«بۇۇدب-عا قازاقستاننىڭ تسيفرلىق سالاسىن دامىتۋعا قوسقان ۇلەسى ءۇشىن العىس ايتامىن. بىرلەسكەن كۇش-جىگەرىمىزبەن ەلەكتروندىق مەملەكەتتىك قىزمەتتەر كورسەتۋ ساپاسىن ارتتىرۋعا, قازاقستاندىقتاردىڭ بارلىق جەردە ينتەرنەتكە قول جەتكىزۋىنە جانە ونىڭ ناتيجەسىندە مەملەكەتتىك سەكتوردىڭ تسيفرلىق ترانسفورماتسياسىن جەدەلدەتۋگە قول جەتكىزەمىز. اتقارىلعان ىستەردىڭ ناتيجەسى قازىردىڭ وزىندە بايقالۋدا. الايدا, الدا ءالى كوپ جۇمىستار بار», دەپ ءتۇسىندىردى تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى باعدات مۋسين.
بۇۇدب تسيفرلاندىرۋ سالاسىنداعى جەتەكشى حالىقارالىق ساراپشىلاردى تارتۋعا قولداۋ كورسەتەدى, سونداي-اق رەينجينيرينگ جانە تسيفرلىق ترانسفورماتسيا ورتالىعىنا 200 مىڭ اقش دوللارى مولشەرىندە گرانتتىق قارجىلاندىرۋ بولەدى.
ىنتىماقتاستىق دامۋدىڭ ۇلتتىق باسىمدىقتارىنا جانە ورنىقتى دامۋ سالاسىنداعى 2030 جىلعا دەيىنگى كەزەڭگە ارنالعان جاھاندىق كۇن تارتىبىنە سايكەس قازاقستانداعى تسيفرلىق ترانسفورماتسيانى جەدەلدەتەدى دەپ بولجاۋدا.
اتاپ ايتقاندا, تاراپتار ازاماتتار مەن بيزنەس وكىلدەرىنىڭ تسيفرلىق مەملەكەتتىك قىزمەتتەرگە قول جەتكىزۋىن جاقسارتۋ, الەۋمەتتىك قورعاۋ سالاسىندا تسيفرلىق شەشىمدەردى ەنگىزۋ, شالعاي اۋىلداردا ساپالى ينتەرنەتپەن قامتاماسىز ەتۋگە ينۆەستورلار ءۇشىن بيزنەس-پاكەتتەر ازىرلەۋ, سونداي-اق مەملەكەتتىك سەكتوردىڭ تسيفرلىق ترانسفورماتسياسىن جەدەلدەتۋ ماقساتىندا ورتالىق مەملەكەتتىك ورگانداردىڭ IT-دەپارتامەنتتەرى قىزمەتكەرلەرىن وقىتۋ بويىنشا جۇمىس ىستەيتىن بولادى.
«باسقارۋدى, الەۋمەتتىك قورعاۋدى جانە جاسىل ەكونوميكانى جاقسارتۋ ءۇشىن تسيفرلىق ترانسفورماتسيانى قولداۋ - بۇل بۇۇدب-نىڭ ءىس-قيمىل باعدارلاماسىنىڭ ەلدەرگە تۇراقتى دامۋ ماقساتتارىنا جەتۋ جولىندا قالپىنا كەلتىرۋگە ىقپال ەتەتىن ماڭىزدى باعىتى», دەدى ياكۋپ بەريش, بۇۇ دامۋ باعدارلاماسىنىڭ قازاقستانداعى تۇراقتى وكىلى.
Covid-19 پاندەمياسىنا جاۋاپ رەتىندە قازاقستاندا بۇۇدب قولداۋىمەن ورتالىق جانە جەرگىلىكتى اتقارۋشى ورگانداردىڭ 1000 مەملەكەتتىك قىزمەتشىسى قاشىقتىقتان جۇمىس رەجيمى جاعدايىندا قىزمەتىنىڭ تيىمدىلىگىن ارتتىرۋ ماقساتىندا نەگىزگى تسيفرلىق جانە كوممۋنيكاتسيالىق داعدىلاردى دامىتۋ بويىنشا وقىتۋدان ءوتتى.
