دوڭگەلەك ۇستەل جۇمىسىنىڭ ماقساتى – قازاقستاندىق مۋزەيلەر قىزمەتكەرلەرىنىڭ اراسىندا ەكسكۋرسيالىق قىزمەت كورسەتۋ سالاسىندا تاجىريبە الماسۋ, ولاردى مۋزەي ءىسىنىڭ وزەكتى ماسەلەلەرىن شەشۋگە تارتۋ, سونداي-اق قازاقستان مۋزەيلەرى قىزمەتكەرلەرىنىڭ اراسىندا ءبىلىم بەرۋ جانە عىلىمي بايلانىستاردى دامىتۋعا جاردەمدەسۋ بولىپ تابىلادى.
ءححى عاسىردا ەكسكۋرسيالىق قىزمەت كورسەتۋ جۇمىسى كۇرت وزگەرىسكە ۇشىرادى. مۇنىڭ سەبەبى – قوعامدىق سانانىڭ وزگەرۋى, ينكليۋزيانىڭ دامۋى, جاڭا تەحنولوگيالاردىڭ بەلسەندى قولدانىلۋى. سونداي-اق الەمدى ءدۇر سىلكىندىرگەن پاندەميا سالدارى دا كوپتەگەن تاريحي-مادەني وشاقتاردىڭ جۇمىس ىستەۋ باعىتىنا ءبىرشاما وزگەرىستەر ەنگىزدى.
ياعني اتالعان شارا اياسىندا وڭىرلىك مۋزەي ماماندارىنىڭ قاتىسۋىمەن ەكسكۋرسيالىق قىزمەتكە قاتىستى ماڭىزدى ماسەلەلەر تالقىلانىپ, ونى شەشۋ جولدارى بويىنشا بىرقاتار ۇسىنىستار قابىلداندى.
دوڭگەلەك ۇستەل جۇمىسى باستاپقى ءۇش باعىتتى قامتىدى: العاشقىسى پاندەميا كەزىندەگى مۋزەي: ەكسكۋرسيالاردىڭ وزگەرۋى جانە جاڭا تەحنولوگيالاردى قولدانۋ بولسا, كەلەسىسى ەرەكشە قاجەتتىلىكتەرى بار ادامدارعا ەكسكۋرسيالار: ماسەلەلەر, نەگىزگى مىندەتتەر جانە ەكسكۋرسيا جۇرگىزۋدىڭ ادىستەرى. سوڭعىسى ەكسكۋرسيالىق قىزمەتتى ادىستەمەلىك سۇيەمەلدەۋ.
جيىنعا قازاقستان رەسپۋبليكاسىنىڭ ەڭبەك سىڭىرگەن ەكسكۋرسوۆودى, يۋنەسكو-نىڭ ۇلتتىق جاتتىقتىرۋشىسى باقىت ورازىمبەتوۆا قاتىسىپ, ۇلتتىق مۋزەي مەن ەلىمىزدىڭ وڭىرلىك مۋزەيلەرى قىزمەتكەرلەرىنىڭ باياندامالارىن تىڭدادى.
اتالعان شارا بارىسىندا قاتىسۋشىلار نازارىنا ۇلى دالانىڭ ەجەلگى ونەرى جانە تەحنولوگيالارى زالى بويىنشا تەاترلاندىرىلعان ەكسكۋرسيا ۇسىنىلدى.
