بۇگىندە ەكولوگيا, گەولوگيا جانە تابيعي رەسۋرستار مينيسترلىگىنىڭ مالىمەتتەرىنە سايكەس, رەسپۋبليكا بويىنشا جالپى ۇزىندىعى 15,5 مىڭ كم قۇرايتىن 74 توپتىق سۋ قۇبىرى بار. ونىڭ ىشىندە 13 مىڭ كم بولاتىن 37 سۋ قۇبىرى رەسپۋبليكالىق مەنشىكتە. ولار 1,1 ملن ادام تۇراتىن 608 اۋىلدىق ەلدى مەكەندى ساپالى اۋىز سۋمەن قامتيدى.
ەگەر 2019 جىلى پاۆلودار وبلىسىنداعى بەلوۆودسكي, ماي جانە قاراعاندى وبلىسىنداعى جايرەم-قاراجال سۋ قۇبىرلارى پايدالانۋعا بەرىلسە, 2020 جىلى جۇمىسى اياقتالعان نىساندار سانى كوبەيدى.
ولاردىڭ ىشىندە الماتى وبلىسى قاراساي اۋدانىنداعى قاسكەلەڭ توپتىق سۋ تارتقىشى دا بار. جوبانىڭ جالپى قۇنى 2 493,8 ملن.تەڭگەنى قۇرايدى. جوبا 2013 جىلى باستالىپ, ەكولوگيا مينيسترلىگىنىڭ كومەگىمەن 2020 جىلدىڭ جەلتوقسان ايىندا پايدالانۋعا بەرىلدى. ناتيجەسىندە 100 مىڭ تۇرعىنى بار قاسكەلەڭ قالاسىنداعى سۋمەن جابدىقتاۋ جۇمىسى جاقسارا ءتۇستى.
وسى جىلى جۇزەگە اسقان تاعى ءبىر جوبا - باتىس قازاقستان وبلىسى سىرىم اۋدانى كەناشى جەر استى سۋلارى كەن ورنىنان جىمپيتى اۋىلىن سۋمەن جابدىقتاۋ. جوبا قۇنى - 2 157,4 ملن.تەڭگە. ونىڭ ارقاسىندا 2 ەلدى مەكەن اۋىز سۋمەن قامتاماسىز ەتىلىپ, سىرىم اۋدانىنىڭ 10 مىڭ تۇرعىنى بار 5 ەلدى مەكەنىندە سۋ بەرۋ ماسەلەسى جاقسارتىلدى.
بۇدان بولەك قىزىلوردا وبلىسىنداعى جيدەلى توپتىق سۋ قۇبىرىنىڭ پايدالانۋعا بەرىلۋى ناتيجەسىندە 14,5 مىڭ ادام تۇراتىن 8 اۋىل ساپالى اۋىز سۋعا قول جەتكىزدى. وڭىردە 2021 جىلى جاڭاقورعان اۋدانىنداعى تالاپ سۋ قۇبىرىنىڭ قۇرىلىسى اياقتالماق. ونىڭ جالپى قۇنى - 5 932,3 ملن.تەنگە. اياقتالعاننان كەيىن 9 اۋىلعا سۋ جەتكىزۋ جاقسارىپ, 19,7 مىڭ ادام تۇراتىن 3 اۋىل اۋىزسۋمەن قامتىلادى.
اتالعاندارمەن قاتار, سولتۇستىك قازاقستان وبلىسىندا پرەسنوۆ توپتىق سۋ قۇبىرى ء(ىى كەزەڭ) قايتا جاڭارتۋدان ءوتىپ جاتىر. جوبانىڭ جالپى قۇنى - 4 699,6 ملن.تەڭگە. 2021 جىلى ول پايدالانۋعا بەرىلسە, ءوڭىردىڭ 16 مىڭ تۇرعىنى بار 17 اۋىلىندا سۋ بەرۋ جاقسارادى.
مينيسترلىك 2022 جىلدىڭ سوڭىنا دەيىن قۇرىلىسى ۇزاققا سوزىلعان ءۇش جوبانى اياقتاۋدى جوسپارلاپ وتىر.
«ۇكىمەتتىڭ تاپسىرماسىمەن مينيسترلىك بۇرىن باستالىپ, اياقتالماعان جوبالاردى قولعا الدى. ءبىز 2019 جىلى 3 ماگيسترالدى سۋ قۇبىرىن قولدانىسقا بەردىك, بيىل – 1 سۋ قۇبىرىن, ال 2022 جىلعا دەيىن تاعى 3-ەۋى پايدالانۋعا بەرىلەدى. بۇل 210,6 مىڭ ادام تۇراتىن 39 اۋىلدى سۋمەن قامتيدى», - دەدى سۋ رەسۋرستارى كوميتەتى توراعاسىنىڭ ورىنباسارى ماقسات اياشەۆ.
ايتا كەتەيىك, بۇگىندە قالالاردىڭ 97,2%-ى, ال اۋىلداردىڭ 86,4%-ىنا ورتالىقتاندىرىلعان سۋمەن جابدىقتاۋ جەتكەن. 5 جىل ىشىندە ەلدە 3 مىڭ شاقىرىم توپتىق سۋ قۇبىرلارى سالىنادى. وسىلايشا, اۋىز سۋمەن قامتۋ 100%-عا جەتكىزىلەدى.
