اتىراۋ قالالىق پوليتسيا باسقارماسى جەدەل باسقارۋ ورتالىعىنىڭ ينسپەكتورلارى شاعىن اۋداندارعا جۇرگىزىلگەن بەينەمونيتورينگ كەزىندە ۇيالى تەلەفونىمەن اينالانى ءتۇسىرىپ جۇرگەن ازاماتتى بايقاعان.
«دەپارتامەنتتىڭ ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرىمەن ۇستالعان جىگىت كورشىلەس اقتوبە وبلىسىنىڭ تۇرعىنى بولىپ شىقتى. ونىڭ اتىراۋعا سينتەتيكالىق ەسىرتكىنى ساتۋ ءۇشىن ارنايى كەلگەنى بەلگىلى بولدى. جەكە باسىن, سونداي-اق, تۇرعىلىقتى مەكەنجايىن ءتىنتۋ كەزىندە كۇشتى اسەر ەتەتىن پيرروليدينالەروفەنون پرەپاراتى (الفا-پۆپ) تابىلىپ, الىندى», دەدى وبلىستىق پوليتسيا دەپارتامەنتىنىڭ باستىعى قامزا ۇمبەتقاليەۆ.
تاركىلەنگەن سينتەتيكالىق ەسىرتكىنىڭ جالپى سالماعى 208 گرامدى قۇرادى. ال ودان 650-دەن استام دوزا دايىندالادى.
ۇستالعان جىگىتتىڭ اتىراۋ قالاسىندا تۇرعان مەكەنجايىنان ەسىرتكىنى ولشەيتىن تارازى, بۋىپ-تۇيۋگە ارنالعان قۇرىلعىلار تابىلدى. قازىر 25 جاستاعى جىگىت تەرگەۋ يزولياتورىنا قاماۋعا الىندى.
