پاندەميا كەزىندە ۆولونتەرلەر قامقورلىق كورسەتۋدەن ايانىپ قالعان جوق. ءار اۋداندا قۇرىلعان توپتار جالعىز تۇراتىن زەينەتكەرلەرگە, مۇمكىندىگى شەكتەۋلى جاندارعا جانە كوپ بالالى وتباسىلارعا كومەكتەسىپ وتىرۋعا تىرىستى. ولاردىڭ كومەگى ءبىر رەتتىك اكتسيالارمەن شەكتەلمەي, ۇزدىكسىز جۇرگىزىلدى. مىسالى, ەرەكشە مۇقتاج ادامدارعا تاماق, ءدارى-دارمەك, مەديتسينالىق ماسكالار اپارىپ بەردى. ودان بولەك پسيحولوگيالىق قولداۋ دا كورسەتتى. جىل سوڭىنا قاراي ۆولونتەرلەردىڭ ەڭبەكتەرى دە ەسكەرىلىپ, ۇزدىكتەرى ماراپاتقا يە بولدى.
«جىلدىڭ مەتسەناتى» اتالىمى بورودۋليحا اۋدانىنىڭ تۇرعىنى «اسسورتي 2» شارۋا قوجالىعىنىڭ باسشىسى يگور شەۆچەنكوعا بۇيىردى. ول قوجالىق جۇمىسشىلارىنا ۇنەمى كومەكتەسىپ, ءسابيلى بولعاندارعا 100 مىڭ تەڭگەدەن كومەك كورسەتىپ وتىرادى. جىل سايىن تۇرعىندارعا باقشا ءوسىرۋ, قىستا جانە جازدا جولداردى كۇتىپ ۇستاۋ, كوكتەم كەزىندە سۋ بۇرۋ, ارنالارىن تازارتۋ جۇمىستارىنا قولعابىس ەتەدى.
سونداي-اق «ەرەن ەرلىك» اتالىمى بويىنشا ۆولونتەرلىك قىزمەتكە بەلسەنە قاتىسقانى ءۇشىن كۋرچاتوۆ قالاسىنىڭ ۆولونتەرلىك قوزعالىس ورتالىعىنىڭ ءتورايىمى اسەمگۇل قاليمولدينا ماراپاتتالدى.
ول كۋرچاتوۆتاعى ۆولونتەرلەر قوزعالىسىن كەڭەيتىپ, قايىرىمدىلىق ىسكە 2 مىڭنان استام ادامدى تارتقان. اسەمگۇل قاليمولدينا «بالالارعا جۇرەك سىيلا», «قۇس اسحاناسى», ء«بىز بىرگەمىز», «مەيىرىمدى كورشىلەر», «مەيىرىمدى ءىس», «جاقسىلىق جولى», «مىڭ العىس», «ماسكا تاعىڭىز» سىندى ۆولونتەرلىك اكتسيالاردى ۇيىمداستىرعان.
– 2020 جىل ۆولونتەر جىلى بولىپ جاريالانا سالىسىمەن جوسپار جاسادىق. سول جوسپار نەگىزىندە ءبىر جىل بويى ازدى-كوپتى ەڭبەك ەتتىك. اسىرەسە ەكولوگيالىق شارالارعا كوپ بەت بۇردىق. سونىمەن قاتار جالعىزباستى جاندارعا, قاريالارعا, از قامتىلعان وتباسىلارعا قول ۇشىن سوزۋعا تىرىستىق. جۋىقتا عانا شاعىن ورتالىققا بارىپ, بالدىرعاندارمەن بىرلەسىپ, قۇستارعا ۇيا جاسادىق, – دەيدى ۆولونتەرلەر قوزعالىسىنىڭ ءتورايىمى اسەل قاليمولدينا.
كۋرچاتوۆ قالاسىندا كومەككە مۇقتاج تۇرعىندار ورتالىققا حابارلاسىپ, كەرەك-جاراقتارىن ايتسا, ۆولونتەرلەر كومەك كورسەتۋگە ءازىر تۇرادى. قالانىڭ ەلگەزەك جاستارى كوشە سىپىرۋشىلارعا ىستىق شاي مەن باۋىرساق ۇسىنىپ تا العىسقا بولەنگەن. ال قالانىڭ مەتسەناتتارى ءار جۇما كۇنى از قامتىلعان وتباسىلارعا تەگىن نان تاراتادى. اسەمگۇل قاليمولدينانىڭ ايتۋىنشا, ۆولونتەر جىلى اياقتالعانىمەن, جۇمىس جالعاسا بەرمەك.
شىعىس قازاقستان وبلىسى
