ەلدىڭ باسەكەگە قابىلەتى شىڭدالاتىن كەزەڭ
قازىرگى تاڭدا, پرەزيدەنت ايتقانداي, مەملەكەت الدىندا الەۋمەتتىك-ەكونوميكالىق تۇراقتىلىقتى, ورنىقتى دامۋدى, حالىقتىڭ الەۋمەتتىك احۋالىن ارتتىرۋدى, ازاماتتاردى جاڭا جاعدايلارعا بەيىمدەۋدى قامتاماسىز ەتۋ, ەل بىرلىگىن, قاۋىپسىزدىكتى نىعايتۋ, ۇلتىمىزدىڭ رۋحىن كوتەرۋ باستى مىندەت بولىپ تۇر.
جوعارىدا اتالعان ماقسات-مىندەتتەر وتە اۋقىمدى. دەگەنمەن ولاردى ەڭسەرۋگە ەلىمىزدىڭ مۇمكىندىگى جەتەدى. مەملەكەت باسشىسى وسى ورايدا: «مەملەكەت تاراپىنان الەۋمەتتىك سالاداعى جانە ەكونوميكانى قولداۋعا باعىتتالعان بارلىق مىندەتتەمەلەر ورىندالاتىن بولادى. بۇل ماقساتقا ۇلتتىق قوردان 1 تريلليون تەڭگە بولىنۋدە. الەۋمەتتىك تولەمدەردى يندەكساتسيالاۋ جۇمىسى جالعاسىن تابادى. وسى باعىتتا 2023 جىلعا دەيىن شامامەن 1 تريلليون تەڭگەدەن استام قارجى ءبولۋ جوسپارلانىپ وتىر», دەدى.
جالپى, ساراپشىلار ايتىپ جۇرگەندەي, مەملەكەتتەردىڭ باسەكەلەستىك قابىلەتى, دامۋ باعىتىنداعى قادامدارى داعدارىستار مەن ۋاقىت ەنگىزگەن وزگەرىستەر كەزەڭىندە شىڭدالادى. وسىنداي سىنداردان سۇرىنبەي وتكەن, ءوزىن شىڭداي بىلگەن ەل عانا كوشباسشى مەملەكەتتەر قاتارىنان كورىنەدى.
اتالعان جولداۋدا كورسەتىلگەن مىندەتتەر كۇن تارتىبىنە ۋاقتىلى ءارى ورىندى قويىلىپ وتىر. وسى تۇستا جولداۋ حاقىندا قوعام قايراتكەرى جاقسىبەك قۇلەكەەۆتىڭ پىكىرىن كەلتىرە كەتەيىك. «پرەزيدەنت ق.توقاەۆتىڭ ەل دامۋىنىڭ بارلىق سالاسىن قامتي وتىرىپ, ستراتەگيالىق باعىتتارىمىزدى ايقىنداي تۇسكەن بيىلعى كەزەكتى جولداۋى حالىقتىڭ كوكەيىندە تۇيىندەلىپ, كوپتەن شوعىرلانىپ, شەشۋىن كۇتىپ جۇرگەن وزەكتى ماسەلەلەردىڭ ءبىرازىنىڭ جۋىق ارادا ساياسي ارەنادا شەشىمىن تاباتىنىنا سەنىم ۇيالاتقان قۇبىلىس بولدى. ون ءبىر تارماقتان تۇراتىن جولداۋدىڭ باستى مىندەتى – مەملەكەتتىك بيلىكتىڭ حالىق الدىنداعى جاۋاپكەرشىلىگىن ارتتىرا وتىرىپ, قوعامنىڭ وتكىر تالابىنا ساي كەلەتىن ۇتىمدى, ناقتى ناتيجە بەرەتىن, ەلگە پايداسى مول شەشىمدەر قابىلداۋعا جۇمىلدىرۋ. ول شەشىمدەر مەيلىنشە ءادىل بولىپ, حالىقتىڭ ءال-اۋقاتىن ارتتىرۋعا باعىتتالۋى جانە دارىندى جاستارعا جول اشاتىن ءتيىمدى الەۋمەتتىك ساتىلاردىڭ ورنىعۋىنا سەبەپ بولۋى ءتيىس. ويتكەنى ەلىمىزدە سوڭعى جىلدارى ۇمىت بولا باستاعان ادىلەتتى قوعام