2020 جىلعى قازاق سپورتىنىڭ جىلناماسىنداعى العاشقى جەڭىس پەن التىن جۇلدەنى ەل قورجىنىنا پاراللەلدى موگۋلدان قازاقستان كومانداسىنىڭ مۇشەسى اناستاسيا گورودكو سالدى. 13 قاڭتاردا شۆەيتساريادا ۇيىمداستىرىلعان فريستايلدان ەۋروپا كۋبوگىندا جەرلەسىمىز بارلىق قارسىلاسىن باسىپ وزىپ, التىن جۇلدەگە قول جەتكىزگەن-ءدى. ەكىنشى ورىنعا نيدەرلاند, ءۇشىنشى ورىنعا اۋستريا سپورتشىسى تۇراقتادى.
سونىمەن قاتار تەننيسشى ەلەنا رىباكينا ەكى ايدا WTA ساناتىنداعى ءتورت ءىرى جارىستىڭ فينالىنا شىعىپ, بىرەۋىندە توپ جاردى. ماسەلەن, قىتايدىڭ شەنچجەن قالاسىندا وتكەن WTA ءتۋرنيرىنىڭ فينالىنا دەيىن جەتتى. جۇلدە قورى 750 مىڭ اقش دوللارىن قۇراعان جارىستىڭ فينالدىق باسەكەسىندە رىباكينانىڭ جولى الەمنىڭ سول كەزدەگى 34-راكەتكاسى ەكاتەرينا الەكساندروۆامەن ءتۇيىستى. بۇل باسەكە 6:2, 6:4 ەسەبىمەن رەسەيلىك تەننيسشىنىڭ جەڭىسىمەن اياقتالدى.
ساناۋلى كۇندەردەن سوڭ اۋستراليانىڭ حوبارت قالاسىندا وتكەن WTA تۋرنيرىندە وتانداسىمىزدىڭ باعى جانىپ, حالىقارالىق جارىستا توپ جاردى. فينالدا ول الەمنىڭ 40-راكەتكاسى چجان شۋايدى (قىتاي) جەڭدى. تارتىسقا تولى وتكەن باسەكەدە وتانداسىمىز ەكى سەتتە 7:6 (9:7), 6:3 ەسەبىمەن جەڭىسكە جەتتى. بۇدان كەيىن ول رەسەيدىڭ سانكت-پەتەربۋرگ قالاسىندا جۇلدە قورى 848 مىڭ اقش دوللارىن قۇراعان WTA Premier ءتۋرنيرىنىڭ فينالىندا ونەر كورسەتتى. باس جۇلدە ءۇشىن وتكەن باسەكەدە جەرلەسىمىز نيدەرلاند وكىلى كيكي بەرتەنسپەن كەزدەسىپ, ەكى سەتتە 6:1, 6:3 ەسەبىمەن جەڭىلىپ قالدى. ءدال وسى باسەكەدەن كەيىن ول الەمدىك رەيتينگتە 19-ورىنعا كوتەرىلدى. بۇل – قازاقستان تەننيسى تاريحىنداعى ەڭ جوعارى كورسەتكىش. ويتكەنى بۇعان دەيىنگى ەڭ ۇزدىك ناتيجەمىز 25-ورىن ەدى. بۇل ناتيجەگە 2012 جىلى ياروسلاۆا شۆەدوۆا قول جەتكىزگەن-ءدى. ءسويتىپ رىباكينا قازاقستان تەننيس تاريحىنىڭ جاڭا پاراعىن اشتى.
اقپان ايىندا تەك رىباكينا عانا ەمەس, اۋىر اتلەت راحات بەكبولات پەن بالۋاندارىمىز دانيار قايسانوۆ, يۋسۋپ باتىرمۇرزاەۆ, تامەرلان شادۋكاەۆ, قىزدارىمىز – تاتيانا امانجول مەن ءجاميلا باقبەرگەن دە ەل مەرەيىن اسىردى.
