زەرتتەۋ ناتيجەسىن Daily mail حابارلادى. عالىمدار كەلەشەكتە كوروناۆيرۋستىڭ ادامزاتقا ءالى دە قاۋىپ توندىرەتىنىن ايتىپ, ءدارى-دارمەكسىز ەمدەۋ جولىن ىزدەپ جاتىر. سونداي-اق, ينفەكتسيا قاۋىپىن ازايتۋ جانە اۋرۋدىڭ تارالۋىنىڭ الدىن الۋدىڭ جولىن ىزدەۋدە.
بۇل ىزدەنىستەگى باسىم باعىتتاردىڭ ءبىرى تاماق عىلىمى مەن تاماقتانۋ بولىپ وتىر. عالىمدار دۇكەننەن الىنعان ءارتۇرلى تاۋاردىڭ كوروناۆيرۋسپەن كۇرەستەگى اسەرىن زەرتتەپ, پايدالى ونىمدەردى اتادى.
ءبىرىنشى قاتاردا بالىق ونىمدەرى تۇر. ودان كەيىن قارا شوكولاد پەن ءجۇزىم, ايران, گرەيپفرۋت تۇقىمى سىعىندىسى دا بار. ە234 نومىرىمەن دە بەلگىلى باكتەريالار شىعاراتىن جانە كوپتەگەن كونسەرۆىلەردە كەزدەسەتىن تابيعي تاعام كونسەرۆانتى دا بۇل ءتىزىمدى تولىقتىردى. التى ءونىمنىڭ ىشىنە تەڭىز بالدىرلارى دا كىردى.
