ەڭ وزىق قولجەتىمدى تەحنولوگيالار قاعيداتتارىنا كوشۋ تۋرالى ەكولوگيا, گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ, «جاسىل كوپىر» سەرىكتەستىك باعدارلاماسىن ودان ءارى دامىتۋ جونىندەگى ۇسىنىستار تۋرالى «قازاقستاننىڭ ەكولوگيالىق ۇيىمدارىنىڭ قاۋىمداستىعى» زتب ءتورايىمى ءاليا نازارباەۆا, قر-نىڭ 2013-2020 جىلدارعا ارنالعان «جاسىل ەكونوميكاعا» كوشۋ جونىندەگى تۇجىرىمداماسىنىڭ ءىس-شارالار جوسپارىن جۇزەگە اسىرۋ تۋرالى يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ, وڭىرلەردە ەكولوگيالىق احۋالدى جاقسارتۋ جانە «جاسىل ەكونوميكانى» دامىتۋ شارالارى تۋرالى جامبىل وبلىسىنىڭ اكىمى بەردىبەك ساپارباەۆ پەن باتىس قازاقستان وبلىسىنىڭ اكىمى عالي ەسقاليەۆ باياندادى.
قر جاڭا ەكولوگيالىق كودەكسى ەۋروپالىق وداق ەلدەرىنىڭ تاجىريبەسى بويىنشا ەڭ وزىق قولجەتىمدى تەحنولوگيالار (وقت) كورسەتكىشتەرىن پايدالانۋ ارقىلى كاسىپورىنداردى ءوندىرىستى جاڭعىرتۋعا ىنتالاندىرۋدى كوزدەيدى.
ماسەلەن, ەو ەلدەرىندە وقت كوشۋدىڭ ارقاسىندا لاستاۋشى زاتتاردىڭ شىعارىندىلارى ايتارلىقتاي تومەندەدى: كۇكىرت ديوكسيدى بويىنشا 94%-عا, ازوت توتىعى بويىنشا 69%-عا, قاتتى بولشەكتەر بويىنشا 94%-عا ازايدى. ەكولوگيالىق رەتتەۋدىڭ جاڭا تاسىلدەرىن ىسكە اسىرۋ اياسىندا وقت بويىنشا انىقتامالىقتار ازىرلەنۋدە.
بيىل حالىقارالىق جاسىل تەحنولوگيالار جانە ينۆەستيتسيالىق جوبالار ورتالىعى ەنەرگيا تيىمدىلىگى بويىنشا انىقتامالىق جاساۋ جۇمىسىن باستادى. 2021-2023 جىلدارى «مۇناي مەن گازدى قايتا وڭدەۋ», «ەنەرگيا ءوندىرۋ ماقساتىندا ءىرى قوندىرعىلاردا وتىن جاعۋ», «بەيورگانيكالىق حيميالىق زاتتار ءوندىرىسى», «تسەمەنت جانە اك ءوندىرىسى», «مۇناي مەن گاز ءوندىرۋ», «قارا مەتالدار ءوندىرىسى», ء«تۇستى مەتالدار ءوندىرىسى», «باعالى مەتالدار ءوندىرىسى» انىقتامالىقتارى ازىرلەنەدى. وقت بويىنشا انىقتامالار مەن ءتيىستى تۇجىرىمدار قر ۇكىمەتىنىڭ قاۋلىسىمەن بەكىتىلەدى.
2023-2025 جىلدارى كەشەندى ەكولوگيالىق رۇقسات بەرۋ ءۇشىن دايىندىق جۇمىستارى جۇرگىزىلەدى. 2025 جىلعا قاراي لاستانۋدىڭ 80%-ى تيەسىلى مۇناي-گاز, تاۋ-كەن مەتاللۋرگياسى, حيميا جانە ەلەكتر ەنەرگەتيكاسى سالالارىنىڭ 50 ءىرى كاسىپورنىنىڭ ەڭ وزىق قولجەتىمدى تەحنولوگيالارىنا كوشۋ ءۇشىن جاعداي جاسالادى. كەڭەس سۋ رەسۋرستارىن پايدالانۋ, قالدىقتاردى باسقارۋ, تومەن كومىرتەكتى دامۋ ستراتەگياسىن ازىرلەۋ, سونداي-اق بارلىق وڭىرلەردە ەكولوگيالىق جاعدايدى جاقسارتۋ جانە «جاسىل ەكونوميكانى» دامىتۋ جونىندەگى شارالاردى قاراستىرۋدى كوزدەيتىن 2021 جىلعا ارنالعان جۇمىس جوسپارىن بەكىتتى.