تاشكەنتتە وتكەن جاستار مەن جاسوسپىرىمدەر اراسىنداعى ازيا چەمپيوناتىندا جاس بەكبولات 102 كيلو سالماقتا باق سىناپ, قوسسايىس بويىنشا 356 كيلو زىلتەمىردى ەڭسەرىپ, ازيا چەمپيونى اتاندى. جۇلقا كوتەرۋدە 158 كيلو كوتەرسە, سەرپە كوتەرۋدە 198 كيلونى باعىندىرىپ, الەمدىك رەكورد ورناتتى. ال جىل سوڭىنا قاراي پەرۋ استاناسى – ليمادا ۇيىمداستىرىلعان اۋىر اتلەتيكادان جاسوسپىرىمدەر اراسىنداعى ونلاين فورماتتاعى الەم كۋبوگى جولىنداعى جارىستا دا ر.بەكبولات اسقان شەبەرلىك تانىتىپ, ءدۇيىم جۇرتتىڭ نازارىن وزىنە اۋداردى. قوسسايىس قورىتىندىسى بويىنشا 319 (140+179) كيلولىق ناتيجەمەن باس جۇلدەنى ولجالادى. قانداسىمىز كۇمىس مەدالدى يەلەنگەن ازەربايجاندىق ءالي شۇكىرلىدەن باقانداي توعىز كيلو ارتىق كوتەردى.
كۇرەس تۇرلەرىنەن دەليدە وتكەن دودادا 74 كيلو سالماقتا ونەر كورسەتكەن قانداسىمىز دانيار قايسانوۆ ىرىكتەۋ كەزەڭىندە يراك وكىلى كارام شاكىر ماحمۇت (10:0) پەن جاپونيالىق دايشي تاكاتانيدى (9:4) تىزە بۇكتىرىپ, فينالدا جارىس قوجايىنى جيتەندەر جيتەندەردى (3:1) جەڭدى. وسىلايشا, قايسانوۆ ەكىنشى مارتە ازيا چەمپيونى اتاندى. بۇعان دەيىن ول 2019 جىلى سياندا توپ جارعان بولاتىن. سونىمەن قاتار ەركىن كۇرەس بالۋانى يۋسۋپ باتىرمۇرزاەۆ تا ءۇندىستاندا ەلىمىزدىڭ ءانۇرانىن شىرقاتتى. اسا اۋىر سالماقتا بەلدەسكەن جەرلەسىمىز تاجىكستاندىق فارحاد اناقۇلوۆ, ۇندىستاندىق ساتەندەر ساتەندەر جانە يراندىق پارۆيز ءحاديباسمانيدى ۇتتى. فينالدا موڭعوليانىڭ مىقتىسى حۋدەربۋلگا دوردجحاندپەن جولى قيىسىپ, ناتيجەسىندە جەرلەسىمىز قارسىلاسىنا بىردە-ءبىر ۇپاي بەرمەي, ايقىن جەڭىسىنىڭ ارقاسىندا ازيانىڭ تەڭدەسسىز بالۋانى دەپ تانىلدى.
ال گرەك-ريم كۇرەسىندە 77 كيلو سالماقتا كۇش سىناسقان تامەرلان شادۋكاەۆ باستاپقى باسەكەلەردىڭ بارلىعىندا كۇمانسىز جەڭگەنىن, جارتىلاي فينالدا يوردانيالىق سۇلتان ءالي موحد دامەن ەيدتىڭ قالاي تاس-تالقانىن شىعارعانىن بۇكىل جانكۇيەر كوردى. ال فينالدىق سايىستا ول يران بالۋانى پەدجمان پوشتامدى 10:1 ەسەبىمەن ۇتىپ, ازيا چەمپيونى اتاندى.
