قولداۋ شارالارى قارقىندى جۇرگىزىلدى. ۇستازدار كۇنى قارساڭىندا 40 ۇزدىك مۇعالىمگە نوۋتبۋك، 89 ۇستازعا دەمالىس ورىندارىنا جولداما بەرىلدى.

وسى جىلى «ۇزدىك ءبىلىم بەرۋ ۇيىمى» كونكۋرسىندا اۋىل مەكتەبى 17 ميلليون تەڭگەنىڭ سەرتيفيكاتىن يەلەندى. بۇل باستاما كەلەسى جىلى دا جالعاسىپ، قارجىسى ەكى ەسە كوبەيەدى.

وبلىس اكىمى جيىن سوڭىندا قۇرمەت تورىنەن كورىنگەن ۇزدىكتەرگە ەرەكشە ءىلتيپات ءبىلدىرىپ، الداعى جاڭا جىل مەرەكەسىمەن قۇتتىقتاپ، تابىس تىلەدى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز