ءتارتىپ ساقشىلارى ۇرلىق فاكتىلەرىنە تالداۋ جاساعان كەزدە قىلمىستىق وقيعالاردىڭ كوبىنە قاراعاندى قالاسىنىڭ وڭتۇستىك-شىعىس اۋماعىندا بولاتىنىن انىقتادى. سوندىقتان وسى شاعىن اۋدانعا باسا نازار اۋدارىلعان. كوپ كەشىكپەي, كۇندەلىكتى كەشەندى ءىس-شارالاردى جەدەل ءارى ساۋاتتى تۇردە جۇرگىزگەندىكتىڭ ارقاسىندا پوليتسيا قىزمەتكەرلەرى وڭ ناتيجەگە قول جەتكىزدى. بۇل تۋرالى قاراعاندى وبلىستىق پوليتسيا دەپارتامەنتىنىڭ باستىعى, پوليتسيا پولكوۆنيگى ەرلان فايزۋللين مالىمدەدى.
– 8 جەلتوقساندا ساعات تاڭعى 05.00-ءدىڭ شاماسىندا قاراعاندى قالالىق پوليتسيا باسقارماسىنىڭ كريمينالدىق پوليتسيا قىزمەتكەرلەرى جۇرگىزگەن جەدەل ىزدەستىرۋ ءىس-شارالارى بارىسىندا يازەۆ كوشەسىندە ورنالاسقان ۇيلەردىڭ اۋلاسىندا تۇرعان كولىكتەردىڭ بىرىنەن تىركەۋ ءنومىرىن شەشىپ جاتقان 18 جانە 20 جاستاعى ەكى ەر ادام ۇستالدى. تەكسەرۋ بارىسىندا ولاردان اۆتوكولىكتەردىڭ توعىز ءنومىرى تاركىلەنىپ الىندى. سونداي-اق ۇستالعاندار قاراعاندى قالاسىندا اۆتوكولىكتەردەن تىركەۋ نومىرلەرىن ۇرلاۋدىڭ 29 فاكتىسىن مويىندادى, – دەدى ءوڭىردىڭ باس پوليتسەيى.
قازىرگى ۋاقىتتا اتالعان وقيعا بويىنشا قىلمىستىق كودەكستىڭ 194-بابى, 2-تارماعىنا سايكەس قىلمىستىق ءىس قوزعالىپ, تەرگەۋ امالدارى جۇرگىزىلۋدە.
وسىعان وراي قاراعاندى وبلىستىق پوليتسيا دەپارتامەنتىنىڭ باستىعى اۆتوكولىك يەلەرىنە ۇندەۋ جولداپ, ەگەر مەملەكەتتىك تىركەۋ نومىرلەرى قولدى بولسا, بىردەن پوليتسياعا تەلەفون سوعىپ, حابارلاۋعا شاقىردى. سونىمەن قاتار ول ۇرلانعان نومىرلەر ءۇشىن بەلگىسىز بىرەۋلەرگە اقشا بەرۋگە نەمەسە اۋدارۋعا بولمايتىنىن تاعى دا ەسكە سالدى.
قاراعاندى وبلىسى