قىزدار باسەكەسىندە تاتيانا امانجول (53 كگ) فينالدا ەكى دۇركىن الەم چەمپيونى (2019, 2018), ءبىر مارتە ازيا بىرىنشىلىگىندە توپ جارعان جاپونيالىق مايۋ مۋكايدان ايلاسىن اسىرىپ, التىننان القا تاقتى. سونداي-اق 72 كيلوداعى ج.باقبەرگەنوۆا دا فينالدىق سايىستا جاپونيالىق قارسىلاسى مەي شيندونى جەڭىپ, ازيانىڭ ۇزدىك بالۋانى اتاندى. اتالعان جارىستا جەرلەستەرىمىز 5 التىننان بولەك, 2 كۇمىس جانە 12 قولا مەدال جەڭىپ العانىن دا ايتا كەتەيىك. وسىلايشا, كۇرەستىڭ ءۇش ءتۇرى بويىنشا دا ەلىمىزدىڭ ۇلتتىق قۇراماسى سارى قۇرلىقتاعى ەڭ ۇزدىك كوماندالاردىڭ ساناتىنا قوسىلدى.
ناۋرىز ايىندا بوكستان قازاقستان كومانداسى 2020 جىلعى توكيو وليمپياداسىنا جولداما بەرۋشى تۋرنيردە باق سىناپ, عالىمبەك كەنجەباەۆ شاكىرتتەرى ءتورت جىلدىقتىڭ باستى دوداسىنا تولىق قۇرامدا قاتىسۋعا مۇمكىندىك الدى. يوردانيا استاناسى – اممان قالاسىندا ۇيىمداستىرىلعان باسەكەدە ساكەن بيبوسىنوۆ (52 كگ), سەرىك تەمىرجانوۆ (57 كگ), زاكىر سافيۋللين (63 كگ), ابىلايحان ءجۇسىپوۆ (69 كگ), ءابىلحان امانقۇل (75 كگ), بەكزات نۇرداۋلەتوۆ (81 كگ), ۆاسيلي لەۆيت (91 كگ) جانە قامشىبەك قوڭقاباەۆ (+91 كگ), ال قىزداردان نادەجدا ريابەتس (75 كگ) جولداماعا قول جەتكىزدى.
ۆەلوسپورتشىلار اراسىندا بەيرەسمي الەم چەمپيوناتى سانالاتىن «تۋر دە فرانس» كوپكۇندىگىنىڭ بيىلعى باسەكەسى «استانا» ۆەلوشاباندوزدارى ءۇشىن تابىستى بولدى دەپ ايتۋعا تولىق نەگىز بار. ويتكەنى جەرلەسىمىز الەكسەي لۋتسەنكو جارىستىڭ التىنشى كەزەڭىندە جەڭىس تويىن تويلادى. قازاقستاندىق ۆەلوشاباندوز 191 شاقىرىمدى 4 ساعات 32 مينۋت 34 سەكۋندتا ءجۇرىپ ءوتتى. ءبىر ايتا كەتەرلىگى, بۇل – الەكسەي لۋتسەنكونىڭ «تۋر دە فرانستاعى» العاشقى جەڭىسى. ول وتانداستارىمىزدىڭ اراسىنان ايتۋلى جارىستىڭ بەلگىلى ءبىر كەزەڭىندە توپ جارعان ەكىنشى سپورتشى اتاندى. بۇعان دەيىن الەكساندر ۆينوكۋروۆ جەڭىسكە جەتكەن بولاتىن.
وليمپيا ويىندارىنىڭ باعدارلاماسىنا ەنىپ, توكيو تورىندە العاشقى چەمپيوندارىن انىقتايتىن كاراتە جانكۇيەرلەرى ءۇشىن جىل جاعىمدى جاڭالىقپەن باستالدى. قازاقستان كومانداسىنىڭ كاپيتانى, پرەمەر-ليگا كەزەڭدەرىنىڭ بىرنەشە دۇركىن جەڭىمپازى دارحان ءاسادىلوۆ ءبىزدىڭ سپورتشىلار ساپىنان العاش بولىپ وليمپيادا ليتسەنزياسىن يەلەندى. 67 كيلوعا دەيىنگى بىرىككەن سالماق دارەجەسىندە سىنعا تۇسەتىن دارحان وليمپيا ويىندارىنا مەرزىمىنەن بۇرىن ليتسەنزيا ۇتىپ الدى. تورتجىلدىق دوداسىنا ىرىكتەۋ كەزەڭى ءالى اياقتالماسا دا, ءاسادىلوۆ توكيو وليمپياداسىنا قاتىسۋ مۇمكىندىگىن يەلەنىپ وتىر. سەبەبى, وليمپيادالىق رەيتينگتىڭ كوش باسىندا كەلە جاتقان دارحاندى جاقىن ارادا ەشكىم قۋىپ جەتە المايدى.