قاعيداسى, زاڭ ۇستەمدىگى, ازاماتتاردىڭ قاۋىپسىزدىگىنە كەپىلدىك بەرۋ سەكىلدى ۇعىمدار جاڭا تۇرعىدا ايتىلىپ وتىر. ايتارى جوق, كەز كەلگەن نارىقتىق قاعيداتتارعا نەگىزدەلگەن قوعام تۇراقتى دامۋى ءۇشىن سول ەلدىڭ بەلسەندى, وزىق ويلى ازاماتتارىنىڭ قابىلەتى مەن مۇمكىندىكتەرىن تولىق پايدالانۋىنا مەيلىنشە جاعداي جاسالۋى كەرەك. ال ونىڭ كەپىلى – زاڭ ۇستەمدىگى, ساياسي بيلىكتەن تاۋەلسىز سوت جۇيەسى, ءتيىمدى ازاماتتىق قوعام ينستيتۋتتارى جانە كەڭ اۋقىمدا ايتىلاتىن مەملەكەتتەگى ساياسي تۇراقتىلىق. ەلدە وسى اتالعان كاتەگوريالار قالىپتاسىپ, بيلىك پەن قوعامنىڭ اراسىندا تۇراقتى ديالوگ ورىن العان جاعدايدا عانا مەملەكەت تۇراقتى دامۋدىڭ داڭعىل جولىنا تۇسەتىنى راس جانە بۇل – اكسيوما. سوندىقتان دا بۇل جولداۋ وسىنىسىمەن قۇندى», دەيدى ج.قۇلەكەەۆ.
باستى ۇستانىم – الەۋمەتتىك ادىلەتتىلىك ورناتۋ
پرەزيدەنت تاۋەلسىزدىك كۇنىنە وراي مەملەكەتتىك ناگرادالار مەن سىيلىقتار تاپسىرۋعا ارنالعان سالتاناتتى راسىمدە جولداۋدا قوزعالعان ماسەلەلەردى تاعى دا ەكشەپ, الدا تۇرعان مىندەتتەردى پىسىقتاي ءتۇستى. ء«بىز قيىندىقتار مەن كەدەرگىلەرگە قاراماستان, العا ىلگەرىلەۋدى جالعاستىرامىز», دەگەن مەملەكەت باسشىسى ەكونوميكالىق قۋاتتى, الەۋمەتتىك ءادىل جانە بەرىك تىرەگى مەن پروگرەسشىل قۇندىلىقتارى بار اشىق قوعام قۇرىپ جاتقانىمىزدى, تۇتاس دۇنيەنىڭ تىنىس-تىرشىلىگى وزگەرگەن, پاندەميا بۇكىل الەمدى سىنعا العان قازىرگە كەزدە بار كۇش-جىگەرىمىزدى جۇمىلدىرىپ وتىرعانىمىزدى ەسكە سالدى. ەپيدەمياعا قارسى كەشەندى ءىس-شارالار ءۇشىن 350 ميلليارد تەڭگەدەن استام قارجى بولىنگەنىن جەتكىزگەن پرەزيدەنت ءوزىنىڭ باستى ميسسياسى – الەۋمەتتىك ادىلەتتىلىك جانە حالىقتىڭ ءال-اۋقاتىن ارتتىرۋ ەكەنىنە ەكپىن بەردى. ق.توقاەۆتىڭ ايتۋىنشا, بيىل 4 ميلليونعا جۋىق ازاماتتىڭ زەينەتاقىسى مەن الەۋمەتتىك جاردەماقىلارىنىڭ كولەمى ۇلعايدى, الەۋمەتتىك ساقتاندىرۋ تولەمدەرى ورتاشا 50%-عا كوتەرىلدى, از قامتىلعان وتباسىلارداعى 500 مىڭنان اسا بالا ءۇشىن كەپىلدەندىرىلگەن الەۋمەتتىك پاكەت ەنگىزىلدى. پاندەميا كەزىندەگى قيىندىقتارعا قاراماستان, ەل قامباسى استىققا تولدى. جاڭا جولدار سالىندى, تۇرعىن ۇيلەر مەن ينفراقۇرىلىمدىق نىساندار بوي كوتەردى. باسشىلاردىڭ جاڭا بۋىنىن دايىنداۋعا باسا ءمان بەرىلدى.
