سەنات توراعاسى وسى جىلدا بۇكىل الەممەن بىرگە قازاقستان ءۇشىن دە وڭاي بولماعانىن, دۇنيە جۇزىندە پاندەميامەن كۇرەس جانە ەكونوميكالىق داعدارىستىڭ سالدارىن جويۋ باعىتىندا كوپ جۇمىس اتقارىلعانىن ايتتى.
ء«بىزدىڭ ەلىمىزدە دە پرەزيدەنتىمىزدىڭ باسشىلىعىمەن اۋقىمدى جۇمىس ىستەلدى. پاندەميامەن كۇرەسكە قاجەتتى بارلىق ءىس-شارالار قولعا الىندى. وسى جەردە نەگىزگى ماسەلە قارجىعا بايلانىستى ەكەنى بەلگىلى. سوندىقتان پارلامەنت 2020 جىلعى بيۋدجەتكە تولىقتىرۋلار ەنگىزگەن كەزدە, الداعى جىلدىڭ بيۋدجەتىن قاراعاندا پاندەميامەن كۇرەس ماسەلەسىنە باسىمدىق بەردى», دەدى ماۋلەن اشىمباەۆ.
سونداي-اق, ەكونوميكالىق ءوسۋدى قالپىنا كەلتىرۋگە, پاندەميادان زارداپ شەككەن سەكتورلاردى جانە بيزنەستى قولداۋعا ارنالعان زاڭدار دا قابىلدانعانى تۋرالى ايتىلدى.
«بيىل پاندەميامەن كۇرەسكە باسىمدىق بەرە وتىرىپ, بارلىق كەرەكتى زاڭداردى, قاجەتتى نورمالاردى, بيۋدجەتىمىزدى ۋاقتىلى جانە ساپالى قابىلدادىق. سونىمەن بىرگە مەملەكەتتىڭ ستراتەگيالىق ماقساتتارى دا نازاردان تىس قالعان جوق. پرەزيدەنتىمىزدىڭ جاڭعىرۋ باعدارلاماسىن جۇزەگە اسىرۋعا باسا ءمان بەردىك. سوعان سايكەس ساياسي جۇيەمىزدى جاڭعىرتۋ جانە باسقارۋ جۇيەسىنىڭ تيىمدىلىگىن ارتتىرۋ باعىتىندا ستراتەگيالىق ماڭىزى بار زاڭدار قابىلداندى», دەدى سەنات توراعاسى.
سونىمەن قاتار ول بيىل پارلامەنت پەن ۇكىمەت تولىق تۇسىنىستىكپەن جۇمىس ىستەگەنىن, سونىڭ اياسىندا بىرقاتار ماڭىزدى قۇجاتتار قابىلدانعانىن جەتكىزدى.
«مەملەكەت باسشىسىنىڭ تاپسىرماسىنا سايكەس ۇكىمەتپەن بىرگە «سالىق كودەكسىنە» وزگەرىستەر ەنگىزدىك. بۇل كودەكس تەك سالىق جيناۋ ءۇشىن عانا جۇمىس ىستەمەيدى. ەكونوميكامىز قيىندىقتارعا تاپ بولعان قازىرگىدەي كەزەڭدە «سالىق كودەكسى» ءوزىنىڭ ىنتالاندىرۋشى ءرولىن جۇزەگە اسىرۋى كەرەك. وسىنداي كەزدە ول بيزنەستى, كاسىپكەرلەردى ىنتالاندىرۋى قاجەت. سول قاعيدانىڭ نەگىزىندە ءبىز ۇكىمەتپەن تىعىز جۇمىس ىستەپ, قۇجاتقا ماڭىزدى وزگەرىستەر ەنگىزدىك», دەپ اتاپ ءوتتى اشىمباەۆ.
سەنات توراعاسى حالىقتىڭ الەۋمەتتىك جاعدايىن جاقسارتۋعا ارنالعان زاڭدار دا قابىلدانعانىن ايتتى. ودان بولەك, بيىل پارلامەنت قابىلداعان «حالىق دەنساۋلىعى جانە دەنساۋلىق ساقتاۋ جۇيەسى تۋرالى كودەكس» پەن «ەكولوگيالىق كودەكسكە» كەڭىنەن توقتالدى.
ودان بولەك, سۇحبات بارىسىندا جوعارى پالاتىنىڭ بيىلعى اتقارعان جۇمىستارى, قابىلدانعان زاڭداردىڭ ماڭىزى جانە پارلامەنتتىڭ الداعى ماقسات-مىندەتتەرى تۋرالى ايتىلدى.