بيىل سپورتتىق گيمناستيكا سپورتشىلارى ىندەتكە بايلانىستى بار مىندەتتى جوعارى دارەجەدە ورىنداي العان جوق. ماسەلەن, كارانتينگە دەيىن اۋستراليادا وتكەن الەم كۋبوگى كەزەڭىندە ميلاد كاريمي كۇمىس مەدال, ازەربايجانداعى دودادا سپورتشىلارىمىز ءتورت جاتتىعۋ بويىنشا فينالعا جولداما العانىمەن پاندەمياعا بايلانىستى ۇيىمداستىرۋشىلار فينالدىق باسەكەنى وتكىزگەن جوق. ال كارانتين شارالارى جەڭىلدەتىلگەن سوڭ قايتا جالعاسقان ماجارستانداعى الەم كۋبوگىندا ناريمان قۇربانوۆ گيمناستيكالىق ات سناريادىنداعى جاتتىعۋدان جەڭىسكە جەتسە, ميلاد كاريمي قوسسىرىق پەن گيمناستيكالىق كەرمەدەگى جاتتىعۋدا كۇمىس جۇلدەگەر اتاندى.
جىلدىڭ جەڭىستى نۇكتەسىن كاسىپقوي بوكستا اتوي سالىپ جۇرگەن جەرلەسىمىز گەننادي گولوۆكين قويدى. اقش-تىڭ فلوريدا شتاتىندا ورنالاسقان Hard Rock Holly كازينو-قوناقۇيىندە وتكەن بوكس كەشىنىڭ باستى جەكپە-جەگىندە پولشانىڭ مىقتىسى كاميل شەرەمەتانى مەرزىمىنەن بۇرىن جەڭىپ, ورتا سالماقتا IBF جانە IBو نۇسقالارى بويىنشا الەم چەمپيونى اتاعىن ءساتتى قورعادى. سونىمەن قاتار الەم چەمپيونى اتاعىن قورعاۋ جاعىنان رەكورد جاڭارتىپ (21 مارتە), كاسىپقوي بوكس تاريحىنا ءوز ەسىمىن تاعى ءبىر رەت التىن ارىپتەرمەن جازدىردى. بۇعان دەيىنگى رەكورد بەرنارد حوپكينسكە تيەسىلى بولاتىن. ول ءوز اتاعىن 20 رەت قورعاعان ەدى.
دەسەك تە, بيىل «əتتەگەن-اي» دەگەن كەزدەرىمىز دە از بولعان جوق. مəسەلەن, شۆەيتساريانىڭ لوزاننا قالاسىندا الاۋى تۇتانعان جاسوسپىرىمدەر اراسىنداعى ءىىى قىسقى وليمپيا ويىندارىندا جەرلەستەرىمىز بىردە-ءبىر جۇلدە الا الماي, جانكۇيەر كوڭىلىنە سەلكەۋ ءتۇسىردى. سونىمەن قاتار كوماندالارىمىز فۋتبولدان ەۋروكۋبوك باسەكەلەرىنىڭ العاشقى اينالىمدارىندا-اق ساتسىزدىككە ۇشىرادى. ول ازداي, فۋتبولدان قازاقستان ۇلتتىق قۇراماسى ۇلتتار ليگاسىندا سۇرەڭسىز ويناپ, ءوز توبىندا سوڭعى ورىندا قالىپ قويدى.