مەملەكەت باسشىسى ءوز سوزىندە قازاقستاننىڭ ناقتى باسەكەگە قابىلەتتىلىگىن جوعارىلاتۋ ءۇشىن بارلىق كۇش-جىگەر مەن رەسۋرستاردى جۇمىلدىرۋ, ۇلتتىق مۇددەمىزدى بەرىك قورعاپ, ەكونوميكادا, الەۋمەتتىك سالادا, ەكولوگيادا اۋقىمدى جۇيەلى شارالار كەشەنىن جۇزەگە اسىرۋدى جالعاستىرۋ, ادىلەتتى جانە تەڭ مۇمكىندىكتەر قاعيداتتارىن ىلگەرىلەتۋ سىندى باسقا دا مىندەتتەردى اتادى.
وسى ورايدا قازاقستاننىڭ ەڭبەك ەرى مۇرات قايىرگەلدين پرەزيدەنت قاسىم-جومارت توقاەۆتىڭ تاۋەلسىزدىك كۇنى قارساڭىندا وتكەن مەملەكەتتىك ناگرادالار تاپسىرۋ راسىمىندە سويلەگەن ءسوزىن قولداي وتىرىپ, ءوز پىكىرىن بىلاي ساباقتادى: «پرەزيدەنت قيىندىقتار مەن كەدەرگىلەرگە قاراماستان, العا ىلگەرىلەۋدى جالعاستىرامىز دەدى. بۇل رەتتە ەلىمىزدى جاھاندىق داعدارىستان الىپ شىعۋ ءۇشىن كوپ ءىس تىندىرىلعانىن اتاپ ءوتۋ كەرەك. مەملەكەت باسشىسى ايتقانداي, جۇيەلى جۇمىستاردىڭ ناتيجەسىندە ەكونوميكاعا قاتىستى تەرىس بولجامداردى جوققا شىعارىپ, ىندەتتىڭ زاردابى ازايدى. دەر كەزىندە قابىلدانعان شارالاردىڭ ارقاسىندا احۋال ءبىرشاما تۇراقتاندىرىلدى. جاھاندىق دۇربەلەڭگە قاراماستان, مەملەكەتتىڭ ىرگەسى مىعىم, تۇعىرى بەكەم ەكەنىن دالەلدەي بىلدىك. وسىنىڭ ءبارى ورتاق ماقسات ءۇشىن جۇدىرىقتاي جۇمىلىپ, ەڭبەك ەتۋدىڭ جەمىسى».
ايتا كەتەيىك, پرەزيدەنت كەلەر جىلدى «تəۋەلسىزدىكتىڭ 30 جىلدىعى» دەپ جاريالاعانى بەلگىلى. وسىناۋ بيىك بەلەس – تاۋەلسىزدىكتىڭ وتىزىنشى جىلىندا حالقىمىز بۇعان دەيىن قول جەتكىزىلگەن تابىستارىمىزدىڭ ەسەلەنە تۇسكەنىنە, تۇيتكىلدى ماسەلەلەردىڭ شەشىمىن تاپقانىنا اشىق اسپان, بەيبىت كۇننىڭ اياسىندا كۋا بولا بەرگەي!
