ءىس-شارانىڭ ماقساتى – قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» اتتى ماقالاسى نەگىزىندە قولعا الىنعان «قازاقستاننىڭ كيەلى جەرلەرى» جوباسى اياسىندا جوسپارلانعان بەس تومدىق ەنتسيكلوپەديانىڭ كەزەكتى IV تومىمەن تانىستىرۋ. سونىمەن قاتار پاۆلودار, سولتۇستىك قازاقستان جانە شىعىس قازاقستان وبلىستارىنىڭ كيەلى جەرلەرى, تاريحي وقيعالار وتكەن قاسيەتتى ورىندار, تابيعي لاندشافتتىڭ ەرەكشە ەسكەرتكىشتەرى مەن ۇلتتىق كۇندى مادەني مۇرالارى ەنگەن تاريحي-تانىمدىق ماڭىزعا يە قۇندى ەڭبەكتى تالقىلاۋ.
«كىتاپتىڭ ءبىرىنشى تومىنا استانا مەن الماتى قالالارىنىڭ جانە اقمولا مەن الماتى وبلىستارىنىڭ, ەكىنشى تومىنا باتىس قازاقستان, اقتوبە, اتىراۋ, ماڭعىستاۋ وبلىستارىنىڭ, ءۇشىنشى تومىنا جامبىل, قاراعاندى, قوستاناي, قىزىلوردا وبلىستارىنىڭ, ءتورتىنشى تومىنا پاۆلودار, سولتۇستىك قازاقستان, شىعىس قازاقستان وبلىستارىنىڭ تاريحي وقيعالار وتكەن قاسيەتتى ورىندارى مەن كەشەندەرى, تابيعي لاندشافت ەسكەرتكىشتەرى مەن ەل تۇتقاسى بولعان تاريحي تۇلعالارى ەنگىزىلدى. كەزەكتى تۇركىستان وبلىسى جانە شىمكەنت قالاسىنا ارنالعان ەڭبەكتىڭ 5-تومى 2021 جىلى جارىق كورەدى دەپ جوسپارلانۋدا», دەدى ءوز سوزىندە ۇلتتىق مۋزەيدىڭ «قاسيەتتى قازاقستان» عىلىمي-زەرتتەۋ ورتالىعىنىڭ جەتەكشىسى باتىرحان جۇماباەۆ.
اتاپ ايتساق, «قاسيەتتى قازاقستان» بەس تومدىق ەنتسيكلوپەديانىڭ العاشقى جيناعى 2017 جىلى جارىق كوردى. وندا الماتى جانە اقمولا وبلىستارى, الماتى مەن نۇر-سۇلتان قالالارىنداعى كيەلى نىساندار كورسەتىلگەن بولاتىن. وسىلايشا قازاقستاننىڭ بارلىق ءوڭىرى قامتىلىپ, بۇل جيناق كەزەك-كەزەگىمەن جارىققا شىعارىلۋدا. جيناق ەكى تىلدە – قازاق جانە ورىس تىلدەرىندە دايىندالعان.
اتالعان شاراعا ەلىمىزدىڭ كورنەكتى تاريحشى عالىمدارى, ولكەتانۋشىلار مەن مادەنيەت سالاسىنىڭ وكىلدەرى قاتىسىپ, قازاق ەلىنىڭ تاريحى مەن مادەني مۇراسىنا ارنالعان بۇل قۇندى ەڭبەكتىڭ, كەلەشەك ۇرپاق ءۇشىن ماڭىزىن اتاپ ءوتتى.
