ازىرگە «سيبير» قازاقستاندىق كوماندا ءۇشىن الىنباس قامالعا اينالدى. ويتكەنى جەرلەستەرىمىز رەسەيلىك كوماندانى باقانداي سەگىز ويىننان بەرى جەڭە الماي كەلەدى. «بارىس» ەڭ سوڭعى رەت «سيبيردەن» 2019 جىلدىڭ 12 اقپانىندا 5:2 ەسەبىمەن باسىم تۇسكەن ەكەن. مىنە, سول ۋاقىتتان بەرى ەلوردا كومانداسى جەڭىستى جولدى جالعاستىرا الماي كەلەدى. سونىمەن قاتار رەسەيلىك ۇجىم «بارىستىڭ» بەس ويىنعا جالعاسقان جەڭىستى سەرياسىنا دا نۇكتە قويدى.
«سيبيرمەن» وتكەن سوڭعى ويىنداعى كەزدەسۋدىڭ ەسەبىن «بارىس» شابۋىلشىسى مەتتيۋ فرەتتين اشقانىمەن, كوماندالاستارى باسەكە سوڭىنا دەيىن جەڭىستى ءوز ۋىسىندا ساقتاي المادى. ەكىنشى 20 مينۋتتا قوناقتاردان ەفيم گۋركين مەن دميتري سايۋستوۆ مەرگەندىگىمەن كوزگە ءتۇسىپ, كومانداسىن ەسەپتە العا شىعاردى. ال ماتچتىڭ سوڭعى مينۋتىندا ميكاەل رۋوحوماا گول سوعىپ, ويىننىڭ نۇكتەسىن قويدى. قورىتىندى ەسەپ – 3:1.
