كەزدەسۋدە «اق جول» دەموكراتيالىق پارتياسىنىڭ سايلاۋالدى باعدارلاماسى تانىستىرىلدى. «وزدەرىڭىزگە بەلگىلى, سايلاۋالدى ناۋقانى ءجۇرىپ جاتىر. بۇگىن ماڭعىستاۋ وبلىسىنا كەلدىك. ماڭعىستاۋ ءوڭىرى – «اق جول» پارتياسىنىڭ نەگىزگى تىرەگىنىڭ ءبىرى. قازاق «ەلۋ جىلدا – ەل جاڭا» دەگەن. قازىرگى باسقارۋ جۇيەسىندەگى امالدار كەي ماسەلەلەردى شەشۋدە قاۋقارسىز كورىنەدى. وعان پاندەميا باستالعاندا كوز جەتتى. ءبىز ەكونوميكالىق-ساياسي تۇبەگەيلى وزگەرىستەردى ۇسىنامىز», دەدى ءماجىلىس دەپۋتاتى بەرىك دۇيسەمبينوۆ.
ال «اق جول» دەموكراتيالىق پارتياسى جاستار قاناتىنىڭ جەتەكشىسى عازيزا باقتيارقىزى ماڭعىستاۋلىقتارعا پارتيا ۇسىنعان وسى وزگەرىستەردىڭ ىسكە اسۋى سايلاۋشىلاردىڭ تاڭداۋىنا تىكەلەي بايلانىستى ەكەنىن ەسكەرتتى. ۇگىت-ناسيحات توبى وڭىردە تاعى بىرنەشە كەزدەسۋ وتكىزۋدى جوسپارلاپ وتىر.
بۇعان دەيىن پارتيا وكىلدەرى باتىس قازاقستان وبلىسىندا بولىپ, ورال قالاسىنداعى «بولاشاق-ت» كاسىپورنىنىڭ ەڭبەك ۇجىمىمەن كەزدەسكەن ەدى. كاسىپورىن 1998 جىلى قۇرىلعان, ءمونوليتتى تەمىربەتون كونسترۋكتسيالاردان كوپ قاباتتى تۇرعىن ۇيلەر, عيماراتتار, مەكتەپتەر, بالاباقشالار سالادى. كەزدەسۋ بارىسىندا «اق جول» پارتياسىنىڭ سايلاۋالدى باعدارلاماسى تانىستىرىلىپ, كانديداتتار سايلاۋشىلاردىڭ سۇراقتارىنا جاۋاپ بەردى. باعدارلاماداعى باستى باعىتتار – قازاقستاندىقتاردىڭ ءومىر ءسۇرۋ ساپاسىن ارتتىرۋ, ەكونوميكانى جاڭا دەڭگەيگە شىعارۋ, كاسىپكەرلىكتى قولداۋ, سونداي-اق ءبىلىم بەرۋ جۇيەسىن رەفورمالاۋ. «كاسىپكەرلىكتى قولداۋ ەكونوميكالىق الەۋەتتى دامىتۋدىڭ قۇرالى رەتىندە عانا ەمەس, ەڭ الدىمەن جۇمىسسىزدىق ماسەلەسىن شەشۋدىڭ, جاڭا جۇمىس ورىندارىن اشۋدىڭ جانە قازاقستاندىقتاردى تابىس كوزدەرىمەن قامتاماسىز ەتۋدىڭ باستى قۇرالى رەتىندەگى ماڭىزى زور. ءبىز ساياسي رەفورمالار جۇرگىزىلمەيىنشە ەكونوميكادا وڭ وزگەرىستەر بولۋى مۇمكىن ەمەستىگىنە كوزىمىزدى جەتكىزدىك. سوندىقتان ەكونوميكالىق رەفورمالار ساياسي رەفورمالاردىڭ ماتەريالدىق مازمۇنى رەتىندە قاجەت», دەدى ەرلان بارلىباەۆ.
پارتيانىڭ ۇگىت-ناسيحات توبى سونداي-اق «ورال كابەل» جاۋاپكەرشىلىگى شەكتەۋلى سەرىكتەستىگىندە بولىپ, جۇمىسشىلاردىڭ جاعدايىمەن تانىستى. ولار ۇجىمنىڭ الەۋمەتتىك جاعدايىن سۇراپ, ءوندىرىس بارىسىن ارالاپ شىقتى. كەزدەسۋدە جۇمىسسىزدىقپەن كۇرەس, كاسىپكەرلىكتى قولداۋ سەكىلدى الەۋمەتتىك ماسەلەلەر كوتەرىلدى. جيىن بارىسىندا كاسىپتەگى كەز كەلگەن پروبلەمانى وڭتايلى شەشىپ, ءوندىرىستى توقتاتپاۋدىڭ جولدارىن قاراستىرۋ – پارتيانىڭ باستى ماقساتى ەكەنى ايتىلدى. «اق جول» دەموكراتيالىق پارتياسى بيزنەستى قورعاۋ, كاسىپكەرلىككە جالپى سيپاتتاما بەرۋ, نارىقتىق قاتىناستى دامىتۋ جانە وندىرىستىك ەكونوميكانى قۇرۋدى قولدايدى. بۇدان باسقا دەموكراتتار باعدارلاماسىندا جۇمىسپەن قامتۋ جۇيەسىن دامىتۋ, قوعامنىڭ جالپى ەڭبەكپەن قامتىلۋىن قامتاماسىز ەتۋ كىرەدى. پارتيا وكىلدەرىنىڭ ايتۋىنشا, «اق جول» پارتياسى – پروگرەسسيۆتى دامۋدىڭ جاقتاۋشىسى. ولار ەكونوميكانى نىعايتۋ, نارىقتىق جانە باسەكەلەستىك قاعيدالاردى دامىتۋ باعىتىندا جۇمىس ىستەمەك.
