فيليال باسشىسى ەلتاي تاياليەۆ پەن تراسسالارعا بارىپ تەكسەرۋ كەزىندە الىناتىن جول ماتەريالدارىنىڭ ساپاسىن زەرتحانادا تالدايتىن ماماندار 9-11 سىنىپ وقۋشىلارىن قىزىقتىرعان ساۋالدارعا تۇسىنىك بەردى.
«بۇگىن وقۋشى – ەرتەڭگى جاس تۇلەكتەردىڭ جولشى ماماندىعىنا قىزىعۋشىلىعى باسىم ەكەندىگى قۋانتادى. ونلاين-كەزدەسۋ بارىسىندا زەرتحانا ءىشىن كورسەتىپ, مۇنداعى جۇمىستاردىڭ قالاي جاسالىپ جاتقانىن بالالارعا تۇسىنىكتى تىلمەن ايتىپ جەتكىزدىك دەپ ويلايمىن. بۇل ماماندىقتى ۇل-قىز بىردەي يگەرە الادى. مىنا ىندەتتەن قۇتىلىپ, كارانتيندىك شەكتەۋلەر الىنعان سوڭ اقتاۋداعى مەكەمە عيماراتىن ارالاتىپ, مۇنداعى قۇرال-جابدىقتارمەن قالاي جۇمىس ىستەۋ كەرەكتىگىن كورسەتۋدى دە جوسپارلاپ قويدىق», دەيدى تاياليەۆ.
بيىل جىل باسىندا «جول اكتيۆتەرىنىڭ ۇلتتىق ساپا ورتالىعى» رەسپۋبليكالىق مەملەكەتتىك كاسىپورنى باسشىلىعى «1000 مەكتەپ» باستاماسىن جۇزەگە اسىرۋدى قولعا الدى. ماقسات – مەكتەپ ءبىتىرۋشى تۇلەكتەرمەن كەزدەسىپ, جولشى ماماندىعىنا تارتۋ.
ماڭعىستاۋ وبلىسىندا 154 مەكتەپ بار دەسەك, ايماقتا كارانتيندىك شەكتەۋ شارالارى ەنگىزىلگەن ۋاقىتقا دەيىن 26 ورتا ءبىلىم بەرۋ مەكەمەسى قامتىلدى. بۇل رەتتە جول ساپاسىن باقىلاۋشىلار اقتاۋدان بولەك مۇنايلى مەن تۇپقاراعان اۋدانىنداعى مەكتەپتەرگە ارنايى بارىپ, جاس بۋىن وكىلدەرىمەن جۇزدەستى.
اتالعان كەزدەسۋلەردە وبلىس كولەمىندە سالىنىپ جانە جوندەلىپ جاتقان كولىك جولدارىنىڭ ساپاسىن باقىلاۋ جۇمىستارىنىڭ ناتيجەلەرى تانىستىرىلىپ, جول ماماندىقتارى جايلى جان-جاقتى اقپارات ايتىلدى.
كوپ جاعدايدا وقۋشىلاردى مەكتەپ بىتىرگەن سوڭ قانداي وقۋ ورنىنا تۇسۋگە بولاتىندىعى الاڭداتادى. ايتا كەتەيىك, قازاقستاندا جول سالاسى بويىنشا مامانداردى دايارلاۋمەن 30-جۋىق ۋنيۆەرسيتەت پەن 50-گە تارتا كوللەدج اينالىسادى.
