وبلىس اكىمى ومىرزاق شوكەەۆ اۋدان, قالالاردى ارنايى ارالاپ, جەرگىلىكتى جەردەگى سايلاۋ ۋچاسكەلەرىنىڭ ەلىمىز ءۇشىن ساياسي ماڭىزى زور كۇنگە دايىندىعىن تەكسەردى.
اتقارىلعان جۇمىستار ناتيجەسىندە بارلىق سايلاۋ ۋچاسكەلەرىندە سانيتارلىق-ەپيدەميولوگيالىق تالاپتار قاتاڭ ساقتالادى, مۇمكىندىگى شەكتەۋلى ازاماتتارعا ۋچاسكەگە كەلىپ داۋىس بەرۋ قولجەتىمدى بولادى.
بۇل جۇمىستارعا جەرگىلىكتى بيۋدجەتتەن ءتيىستى قاراجات قاراستىرىلعان. وبلىس بويىنشا جالپى سانى 911 سايلاۋ ۋچاسكەسى بار, ال سايلاۋشىلار سانى - 1 160 196.
سايلاۋشىلاردىڭ جەدەل اقپارات الۋىنا قولايلى بولۋ ءۇشىن 109 قاۋىرت جەلىسى ىسكە قوسىلىپ, رەسمي سايت پەن ارنايى تەلەگرام كانالى جۇمىس ىستەيتىن بولادى.
بۇل قىزمەتتەر سايلاۋشىنىڭ جەكە سايكەستەندىرۋ ءنومىرى بويىنشا داۋىس بەرۋ ءۇشىن ءوزىنىڭ سايلاۋ ۋچاسكەسى تۋرالى انىقتاما, سايلاۋعا قاتىستى سۇراقتارعا جاۋاپ الۋعا مۇمكىندىك بەرەدى.
